කොරෝනා සීසන් 1

          

   ගොඩයා නිකමට වගේ බ්ලොග් එකට ගොඩවුනේ පොඩි විවේකයක් ලැබුන වෙලාවක. වෙන මොනාහරි බ්ලොග් පෝස්ට් කියවන්ට කියලා හිතාගෙන බ්ලොගේ වෙබ් වර්ශන් එකට ගියාම තමා යකඩෝ දැක්කේ 2021 ට බ්ලොග් පෝස්ට් එකක්වත් ලියලා නෑ නේදෝ කියලා. ලියන්න කියලා හිතේ විවේකයකුත් තිබුනේ නැතිකොට බ්ලොග් පෝස්ට් එකක් ලියන්න ලොකු උවමනාවක් තිබුනේ නැතිදෝ මන්දා කියලාත් ගොඩයාට හිතුනේ නැත්තෙත් නෑ. 2019 ලංකාවට ගිහිං ආවයින් පස්සෙ ලංකවට යන්නත් බැරිවුන එකේ ගොඩයා ඉන්නෙ හිතේ තෝන්තුවෙන්. කොරෝනාව රට රටවල ඉන්න උදවියට තමුන්ගේ රටවලට ගිහිං එන්න බැරිවෙන්නම දඬුවම දීපු නිසා දැන් අවුරුදු මාස විසි පහක් ගොඩයා ලංකවට ගිහිං නෑ. සාමාන්‍ය තත්වයක් යටතේනම් මාස විසි පහට අඩුම තරමේ දෙවතාවක් ගොඩයා ලංකාවට යැවෙන එක අනිවා. 

        2020 අවසාන කාලෙ වෙද්දි ලංකාවට යන්න පුලුවන් වාතාවරණයක් තිබුනත් අම්මටසිරි ලංකාවේ කෙරිච්ච කොරන්ටීන් බිස්නස් එක නිසා ගොඩයා ලංකාවට ආවෙ නෑ. ඒකට පලවෙනි හේතුව උනේ ලැබෙන සති තුනේ නිවාඩුවෙන් සති දෙකක් හෝටලේක ලගා ගහලා සතියක් ගෙදර ගිහින් එන එකේ තේරුමක් නැතිවීම. දෙවැනි හේතුවනම්, අමාරුවෙන් උපයන තුට්ටු දෙක හෝටල් කාරයන්ට පුදන්න ගොඩයාට හිත හදාගන්න බැරිවීම. ඒ කියවෙන කොරන්ටීන් හෝටල්වල ගනන් හිලව් ඇහුවාම හිතෙන්නෙ ඒ හෝටල් තියෙන්නෙ ලංකාවෙද එහෙමත් නැතිනම් පැරිස්, ලන්ඩන්, නිව්යෝර්ක් සිටි වලින් එකකද කියලාමයි. කොහොමෙන් කොහොමහරි වැක්සීන් එක ගහගෙන ලංකාවට යනවාමයි කියලා හිතාගෙන වැක්සීන් එකත් ගහගත්තා කියමුකෝ.. ඒත් ඉතිං ආයෙම ගොඩයාගෙ කරුමෙට ලංකවෙ කොරෝනා තත්වය ඉතාමත් නරක අතට හැරිලා ලංකාවට යන වැඩේ අල උනා.

            2020 මාර්තු වගේ වෙද්දි තමා ගොඩයා ඉන්න රටට කොරෝනා යහපත් උනේ. සියලූම කාර්‍යාල, ව්‍යාපාර මහජනයාට වැහී යන්න වැඩි දවසක් ගියේ නෑ කියමුකෝ. ගොඩයා රස්සාව කරන කොම්පැණියෙත් රට වටේ තියෙන ශාඛා සියල්ලම වගේ වැහුනා ලොක්ඩවුන් වීම නිසා. දල වශයෙන් ගොඩයා වැඩ කරන කොම්පැණියේ හාරදාස් දෙසීයකට රැකිය අහිමිවුනා එක රැයින්. අවුරුදු දහයක් එක දිගට රස්සාව කරලා විවේකයක් ලැබෙන්නෙ කවදාද කියලා ඇඟිලි ගැන ගැන හිටපු ගොඩයාත් බලාන හිටියේ ගොඩයාගෙ ජොබ් එකත් කෙලවුනා ගොයියෝ නැවත කැඳවනකල් ගෙදර හිටපන් කියලා බොසාගෙන් කෝල් එකක් හෝ HR එකෙන් ඊ මේල් පනිවිඩයක් එනකල්. ජොබ් එක නැති උනාම ආන්ඩුවෙන් ගතමනාවක් ලැබෙන  නිසා ඒකත් අරගෙන ආතල් පහට ටික කාලයක් ගෙදර ඉන්න පුලුවනි කොරෝනාව අවසන් වෙනකල්.  ස්භාවිකව ඇහැරෙනකල්  නිදාගෙන අවදිවෙලා දවසම ටීවී බලලා තුන්වේල බඩ පැලෙන්න කාලා ඇතිවෙන්න නිකම් ඉන්න  චෑන්ස් එක ලැබෙන කෝල් එක හෝ ඊ මේල් එක ගොඩයාට එනකල් ගොඩයා උන්නෙ නොඉවසිල්ලෙන්. කොම්පැනිය වහලා දවසක් යද්දී ඕං ගොඩයාටත් HR එකෙන් ඊමේල් එකක් ඇවිල්ලා දිලිසි දිලිසී තියෙනවා ගොඩයා උදේ ඊ මේල් බලද්දි. ගොඩයාගෙ සතුට ඉහවහා ගියා කියහංකෝ ඒක දැක්කාම. ලෝකෙ වටේ ලක්ස ගානින් මැරෙන වසංගතයෙන් ආරක්ශා වෙලා ගෙදරට වෙලා ආතෙල් එකේ ඉන්න ලැබෙන එක කොයිතරම්නම් වාසනාවක්ද.. ඕං ගොඩයා නමෝ විත්තියෙන් ඊ මේල් එක ඕපන් කරලා බැලින්නම් ඒකෙ තියෙන ආරංචිය අතිවිෂිශ්ඨයි, උත්කෘෂ්ඨයි, අනගිභවනීයයි, මල් හතයි, කියලා හිතුවට ඒක එහෙම නෑ  කියහංකෝ . ඊ මේල් පණිවිඩයෙන් කියැවුනේ කොම්පැනියේ සියලූම ටෙක්නීශියන්ලා අත්‍යාවශ්‍ය සේවා බවට පත්කලාය, ඊමේලය සමග අමුණා තිබෙන ලියුම ප්‍රින්ට් කරලා වාහනයේ තියාගෙන ඉන්නය, ලොක්ඩවුන් තියෙද්දි වාහනේ ගිහිල්ලා පොලිසියෙන් ඇල්ලුවොත් ඒ ලියුම ඉදිරිපත් කරන්නය බ්ලා බ්ලා බ්ලා..  ඒ කියන්නේ ගොඩයාගෙ හීනය සුං. කොරෝනා හැදුනොත් සති දෙකක් වැටුප් සහිත නිවාඩු ලැබෙනවාය, තත්වය යහපත් අතට හැරෙනාතුරු වැටුපෙන් සියයට පහක් කපනවාය, වැටුප් සහිත නිවාඩු හෙවත් වැකේශන් ලීව් නැවත දැනුම්දෙනතුරු අවලංගුය, නිවාඩු ගතහොත් වැටුප් රහිත එව්වා වශයෙන් ගනන් ගැනෙනවාය කියලත් තිබුනා කියහංකෝ. ඒ කියැවෙන විදිහට ගොඩයාගෙ හීන සියල්ලම කපෝති. වෙනදා වගේම වැඩට යෑමක් ඇරුනාම හිත නිවෙන ආරංචියක් ඒ ලියුමෙ නෑ කියහංකෝ.

ඕං එදා හිටං ගොඩයා සුපුරුදු විදිහට වැඩ. වැඩ කිව්වට වැඩ නෑ. ගොඩයාට අදාල ඕනෑම ලොකේශන් එකකට ගිහිං උදේට ක්ලොක් ඉන් කරලා මලාට සර්විස් කෙරෙන්නෙ නැති යන්තර සූත්තර වලට පොඩි සර්විස් එකක් දෙන්නයි මහතැනගෙන් නියෝගය. මහතැනගේ නියෝගය කිව්වට එහෙම ලොකු සීන් නෑ. එයයි ඉතිං ගොඩයාගෙ ඩිපාර්ට්මන්ට් එකේ සේරෝටම තාත්තා වගේ තමා. ආයෙ පස්සෙන් පන්නලා හෙවිලි නෑ. GPS දාගෙන ඉන්න ලොකේශන් හෙවිලි නෑ. ආං ඒකට ගොඩයා කලින් වැඩ කරපු කොම්පැණිය. උං ඇඟ ඇතුලට චිප් එකක් දාන්නේ නැති ටික විතරයි. ෆෝන් එකටද, ලැප්ටොප් එකටද, වාහනේටද එකී මෙකී නොකී කොම්පැනියෙන් සපයපු හැම මගුලටම GPS දාගෙන පැය අටේම ට්‍රැක් කරනවා ඉන්න ලොකේශන් එක. ෆීල්ඩ් සර්විස් කියන්නෙ හිතූ පැතූ ගමන් බිමන් සියල්ලම යන එන ගමන් වෙලාවක් ඉතුරු උනොත් රස්සාව කරන ජොබක් නිසා එහෙම හොයන්නෙ බලන්නෙ නැතුවත් බැරුව ඇති. ඒත් ගොඩයාගෙ දැං ලොක්කානම් ආං ඒකට සුපිරි බුවා. වැඩ කරන හමෝම විශ්වාසය රකින නිසාත්, රාජකාරිය අකුරට ඉටුකරන නිසාත්, වැඩ කරන වෙලාවේ ලංකාවට ගිහිං ආවත් මෑන්ස්ගෙ අවුලක් නෑ. ඔවර්ටයිම් දාන්නේ නැතිනම් සහ වාහනේට ට්‍රැවල් වැටෙන්නෙ නැතිනම් පැය අට ඇතුලත ජොබ් එකත් අකුරට ඉෂ්ඨ සිද්ද වෙනවානම් කොයි ලෝකේ හිටියත් බොසා ඕකේ. නිදහසේ උපරීම තැනට ලැබෙන නිසා ගොඩයාත් ඒක් අවභාවිතා කරන්නෙ නෑ. බොරු කරලා ඕටී දාන්නෙ නෑ. ඩොලර් දාස් ගනන්වල  ස්පෙයාර් පර්ට්ස් බොරු වර්ක් ඕඩර් දාලා ඕඩර් කරලා එව්ව ඊබේ දාලා විකුනන්නෙ නෑ. වාහනේ මයිලේජ් එකට හැතැක්ම කාලක්වත් හොරාට ඇඩ් කරන්නෙ නෑ. එහෙම කරනවානම් දවසට ඩොලර් දහයක් විස්සක් මයිලේජ් එකට ඇඩ් කරන එක කජු කනවටත් වඩා සිම්පල්. වැඩ කරන තැන ක්ලොක් ඉන් කරලා වෙන තැනක පාර්ට් ටයිම් කරන්නෙ නෑ. ප්‍රයිවට් ජොබ්ස් වලට අවශ්‍ය කරන පාර්ට්ස් කොම්පැණියෙන් ඕඩර් කරලා ඒ පාර්ට්ස් දාලා ප්‍රයිවට් රෙපෙයාර්ස් කරලා මුදල් හොයන්නෙ නෑ. ඔය උඩ කිව්ව හොර මගඩි සියල්ලම ෆීල්ඩ් සර්විස් වැඩ කරන එවුන් සුලභව කරන මගඩි. ඊට අමතරව කොම්පැණියෙන් සපයන වාහනේ ටයර් හතරේ ඉඳන් විකුනන්න පුලුවන් හැම කෑල්ලම ගලවලා විකුනන එවුනුත් නැත්තෙම නෑ.

ඕං කොරෝනා ලොක් ඩවුන් එක අතරේ ගොඩයා සුපුරුදු විදිහට උදේ අට හවස හතර වැඩ. වෙනදාට වාහන දාස් ගානක් හිරවෙලා ඉබිගමනේ යන හයිවේවල උදේට හවසට වාහනයක් යන්නෙ බොහෝම කලාතුරකින් කියමුකෝ. වැඩ කරන වෙලාවේ කා එක්කවත් ඇසුරක් පැවැත්වෙන්නේ නැති නිසා ගොඩයාට කොරෝනා අවධානමක් නෑ. ගොඩයාගෙ ලොකේශන් සියල්ලෙම දොර යතුරු ගොඩයාලඟත් තියෙන නිසා සෙනග සිය දහස් ගහන් ගැවසුන තැන්වල බොහෝවිට ගොඩයා විතරයි. ඉඳලා හිටලා ලොකේශන් මැනේජර් විසිට් එකක් දැම්මට උනුත් වර්ක් ෆ්‍රොම් හෝම් නිසා දවස් පහේම අවිත් වාත වෙන්නෙ නෑ. ඔය විදිහට සති කීපයක් ගතවෙද්දි තමා වනේ වන හතුරෙකුටවත් නොවියයුතු අලකලංචියක් ගොඩයාට සිද්දවෙන්නෙ. දැං මේක කියවන උදවිය හිතාවි ගොඩයාට කෝවිඩ් හැදුනද කියලා. කෝවිඩ් හැදෙන එක ඊට දාහෙන් සම්පතයි කියමුකෝ. කෝවිඩ් හැදිලා ඕනෙනම් මැරිලා යාවි. එහෙම නැතිනම් ටික දවසකින් හොඳ වේවි. ඊටත් එහා අලකලංචි මිනිස්සුන්ට වෙනවා කිව්වොත් මේක කියවන උදවිය හිතයි යකෝ කෝවිඩ් හදෙනවට වඩා මොකක්ද සිද්දවෙන්න පුලුවං අලකලංචිය කියලා.

ලෝකෙම වාසංගතයකට මුහුනදීලා ඉන්න වෙලාවක, සියලූම රෝහල් කෝවිඩ් ලෙඩ්ඩුන්ගෙන් පිරීලා ඉතිරිලා තිබ්බ වෙලාවක, පුද්ගලික වෛද්‍ය සායනත් වර්චුවල් විසිට් වලට පමණක් සීමා වෙලා තියෙන කාලෙක, දොස්තර කෙනෙකුගෙන් ප්‍රෙස්ක්‍රිප්ශන් එකක් නැතුව බෙහෙත් පෙත්තක් ගන්න බැරි රටක ඉන්න එකෙකුට දත් කැක්කුමක් හැදෙනවා කියන්නෙ ගොඩයාගෙ වෙලාව කොයිතරම් හොඳද කියලා නිකමට හිතන්නකෝ. ඔය කියන දත පොඩ්ඩක් ලෙඩ දෙන්න අරගෙන මාස කීපයක් උනාට ගොඩයා ප්ලෑන් කරගෙන හිටියේ ලංකාවට ගිහිල්ලා දත් සැට් එකටම සුපිරි සුද්දයක් දෙන්න. මොකද කියනවානම් ගොඩයා ඉන්න රටේ දත් දොස්තර කෙනෙක් ලඟට ගියාම ඌ ගොඩයාගෙ සාක්කුවට සුපිරි සුද්දයක් දෙන වග ගොඩයා දැනගෙන උන්නා. දන්ත ප්‍රතිකාර සඳහා රක්ශණ ආවරණයක් ගොඩයාට තියෙනවා උනාට ඒකෙනුත් කවර් කරලා ඉතුරු බැලන්ස් එකත් හෙන තඩි මුදලක්. ඒ ගාන ගෙවනවට වඩා ලාභයි ටිකට් එකක් අරං ලංකාවට ඇවිල්ලා ලංකාවෙන් දත හදාගෙන යන එක. ලංකාවෙ දත් දොස්තරගේ බිලයි, යන එන ටිකට් එකේ ගානයි දෙකම එකතු කරත් ගොඩයා ඉන්න රටේ දත් බිල ඊට ගොඩාක් වැඩියි. 

දන්නා කියන සියලූම වේදනා නාශක ගහලත්,  දත් කැක්කුම් වලට ගාන, දතේ උලන , දතට තියලා තද කරන, තියලා හපාගෙන ඉන්න එකී මෙකී නොකී සියලූම දෑ කරලත් දත් කැක්කුම අඩු වෙනවද... නෑ දෙයියෝ නෑ... වටේම තියෙන පුද්ගලික දන්ත සායන වලට කෝල් ගහනවා ගහනවා ගහනවා ගහනවා එකෙක් ආන්සර් නෑ. ඒ වෙද්දි කෝවිඩ් මරණ ප්‍රමාණය පනස්දාහ පැනලා නිසා අනුන්ගේ දත් කැක්කුම් වලට වඩා තමුන්ගේ ජීවිතේ වටිනවා කියන එක දත් දොස්තරලා තීරණය කර තිබීම ගොඩයාගෙ අවාසනාව. කැක්කුම උහුලාගෙන ඉන්න අතරේ දවසක ඕන එකම එක දන්ත සායනයකින් ෆෝන් එක උස්සනවා කියහංකෝ. ගෙඩයාට ඒ වෙලාවෙ සංජය දත් හරි කමක් නෑ දත් දොස්තරයෙක්නම්. දෙයියෝ දීපු චාන්ස් එක විනාඩියක්වත් අපතේ යැවීම ඒ වෙලාවේ නොකල යුත්තක්. දත් ඩොකා කාගෙ හරි කොරෝනා කාරයෙකුගේ කටේ අත දාලා කොරෝනා හදාගත්තොත් ගොඩයා සුං. ඒ නිසා ගොඩයා එවෙලේම රූ......ං ගාලා යනවා දත් දොස්තරයාව හොයාගෙන.

ගිහිං බැලින්නම් වැඩේ සෝචනීයයි. ක්ලින්ක් එකේ ඩොකා විතරයි. ඇසිස්ටන්ස්ලා, නර්ස්ලා, රිසෙප්ශනිස්ට්ලා මොකෙක්වත් නෑ. ඉලක්කම් හතරෙන් මිනිස්සු මැරෙද්දි රස්සාවලට යන්න මිනිස්සු බයයි. මොකක්දෝ හේතුවකට හෝ අහේතුවකට ඩොකා අවේලබල්. ගොඩයා ගිය ගමන්ම ඩොකා ගොඩයාගෙ සියලු විස්තර ටික කොම්පීතරේට දාලා ගොඩයාව ගත්තා දන්ත ශල්‍ය පුටුව උඩට. ආ ඊට කලින් එක්ස්‍ රේ එකකුත් ගත්තා. ඩොකා පලමුව ගොඩයාව එකඟ කටගත්තා උඹේ කටට මොක කරත් මෙතැන ඇසිස්ටන් කෙනෙක් නැති නිසා යම් යම් අපහසුතාවයන් වලට ලක්වෙන්නට පුලුවන ඒ නිසා ඒකට කැමතිනම් විතරක් කට රෙපෙයාර් කරන්න ගන්නම් කියලා. ගොඩයාට එව්ව අදාල නෑ. සතියකට වැඩි කාලයක් නාශක අහුරු පිටින්  ගිලලා ගිලලා අක්මාවත් ආමාශයත් උගුරේ හිටං පස්ස පැත්ත කෙලවර දක්වාම තියෙන බඩවැල් ටිකත් බාබිකිව් දැම්ම ගානට පත්වෙලා තියෙද්දි ගොඩයාට මොන ඇසිස්ටන්ලාද ආයුබෝවන්ඩ. ඩොකා කට ඇතුලට ගිහිලා කට ඇතුලෙ පුටුවක් තියන් වාඩිවෙලා හරි කමක් නෑ ගොඩයාට ඕන දත් කැක්කුමෙන් මිදෙන්න. ඩොකා වයස හැත්තෑවක විතර පොරක් නිසා වැඩත් ටිකක් හෙමින් වගේ උනාට හොඩයාට ඒ වෙලාවෙ වැදගත් දත් දොස්තර කෙනෙක් මිසක් ඩොකාගෙ ජාතකේ නෙවෙයි.

ඔං ගොඩයාගෙ දත් සැට් එක වටේ රවුමක් ගිය ඩොකා දත් සැට් එකේම පිංතූර ටිකකුත් අරගෙන කලින් ගතපු එක්ස් රේ ටිකත් අරගෙන ඒ සේරෝම ඉස්සරහ තියෙන රූපවාහිනී තිරයට දාගෙන ගොඩයාට ලැච්චර් එකක් දෙනවා දතෙන් දත ගැන සහ එව්වායින් කෙරෙන කාර්‍ය ගැන. ආං එදා තමා ගොඩයා ජීවිතේ පලමු වරට ඉගෙනගත්තේ දත් ටිකට සැපක් දෙනවා කියන්නේ ඉන්වෙස්ට්මන්ට් එකක් කියලා. ඒකෙ තේරුම ගොඩයා හරියටම තේරුම් ගත්තේ ගොඩයාගෙ කටේ තියෙන රෙපෙයාර් ටික කරන්න යන මුලු මුදල කීයද කියලා ඩොකා ගොඩයාට කිව්වයින් පස්සෙයි. ගාන කියන්න කලින් ඩොකා කිව්ව විදිහට, මැරෙනකම් කෑම කන්න තියෙන වන් ඇන්ඩ් ඔන්ලි දත් සැට් එකට මුදලක් වියදම් කරන එක ආනගතය වෙනුවෙන් කරන ආයෝජනයක්ලු. ගොඩයාගෙ දත් තුනක් නරක් වෙලාලු. එකක් කලින් පුරවපු දතක්. ඒකෙ ෆිලින් එක තියෙද්දිම වෙන තැනකින් දිරුමක් බැහැලා ඇතුලෙන් යටටම දිරලාලු. අඟල් හතලිගේ රූපවාහිනී තිරයට දැම්මාම ගොඩයාගෙ දත් සැට් එකේ තියෙන වලවල් ටික පේන්නේ තඩි ආවාට වගේ කියහංකො. දොස්තරයා කියන විදිහට ෆිලින් එක තියෙන දතලු කැක්කුම එන්නෙ. අනික් දෙක ඩොකා කියන තරම් අවුලක් තියෙනවා කියලා ගොඩයාට පේන්නේ නැති උනාට දොස්තරගේ අවුරුදු හතලිස් ගානක පලපුරුද්දෙන් කියන්න පුලුවන්ලු මාසයක් දෙකක් යද්දි එව්වයිනුත් කැක්කුම එනවා අනිවාලු. ගොඩයා ඉතිං වේදනාව උහුලගෙන ඇහුවා දොස්තර මහත්‍තයෝ මේ ටික රෙපෙයාර් කරන්න එස්ටිමේට් එක කීයද කියලා. රෙපෙයාර් කරන අයියලා එක්ක ගනුදෙනු කරද්දි වැඩේට අත තියන්න කලියෙන් ගනන් හිලව් අහගෙන ඉන්න ඕන කියන තියරියට වාහනද, නැව්ද, ප්ලේන්ද, දත්ද කියන එක අදාල නෑ. ගනං අහන්නෙ නැතුව කරොත් වැඩේ ඉවර උනාම කියන ගානක් දෙන්න වෙනවා කියන එකට රට අදාල නෑ. 

ඕං දොස්තර මහත්තයා වඩේට එස්ටිමේට් එක දුන්නා කියහංකෝ. ඒක දැකලා තා පොඩ්ඩෙන් ගොඩයාගෙ හුස්ම ටික යනවා ඩොකාගෙ දන්ත ශල්‍ය පුටුව උඩම. දත් දෙකක් පුරවලා තුන්වෙනි එකකට ක්‍රවුන් එකක් දාලා මුලු කටටම ක්ලීන් අප් එකක් දෙන්න මුලු ගාස්තුව ඩොලර් පන්දාස් පන්සීයක්. ඒ ගානත් ඉන්ශූරන්ස් එකක් තියෙන නිසා. එහෙම නැතිනම් ගාන ඩොලර් දහදාස්   පන්සීයක්ලු. පන්දාස් පන්සීයක් කියන්නෙ ලංකාවෙ මුදලින් ලක්ස දහයකට වැඩි ගානක්. ගොඩයා පුටුව උඩ ඇලවෙලා කල්පනා කරේ ලංකවෙ දත් දොස්තරලා මේ ගනන් දැනගත්තොත් ලංකාවෙ ලෙඩ්ඩුන්ට කුමකින් කුමක් වෙයිද කියලයි. ගොඩයා ආවාට ගියාට වැඩ කරන්නෙ නැති නිසාත් දොස්තරයාවත් අන්සුවර් ජොකියෙක්දෝ කියලා හිතුන නිසාත් ගොඩයා කෝකටත් කියලා ඩොකාට කියැව්වා ඔය කියන දත් තුන මට පෙන්නහං සුදෝ කියල. ගොඩයා ලංකාවෙදි මුලටම කරපු ජොබ් එක ඔය දන්ත වෛද්‍ය උපකරණ අලුත්වැඩියා කරන එක නිසා ගොඩයාට කට ඇතුලේ වැඩ ඇහැට පුරුදුයි. ඒ කාලෙ ගොඩයා කටේ ඇක්ස් රේ ගන්න ඇක්ස් රේ මැශිනුත් අලුත්වැඩියා කරපු නිසා දත්වල ඇක්ස් රේ ත් ඇතිවෙන්න දැකලා පුරුදුයි. ඇක්ස් රේ යන්තරයක් අලුත්වැඩියා කරාම ඒක හරියට වැඩ කරනවද කියලා බලන්නෙත් දතක් ගලවන්න ආපු ලෙඩෙකුගේ දතක ඇක්ස් රේ එකක් අරගෙන නිසා එව්වා ගොඩයාට නුහුරු නුපුරුදු දේවල් නෙවෙයි. ඩොකා ගොඩයාට පෙන්නන පින්තූරු බැලුවාම ගොඩයාගෙ එක දතක් අම්බානෙකට පණුවෝ කාලා. පනුවෝ කනවා කියන ආදේශකය ලංකාවට පොදුවූ එකක් උනාට අන්තර්ජාතිකව සලකලා බැලුවාම ගොඩයාගෙ එක දතක් යටටම දිරලා. දත් තුනක් දිරලා කියලා ඩොකා කිව්වට ගොඩයාට ඇහෙන් පේන විදිහට ඉතුරු දත් දෙකෙ ලංකාවට යනකල් දුවන්න පුලුවනි. ඒ දත් දෙක යාන්තමට දිරන්න වගේ වගේ තිබ්බට ඇතුලට දිරන්න හිතලාවත් නෑ කියලා ඇක්ස් රේ එකෙන් පේනවා කියහංකෝ. ඒ කියන්නේ ඩොක්ට කොකෝ සැරසෙන්නේ මේ කොරෝනා කාලෙ ගොඩයාගෙ ක්‍රෙඩිට් කාර්ඩ් එකට විදින්න කියන එක සක්සුදක් සේ පැහැදිලියි. ඩොකා හැකි පමණින් උත්සහා කරනවා දත් ප්‍රවේසම් කරගන්නවා කියන්නෙ ආයෝජනයක්‍ නිසා දත් තුනම පුරවගන්න කියලා. දත් පුරවන්න ඒ ගාන යනවා කියලා දන්නවනම් ගොඩයා දත් සැට්එකම ගලෝලා ෆ්‍රිජ් එකේ දාලා කන වෙනාවට විතරක් දාගන්නවා අම්මපා. ඇයි යකෝ දත් තුනක් පුරවන්න ඩොලර් පන්දාස් පන්සීයක් කියන්නෙ සෙල්ලම් ගානක්ද.. 

ඩොකා එන්නෙ පන්දාස් පන්සීයකට අරින්න කියලා ගොඩයාට පැහැදිලියි. තියෙන්නෙ එක දතක කැක්කුමයි. අනෙක් දත් දෙකෙන් ලංකාවට යනකල් අදින්න බැරිවෙන්නෙත් නෑ. ඒ නිසා ගොඩයා ඩොකාගේ හිත කුඩු වෙන්න උත්තරේ දෙනව. 

මයි ඩියර් ඩොක්ටර්.. යූ ආර් අ ලයිෆ් සේවර්.. අන්ෆෝචුනේට්ලි දත් තුනම පුරවගන්න මගේ අතේ සල්ලි නෑ.. මොකද කියනවනම් කොරෝනා නිසා මගේ ජොබ් එකට කෙලවිලා ඉන්නෙ. ඒ නිසා අපි මේ මාසෙ මේ කකියන දත පුරවමු, ඊලඟ මාස දෙකේ අනික් දත් දෙක පුරවමු. නොකෙරෙන්න ඕන වැඩකට සල්ලි නෑ කියනවා තරම් වෙනත් විසඳුමක් මේ තුන් ලෝකෙම නෑ. සල්ලි නෑ කිව්වාම ආයෙ ඉතිං බලෙන් ගලවන්නයෑ දත්.

ඩොකා ගොඩයාට පට්ට ආදරෙයි කියලා ගොඩයාට දැනෙන්නෙ ආං ඒ වෙලාවෙ. තුන් පාරකට මේක කරොත් සන් තුන්පාරක් මට ඔයාට ඉන්ජෙක්ශන් ගහන්න වෙනවා. එතකොට ඔයාගෙ කටට ගොඩාක් උයිය වෙනව. ඔයා දැන් මේක එක පාරටම කරගත්තොත් ඔයාට උයියා වෙන්නෙ එක පාරයි.. එච්චර වෙලා නම කියලා ගොඩයාව ඇමතුව දොස්තර ගොයියා මේං ඒ ගමන ගොඩයාට සන් කියලත් කියනව කියහංකෝ.  එහෙව් ආදරනීය දොස්තර කෙනෙක් ලව්වා දතක් පුරවගන්න පින තියෙන්න ඕන ආයුබෝවන්ඩ.

  කන පැලෙන්න සිරි සිරි සද්දෙට බස් අජිත්ගෙ සිංදු අහගෙන පැය හතරක් පහක් කතරගම බස් එකේ එහා මෙහා ගිය ගොඩයාට ඉන්ජැක්සන් කට්ටකින් අනිනවා කියන්නේ කූඹියෙක් කන තරම්වත් දැනෙන දෙයක්ද හබෑට. බස්වල සද්දෙ ගොඩයාටනම් ඉන්ජෙක්ශන් කටු දාහකින් එකපාර කනට අනින තරම් වේදනයි. ලංකාවෙ රස්සාව කරද්දි ලෙඩ්ඩු දාස් ගානකගේ වැලමිට ලඟන් ලේ ගතපු ගොඩයාට ඉන්ජැක්සන් කට්ටකින් අනිනවා කියන්නේ නතිං කේස් එකක්. සමහර අලුත් නර්ස් නංකිලා ලෙඩ්ඩුන්ගෙ අතින් ලේ ගන්න කටුව ගහද්දිම ගොඩයා දන්නවා මේකි ඇන්නේ වැරදි තැනට, ඔතනින්නම් මිලි ලීටර පහක් ගැනිලි බොරු නංකි කියලා.. ඒ තරමට ගොඩයාට ඒ ජොබ් එකත් හුරුයි. ඉතිං ඩොකා කියන විදිහට කට ඇතුලට ඉජැක්ශන් එකක් ගහනවා කියන්නේ ඉතාමත් සුලු වේදනාවක් ගොඩයාටනම්.  ඒ වගේද ක්‍රෙඩිට් කාර්ඩ් එකට වැටෙන ඩොලර් පන්දාස් පන්සීයේ බිල. ඩොලර් පන්දාස් පන්සීයක් දීලා දත් තුනක් පුරවන්න යනවා කියලා අපේ තඩියා හෝ සමා දැනගත්තොත් අනිවා ඕකුන් දෙන්නගෙ පපුව නවතිනවා ශුවර්. කොහොමින් කොහොමහරි ඩොකා ගේම කරකවන්නේ ගොඩයාගෙ දත් සැට් එකම ගලෝගන්න කියන එක සිරිබර සිරි ලංකාවෙ අම්බලංගොඩ ඉපැදිලා දත්ගලවන්නම උපන් හපන් ඇනකොන්ඩලා එක්ක අවුරුදු තිස් ගානක් ජීවත් වෙච්ව ගොඩයාට අමුතුවෙන් පැහැදිලි කරන්න දෙයක් නෑ...

දැං මෙක දවස් තුනක් ලිව්වා බොලව්... තවත් ලියන්න බෑ.. ඩොකා දත පුරවපු හැටි ඊලඟ කොටසින් ලියන්නම්...