සයිඩ් බිස්නස්

ඔන්න මේ සිද්දිය සිද්දවුනේ දෙදහ දශකයේ මුල් භාගයේ. අම්බලංගොඩ කතා ලියන මං ඒ කාලේ ජීවිතේ ගැටගහගත්තේ ආණ්ඩුවේ පඩියෙන් සහ මගේ පුද්ගලික ව්‍යාපාරයෙන්. සතියේ දවස් පහ රැකියාව කරන අතරේ රාත්‍රී කාලය ව්‍යාපාරය වෙනුවෙන් වෙහෙසීමත් සති අන්තය සම්පූර්ණයෙන්ම ව්‍යාපාර කටයුතු වෙනුවෙන් තමා.. සමහර සතියේ දවස්වල රාත්‍රිය නොනිදාම පහුවදා රැකියාවට යාමට වෙන වෙලාවල් බොහොමයි. ඒ වෙලාවට සිහියට එන වැකිය තමා ත්‍රී වීල් වල පිටිපස්සේ අලවලා තියන "රුපියල් සත නිසාද අපිට මේ දුක " කියන කතාව. ඒ වගේ නිදි නොලැබූ රාත්‍රීන්ට පහුවදා සුපුරුදු තැපැල් දුම්රිය අමතක කරලා දාල සුකෝපභෝගී බස් රථයක නැගල නින්දක් ලබා ගැනීම සුපුරුදු දෙයක් වුනාට උදේ පාන්දර පහට බස් එකේ ඒසී එක අයිස් මිදෙන තරමට සීතලට දාගෙන ඉන්නේ බස් එකේ ඩ්‍රයිවරුයි කොන්දොස්තරයි රෑට මී හරක් මස් කාලද කියන එක අම්බලංගොඩයාට නම් අදටත් ප්‍රශ්නයක්. ඒත් ඉතින් තදින් නින්ද යන අවස්ථාවල බම්බලපිටියෙන් බහින්න ඕන අම්බලංගොඩයා බස් එකෙන් බහින්නේ පිටකොටුවේ බෝගහ ගාවදි කොන්දොස්තර තැන විසින් "පිටඔටුව බහින්න" කියන සද්දෙට ඇහැරුනායින් පස්සේ තමා. ලොක්කා ස්වේච්චාවෙන්ම රතු ඉර ගැසීමේ කාර්යය වෙලාවට කලාවට ඉටු කරන නිසා පිට කොටුවෙන් බැස්ස දවසට අහිංසක අසරණ අම්බලංගොඩයාගේ නිවාඩු භාගෙකට කණකොකා හඬන එක සාමාන්‍ය දෙයක්. මාසෙට ලැබෙන කෙටි නිවාඩු දෙක මාසේ මුලම ක්‍රියාවේ යොදවන නිසා ප්‍රමාදවී පැමිණීම සම්භන්ධව ආයතන නීති රීති වලට අනුව නිවාඩු භාගයක් අයකරගැනීම රජයේ චක්‍රලේඛ වලට අනුව සිද්දවෙන සාමාන්‍ය දෙයක්. අපරාදේ කියන්න බෑ අප්පා ලොකු මහත්තයත් ඒ මහත්තයාට කඩේ ගිහිපු දාබරේල දයානන්දලා ඉතින් ඔව්වයින් සෑහෙන්න වින්දනයක් ලැබුවා කීවොත් තමා නිවැරදි. ලොකු මහත්තයා කියල කට වචනෙට කිව්වට ඒ උදවිය ගාව තිබ්බ අල්පම ගුණය තමා ඉතින් මහතමා ගුණය.

ඔය නිවාඩු ගැන වැඩි දුරටත් යමක් ලියනවනම් මේ ලියන අම්බලංගොඩයා දෙදහස් එක අවුරුද්දේ ඔය  කියන දෙපාර්තමේන්තුවට රැකියාවට යනකම් ඒකෙ කාර්යමණ්ඩලය ආයතන නීති රෙගුලාසි ගැන මෙලෝ අවබෝධයක් නැතුවයි වැඩකරලා  තිබ්බේ. කොටින්ම කිව්වොත් මීට අවුරුදු දහස් ගානකට කලින් තිබ්බ වැඩවසම් යුගය වගේ එකක් තමා ඒ ගොඩනැගිල්ල ඇතුලේ ක්‍රියාත්මක වුනේ. රජයේ චක්‍රලේකය අනුව උදෑසන ප්‍රමාදවී රැකියාවට වාර්තා කිරීම සම්භන්ධයෙන් කපා හැරෙන නිවාඩු භාගය කපා හැරියාට අනතුරුව පැය හතරක සේවා මුරයකින් පසු සේවකයාට ගෙදර යන්න පුළුවන් කියල ඒකෙ හිටපු ලිං මැඩියන් දැනගත්තේ අම්බලංගොඩ හාදයා එතන රස්සාවට ගියායින් පස්සේ තමා. එතකම් සිදුවෙලා තිබ්බ ක්‍රමේ තමයි පරක්කු වෙලා ආවත් නිවාඩු භාගයක් දාල දවසම වැඩ කරන ක්‍රමය. එහෙම උනාම උදෑසන අටයි තිහට පස්සේ රැකියාවට වාර්තා කරන සේවකයා සවස හතරයි තිහ වෙනකම් සේවයේ යෙදෙන්නේ නිවාඩු භාගයකුත් අතින් දාලයි. අම්බලංගොඩ හාදයා එතනට ගිහින් ලිං මැඩියන්ට නීති රීති කියලා දීල ඇස් පෑදුවායින් අනතුරුව අටයි තිස් එකට වැඩට එන එකා දවල් දොළහයි තිස් එකට ඕෆ් වෙලා ගෙදර යන්න ගත්ත එකේ හිතේ අමාරුව ලොක්ක පිරිමහුවේ අම්බලංගොඩ එකාගෙන්ම තමා. කොටින්ම කියනවනං අම්බලන්ගොඩ එකා රතු ඉරට අහුවුනා කියන්නේ ලොක්කටත් දාබරෙටත් දයානන්දටත් දවසම සන්තෝසෙන් ගතකරගන්න ලැබෙන මහගු අවස්තාවක්. අවුරුද්දට නිවාඩු හැත්තෑවක් වගේ සුළු ගානක් ගන්න අම්බලංගොඩ එකා එයාලට දීපු සතුට සැනසීම ඇති මයේ හිතේ නිවන් දකින්න..හෙහ්.. වැඩේ කියන්නේ ආණ්ඩුවෙන් දීපු නිවාඩු හතලින් පහයි ඊට අමතරව වැටුප් රහිත නිවාඩු තිස් ගානකුයි දැම්මත් ලොක්ක නෙවේ අම්බලංගොඩයා ඉල්ලපු ස්ථාන මාරුව දිහා ඇහැක් ඇරලා බැලුවේ. වෙන ලොක්කෝ නම් වැඩට එන්නේ නැති එකා එලෝලා දානවා වුනත් මේ ලොක්ක එහෙම කැත වැඩ කරන කෙනෙක් නෙවෙයි. මොකද මේ ලොක්කට ඕනෑ යන්න නොදී තියාගෙන නොමරා මරන්න. වෙනත් විදිහකට කියනවනං ටොම් ඇන්ඩ් ජෙරී සෙල්ලම කරන්න. හැබැයි ඉතින් ලොක්කා අටවපු උගුල් එකකවත් පය නොතියා රස්සාව බේරාගෙන ඉදිරියට යන ස්ථානෝචිත අහවල් එක අම්බලංගොඩ හාදයාට උපතින්ම තිබ්බ බව ලොක්ක දැනගෙන ඉන්න නැතුව ඇති.

හැමදේටම පලිගන්න ලොක්කාට කරන්න පුළුවන්වුනු එකම දේ තමා අම්බලංගොඩයාගෙ වාර්ෂික වැටුප් වර්ධකය අනුමත නොකර මුකුත් නොලියා මේසය උඩ අවුරුද්දක් තියාගෙන ඉන්න එක.. ඒත් ඒකත් අම්බලන්ගොඩයාට වාසියක් වුනේ මෙහෙමයි. ආයතන පරිපාලන අංශය විසින් ලොක්කාගේ අනුමැතිය ඉල්ලලා එවන වැටුප් වර්ධක වෙනුවෙන් ලොක්කා අත්සන් තැබිය යුතුම නිසා එය නොමැතිව වැටුප් වර්ධකය වැටුපට  එකතු වන්නේ නැත. ඒත් අම්බලංගොඩයාට එරෙහිව ලිඛිත පැමිණිලි නොමැති නිසා ලොක්කාට එය අනුමත නොකර සිටින්නටත් නොහැකියි. ඒ වගේ වෙලාවට ලොක්කන් කරන දේ තමා ලියුම නොදැක්කා සේ මේසයේ ට්‍රේ එක උඩ සෑහෙන කාලයක් තියාගෙන සිටීම. කොයි තැනදීත් පුර පක්ෂය දිහා සුභවාදීව බලන අම්බලංගොඩයාට එයින් ලැබෙන වාසිය නම් අවසාන මොහොතේ ලොක්කා විසින් අනුමත කර යවන ලිපියෙන් අනතුරුව එතෙක් අයවිය යුතු සියලුම වැටුප් වර්ධක හිඟ මුදල් සමගම එක වතාවෙන්ම ලැබීම.. ටික ටික ලැබෙනවාට වඩා කොච්චර හොඳද බොලේ එකපාරට ලැබෙන එක. නිවාඩු සහ ලොක්කා ගැන නොලිය මේ පොස්ට් එක ලියන්න විදිහක් නැත්තේ අම්බලංගොඩ හාදයාට තමුන්ගේම කියල ව්‍යාපාරයක් ආරම්භ ඕන කියල හිතෙන්න තරම් බුද්ධිමය දායකත්වය සැපයුවේ ලොක්කාගෙන් සිද්දවුණු අඩම්තේට්ටම් වීම. එහෙම නොවෙන්න තාමත් අම්බලංගොඩයා සොච්චම් වැටුපක් අරගෙන මාස භාගයක් බඩගින්නේ ඉන්නවා වෙන්නත් පුළුවනි. එහෙමත් නැත්තම් කොහෙවත් යන ජඩකම්කු, බලුකම්, කුහකකම්  , අමනුස්සකම්, වලින් පිරිච්ච දෙකයි පනහේ ලොක්කෙකුගෙන් අඩම්තේට්ටම් විඳිනවා වෙන්නත් පුළුවනි. ඒ කෙසේ වෙතත් උගතුන් වූ පමණින් පරිපාලනමය සුදුසුකම් නැති උදවියගෙන් ආයතන සහ සේවකයින් පාලනය කරවීම ගැන අපේ රටේ පාලනාධිකාරිය තවදුරටත් සිතා බැලිය යුතුයි කියන එකයි අම්බලංගොඩයා ඒ ගැන දරන ආකල්පය. ඒත් ඉතින් විෂය අනුබද්ධ උපාධි සියල්ලම තියන ලෝකයේ සම්මත උසස්ම අද්යාපන සුදුසුකම් තියන ලොකු ලොකු උදවිය පාලනය කරන්න ඊට ඉහලින් ඉන්නේ අට පාස් නැති ඇමතිකෙනෙක් නිසා ආයතනයක් පාලනය කරන්න පරිපාලනමය සුදුසුකම් ඕනෙමත් නැතුව ඇති කියලත් අම්බලංගොඩයාට වෙලාවකට හිතෙනව. සේවකයාගේ දරු මල්ලන්ගේ බඩගින්න සහ හෙට දවස හිලව්වට තබා තම සේවකයා වහල් සේවයේ යෙදවීම  ගැන අම්බලංගොඩගේ නම් කිසිසේත්ම ප්‍රසාදයක් නැත.

මෙතෙක් වෙලා කැලේ පැනපු පොස්ට් එක හරි පාරට එන්නේ ඔන්න දැන්.. ඔන්න මේ කියන දවසට කලින් දවසේ අම්බලංගොඩයාගේ ඥාති ගෙදරක කොටහළු මගුලක්. එව්වා මහා ගොන් බූරු ගෝත්‍රික වැඩ වුනත් ඥාතියෙකුගේ හිත මිතුරෙකුගේ දේකට සියලු බර කරට අරගෙන වැඩ කටයුතු කරලා දෙන එක අම්බලංගොඩගේ සිරිත නිසා කොටහළු මගුල් ගෙදරට ශ්‍රමයෙන් සපයන දායකත්වයට අමතරව කේටරින් සේවාවෙන් ලැබෙන දායකත්වයත් සැපයුනේ අම්බලංගොඩගේ බොක්කේ යාළුවෙකුගෙන්. ඔන්න ඉතින් කොටහළු මගුලට පහුවදා සෙනසුරාදා දවසක් හින්ද අම්බලංගොඩයා ව්‍යාපාර ස්ථානයේ ඉන්න අතරේ ඥාති නිවසට දුරකථන ඇමතුමක් දුන්නේ වැඩ කටයුතු සියල්ල සාර්ථකව නිමවුනාද කියල සොයා බලන්නයි..

හලෝ..

ආ අයියේ  මම  _ _ _..

ආ මල්ලි මොකෝ උදේ මේ පැත්තේ ආවේ නැත්තේ.. අපි හිතුවේ එයි කියල..

එන්න විදිහක් නෑ අයියේ .. අද කඩේට හිරවුනානේ.. ඉතින් වැඩ ටික හොඳින් කෙරුණා නේද..

ඔව් මල්ලි.. ඔක්කොම හිතුවටත් වඩා හොඳට කෙරුණා..

ඉතින් අපේ කොල්ලන්ගේ ටෙන්ට් පුටු ඔක්කොම ගලවල ඉවරයිද..

අපෝ ඔව් මල්ලි.. ඊයේ රෑම එයාල ඔක්කොම ගලවගෙන ගියා..

ආ එහෙමද.. අද හෙට ඒවි සල්ලි අරන් යන්න.. අයියල කලබල වෙන්න ඕන නෑ.. සල්ලි පස්සේ දුන්නත් කමක් නෑ..

නෑ මල්ලි සල්ලි ඔක්කොම ඊයේ රෑම බේරුවා..

ආ එහෙමද.. එහෙනං ඉතින් ඔක්කොම හරිනේ..

ඔව් මල්ලි.. ඔක්කොම හරි.. ඒත්...

මොකෝ අයියේ අවුලක්ද..

ලොකු අවුලක් නෙවෙයි මල්ලි.. අරක්කු බෝතල් තුනක් ඉතුරුවුනා.. බාර් එකෙන් ආපහු ගන්න එකක් නැහැ නෙහ්..

බාර් එකෙන් නම් ගන්න එකක් නෑ අයියේ.. අපි අඳුරන්නේ නැහැනේ..

අපේ ගෙදරත් බොන්න කෙනෙක් නැහැනේ මල්ලි.. ඔයාලත් ඉතින් බොන්නේ නැහැනේ නේද..

(හොඳින් කන බොන එකෙක් වුනත් අම්බලංගොඩයා එහෙම ඥාති මිත්‍රාදීන් ඉන්න තැන්වල මොනම හේතුවකටවත් සුරාමේරය සිල්පදේ කඩන්නේ නැති  නිසා අම්බලංගොඩයලා හෙන සිල්වත් කොල්ලෝ කියලයි ඥාතීන්ගේ පිළිගැනීම .. ඊටත් අමතරව බිව්වාම සති ගානක් ගඳ එන එන මේ මල ජරාව අම්බලංගොඩයා කීයටවත් කටේ තියන්නේ නැති එක ඉස්සර හිටංම ප්‍රතිපත්තියක්..දැන් ඉතින් ගල් බලකායේ එවුන් අම්බලංගොඩයා එක්ක එල්ලෙයිද මන්ද..)

අනේ නෑ අයියේ.. මමනම් ඉතින් බොන්නේ නෑ අයිය  දන්නවනේ..

එහෙනම් ඉතින් මොනා කරන්නද මල්ලි.. බැරිද මල්ලි අපිට මේක කාටහරි විකුණගන්න..

(ලක්ස ගානක් වියදම් කරලා ගොන් බූරු මගුලක් කාල ඉතුරු වෙච්චි අරක්කු බෝතල් තුන කාට හරි බොන එකෙකුට නිකම් දීල දාපන් යකෝ කියල කියන්න හිතුනත් එහෙම කියන්නේ කොහොමද ඥාතියෙක්නේ )

බලමු අයියේ.. මම කාටහරි කියන්නම්කො..

ලොකු උදව්වක් මල්ලි.. 

එහෙනං ඔය බෝතල් තුන මට ගෙනත් දෙන්නකෝ..

හා මල්ලි.. මම අදම ගෙනත් දෙන්නං..

ඒ කාලේ අම්බලංගොඩයා අද එකා වගේ නෙවෙයි.. ඕනෑම කෙනෙකුට ඕනෑම උදව්වක් කරන්න දෙපාරක් හිතන්නේ නැති තරම්.. කොටින්ම කියනවනම් කාට හරි මැරෙන්න උදව්වක් ඉල්ලනවානම් මැරෙන්න ලේසිම ක්‍රමය හොයල දෙන්න තමා අම්බලංගොඩයාගේ ට්‍රයි එක. කව්රුහරි එල්ලිලා මැරෙන්න ඕන කියල කියනවනම් එලිලා මැරෙන්න හොඳම කඹය සහ එලිලා මැරෙන්න සුදුසු ගහක් කණුවක් වගේ දෙයක් හොයල දෙන්න තමා අම්බලංගොඩයාගේ උත්සාහය.. උදව්වක් නම් ඉතින් ඕනෑම කෙනෙකුට එකක් ඉල්ලුවාම එකට දෙකක් දෙන්න තමයි ට්‍රයි එක.. අන්න ඒ හින්ද තමා අම්බලන්ගොඩ කතා බ්ලොග් එකේ උඩින්ම තියෙන්නේ ලියන්න බැරි කතා දහසක් අතරේ ලියන්න පුළුවන් ටික විතරයි කියල ඕන්..මොකද හොඳම කතා සියල්ලම තියෙන්නේ ඒ ලියන්න බැරි ගොඩේ.. එව්වා ලිව්වත් අම්බලංගොඩයා අවුරුද්දකට සැරයක්වත් අම්බලංගොඩ ගිහිං බොරු.. දෙයියනේ කියල ගල්දූව ආරණ්‍ය සේනාසනයේ වැඩ ඉන්න අපේ විපුලඥාන ස්වාමින් වහන්සේ මතු බුදුවෙන්න අද වෙද්දී නම් අම්බලංගොඩයා ඒ ගොන්කම් කරන එක ස්තිරේටම නවත්තල අහවරයි.. ඒ පින ඉතින් අම්බලංගොඩයාව ආරණ්‍යයට ඇදගෙන ගිය අපේ සිරාටත් අනෙකුත් කල්‍යාන මිතුරන්ටත් සම සමව හිමියි..)

ඔන්න  අයියගේ කෝල් එක ඉවර වෙලා පැය භාගයක් යන්න කලින් ගල් බෝතල තුනත් ඔතාගෙන අයිය කඩේට වාර්තා කරා කියමුකෝ ..

මේන් මල්ලි බෝතල තුන..

හා අයියේ ඔහොම තියන්නකෝ.. මම කාටහරි දීල සල්ලි අරන් දෙන්නම්කො..

සල්ලිනම් ඉතින් හදිසියක් නැහැ මල්ලි.. කාටහරි දීල දාන්නකෝ..මම එහෙනම් ගිහින් එන්නම්කෝ..

අයියා ගල් බෝතල් තුනක් අම්බලංගොඩයා සමග තනිකර නික්ම ගිය වහා අම්බලංගොඩයා කල්පනා කරන්නේ කාටදෝ මේක විකුනන්නේ කියලයි.. නිකමට වෙළඳ ස්ථානයට එපිටින් තිබෙන ත්‍රිරෝද රථ ගාල බැලුවාම තමයි දැක්කේ අම්බලංගොඩයා ගල් බෝතල තුනෙන් ගලවගන්න පුළුවන් ගැලවුම් කාරයා තමන්ගේ ත්‍රිරෝද රථයේ වාඩි වෙලා හයර් එකක් මරාගන්න පාර දිහා බලන් ඉන්න වග..

චූටි  මල්ලී...

ඕ...

මෙහෙ එනවකො ටිකක්..

මොකෝ..

මොකද කියන්න මෙහෙට එනවකෝ..

චූටි  මල්ලී වෙළද ස්ථානය වෙත පැමිණියද ඒ ගත පමණය.. හිත සහ ඇස තිබෙන්නේ පාරේය.. ඒ හයර් එකක් කපා ගැනීම සඳහාය..

මොකෝ බං අයියේ..

පොඩි වැඩකට බං.. 

ඉතිං කියනවකෝ..

කියන්න උඹ සිහියෙන් අහගෙන ඉන්නෙපැයි ගොනෝ..

හරි.. ඉතින් කියනවකෝ.. වැඩිහිටි නිවාසේ දානයක් ඕයි.. දැන් දානේ ඉවර වෙන වෙලාව.. පොතේ හැටියට හයර් එකක් දෙකක් එන්න ඕනෙමයි..

හරි බං.. මේකත් උඹේ අතට ගානක් එන වැඩක්.. 

අන්න එහෙම කියනවකො.. මොකක්ද කෙරෙන්න ඕන..

ගල් බෝතයක් කීයද දැන්..

හත්සීයක් වෙයි..

හරි.. මා ගාව බෝතල් තුනක් තියෙනවා.. මට බාර් එකේ ගාන දීල ඕන ගානකට විකුනගන්නවා..

සිම්පල් කේස් එකක්නේ අයියේ.. රෑ වෙද්දී අපේ කට්ටිය පිස්සු බල්ලෝ වගේ බෝතල් හොයන්නේ..

හරි.. උඹට ගැනුම් කාරයෙක් ආවොත් කෝල් එකක් දීල එනවකො.. හැබැයි පුතේ බෝතලේ ඉල්ලන එකා මා ගාවට එක්ක එනවා නෙවෙයි හරිද..

හරි හරි බං අයියේ.. මම වැඩේ කරලා දෙන්නං..

ගනුදෙනුවේ අතරමැදියා හෙවත් අම්බලංගොඩයා සහ විකුණුම්කරු අතර වූ එකඟතාවය අනුව පසුවදා පොහොය දිනය වූ බැවින් දහවල පසුවී ඉර අවරට යන්නට මත්තෙන් බෝතල තුන මුදල් කර දීමට චූටි  මල්ලීට ගතවුයේ පැය කිහිපයක් පමණය. එදිනම පොහොය සඳ බැස යන්නට මත්තෙන් ගල් ගනුදෙනුවේ මුදල් ඥාතියාට බේරා දැමු නිසා අම්බලංගොඩයා එම ගනුදෙනුවෙන් සියයට සියයක්ම නිදහස් වෙනවාය.

ඉන් සති කිහිපයකට පසුව සුපුරුදු ආකාරයෙන් ඉර බැසගිය සොඳුරු සැන්දෑ යාමයක සිරාගේ  ගරාජයේ කැරම් බෝර්ඩ් එක වටේ වටවී සිටිනා අල්ලපනල්ලේ  අම්බලංගොඩගේ  මොටොරෝලාව මොරදෙනවාය..

ට්‍රීන් ... ට්‍රීන්... ට්‍රීන්...

හෙලෝ..

පුතා ඔයා කොහෙද ඉන්නේ...(  අමතන්නේ තාත්තාය)

ඇයි අහන්නේ.. මම  යාලුවෙකුගේ  ගෙදර ..

මේ කව්ද ළමයි වගයක් ඇවිත් ඔයාව හොයනවා..

කව්ද ඇවිත් ඉන්නේ.. මම දන්න කෙනෙක්ද..

අනේ මන්ද ළමයෝ.. මීට කලින් නම් දැකල නෑ.. 

ඉතින් එහෙනම් ෆෝන් එක දෙන්න බලන්න..

ඉන්නකෝ  එහෙනං.. 

මේ ළමයෝ.. මෙන්න කව්රුහරි එන්න ඇවිත් කතා කරන්න..

හලෝ.. මේ  _ _ _ අයියද..

ඔව්..

අයියේ අපිට ඔයාව ටිකක් හම්බෙන්න ඕන.. පොඩ්ඩකට ගෙදර ගාවට එන්න පුලුවන්ද..

මල්ලි ඔයා කව්ද.. ඇයි මාව හොයන්නේ.. 

ෆෝන් එකෙන් කියන්න බෑ අයියේ.. විනාඩි පහකට  ගෙදර ගාවට එන්නකෝ..

ඇයි මොකක්හරි වැදගත් වැඩක්ද.. ඔයා කව්ද..

මගේ නම කිව්වට ඔයා දන්නේ නෑ අයියේ.. පොඩ්ඩකට ගෙදර ගාවට එන්නකෝ..

හා ඉන්නවකෝ එහෙනම් මම විනාඩි දහයෙන් එන්නං..

සිරාගේ නිවසේ සිට මාගේ නිවසට විනාඩි දහයෙන් එන්නට පුළුවන් නිසා අම්බලංගොඩයා නිවස බලා ඉගිලෙන්නේ මේ ඇවිත් තිබෙන්නේ මොකාද කියා බලාගන්නා කුතුහලය නිසාය.. අම්බලංගොඩයා එහි යන විට තුන්සක රියක් ගේට්ටුව ගාව ගාල්කර නාඳුනන තරුණයින් තුන්දෙනෙක් පාරේ මග බලා සිටිනවාය..

අම්මෝ දෙයියෝ දැක්ක වගේ..

කව්ද ඔයාල.. ඇයි මාව හොයන්නේ..

අයිය අපිව අඳුනන්නේ නැහැ අයියේ.. අපි ආවේ පොඩි පණිවිඩයකට..

මොකක්ද මගෙන් කෙරෙන්න ඕන ඔයාලට..කියන්නකෝ බලන්න.. මම මේ කර කර හිටපු වැඩෙත් දාලයි ආවේ..

අයියේ මේ චූටි මල්ලි පණිවිඩයක් කිව්වා ඒකට ආවේ..

මොන චූටි මල්ලිද..

අයියලාගේ කඩේ ගාව ත්‍රීවිල් පාරක් එකේ චූටි මල්ලි..

හරි දැන් මොකක්ද මගෙන් කෙරෙන්න ඕන..

අද පෝය දවසේ අයියේ.. අපිට මේ පොඩි අවශ්‍යතාවයක්..

ඉතින් කියනවකො ඇඹරෙන්නේ නැතුව..

අද බාර් වහලනේ අයියේ.. අපිට ගල් බෝතලයක් ගන්න කියල ආවේ..

මොකක්.. ඔයාලාට පිස්සුද.. මා ගාව කොහෙද ගල් බෝතල්..

අයියේ අපිව අවිශ්වාස කරන්න එපා.. අපි පොලිසියට ඔත්තුව දෙන්න නැහැ.. අපිට බෝතලයක් දෙනවකො.. වැඩිපුර පන්සීයක් දෙන්නං..

ඔයාලට කව්ද  කිව්වේ මම  අරක්කු විකුනනවා කියල..

චූටි මල්ලි තමයි කිව්වේ.. 

කෝ දැන් චූටියා..

ඌ කතරගම ගිහින් අයියේ.. ඒ නිසයි පුලුවන්නං අයියව හම්බෙලා ගන්න කිව්වේ..

ඔයාලට වැරදීමක් වෙලා මල්ලිලා.. චූටියා කියන්න ඇත්තේ වෙන කෙනෙක් ගැන..

නෑ අයියේ.. චූටියා කිව්වේ ඔයා ගැනම තමයි.. අයිය පෝය දවසට විතරයි කිව්ව බඩු ගේන්නේ..

මල්ලිලා.. දැන් ඔයාල මෙතනින් යනවද.. ඔයාලට කොතන හරි වැරදීමක් වෙලා..මා ගාව ඇති අරක්කුවක් නැහැ හලෝ..

අනේ අයියේ එහෙම කරන්න එපා අයියේ.. අපි එහා ගමේ.. ඕනෙනම් චූටියට කෝල් එකක් ගහල අහන්නකො.. අපි ඉතින් බොක්ක තමා.. ආයේ මරල ඇහුවත් කියන්නේ නෑ නෑ නෑමයි..

මල්ලි.. මම ඔයාලට එක වතාවක් කිව්වනේ බන්.. ඔයාලට බැලු බැල්මට කියන්න පුලුවනිද මම අරක්කු බිස්නස් කරන කෙනෙක් කියල..

අද කාලේ මිනිස්සු පෙනුමෙන් පෙන්නන දේවල්ද අයියේ ඇතුලෙන් කරන්නේ... බොරුවක්අ වෙන්න බැහැනේ අයියේ චූටියනේ කිව්වේ..

මම ඌව අල්ලගන්නම්.. ඔයාල දැන් යන්න.. මා ගාව ඇති අරක්කුවක් නෑ මල්ලි..

එහෙමද.. අපිත් අල්ලගන්නම්කො චූටියව..

කැමති දෙයක් කරගනිල්ල..

තුන්සක රියේ පැමිණි තරුණ පිරිස නික්මගිය වහා ඊළඟ ප්‍රශ්න පත්‍රය තාත්තාගෙන්ය..

කව්ද ඒ ..

මේ දන්න එවුන් වගයක්..

දන්නා එවුන් නම් කෝල් එකක් දීල ඉන්න තැනකට එන්නේ නැතුව ගෙදරට ඇවිල්ල හොයන්නේ දන්නා කියන එවුන් වෙන්න බැහැනේ.. මොකටද ඇවිත් තියෙන්නේ..

හයර් එකක් යන්න වාහනයක් හොයන්න..

ඉතිං ඕකට ඔච්චර හොයන්න ඕනෙද..

උන් ඉල්ලන්නේ ඩ්‍රයිවර් නැතුව .. එහෙම දෙන්න බෑනේ..

හ්ම්...

ගණදෙවියන් පිහිටවුයෙන් ප්‍රශ්න පත්තරයෙන් ගැලවුනද අරක්කු ප්‍රශ්නයෙන් ගැලවෙන්නට  තිස්තුන් කෝටියක් දෙවියන් වැඩි වෙලාවක් අම්බලංගොඩයා වෙත චෑන්ස් එකක් දුන්නේ නැත..

ට්‍රී.......න්... ට්‍රී.........න්..

හෙලෝ..

ආ උඹ කොහෙද ඉන්නේ..

කව්ද කතා කරන්නේ..

මම මහින්ද..

මොකෝ මේ හදිසියේ.. මම ගෙදර බං..

මේ .. නෑ බෑ නොකිය මට බෝතලයක් ඕන මම තව ටිකකින් එනවා..

මොන බෝතලයක්ද..

ගල් බෝතලයක් බන් ගල් බෝතලයක්..

මා ළඟ කොහෙද බන් ගල් බෝතල්..

උඹ මට බොරුව දාන්න එන්න එපා හරිද.. අපි මේ බෝතලයක් ගහන ගමන් ඉන්නේ.. බඩු ඉවරයි.. ගිය පෝය දවසෙත් බඩු මදිවෙලා චූටි මල්ලි තමා ගෙනත් දුන්නේ.. අද ඌ කතරගම ගිහින්.. නෑ බෑ නොකිය බෝතලේ තියහන් කාටවත් දෙන්න එපා අපි දැන් එනවා ඔතනට..

උඹට විකාරද යකෝ.. උඹ හිතුවද මම හොර අරක්කු විකුනන්න පටන්ගත්ත කියල..

අනේ මේ බොරුව දාන්න එපා හොඳේ..අපි දන්නවා උඹ චූටි මල්ලි ලව්වා පෝය දවසට අරක්කු විකුනනවා කියල..

දැන් කව්ද බොට ඕක කිව්වේ..

වෙන කව්රුත් නෙවෙයි බන්.. චූටියා තමා කිව්වේ.. ඌ අද ගමේ නැති නිසා පුලුවන්නම් කෝල් කරලා ගනින් කිව්වේ..

මචන් මහින්ද .. චූටියා කතරගම ගිහින් එනකම් ඉවසිල්ලෙ හිටහන්කෝ.. මම ඕකගෙ ඔලුව ගලෝල අතට දෙනවා ආයේ මේ වගේ බලු කතා නොකියන්න..

දැන් එතකොට උඹ කියන්නේ උඹ අරක්කු වික්කේ නෑ..

පිස්සුද බන්..උඹ හිතනවද මම  අරක්කු විකුණලා සල්ලි හොයන්න යන්න තරම් බුරුවෙක් කියල..

එතකොට දැන් චූටි මල්ලි කියන්නේ බොරු..

න්........න්... නෑ නෑ.. ඒක බොරුවකුත් නෙවෙයි ඇත්තකුත් නෙවෙයි..
අන්න එකනේ මස්සිනා කියන්නේ.. බොරු නැතුව මට බෝතලයක් දීපං.. මම ගිය පෝය දවසෙ වගේම එක්දාස් දෙසීයක් එවන්නං..

මම උඹට කිව්වනේ බං මහින්ද.. මා ගාව කොහෙද  බන් අරක්කු..

දැන් උඹම කියනවා බොරුවක් නෙවෙයි කියල.. අනික් පැත්තට කියනවා අරක්කු නෑ කියල.. දැන් ඕකෙන් කොයි එකද කියහන් ඇත්ත..

දෙකම ඇත්ත..

ආයෙම කියනවා මගුලක්.. හරි.. උඹ දැන් ඕක අදිමදි කරන්නේ ගාන උස්සන්න වෙන්න ඇතිනේ.. හරි.. එක්දාස් පන්සීයක් දෙන්නං.. බෝතලයක් එවහන්.. මම කොල්ලෙක් එවනවා හරිද.. මම තිබ්බ..

හෝව් ..හෝව්.. ඔහොම හිටහන්.. හෙලෝ.. හෙලෝ.. 

දෙවැනි අරක්කු ගනුදෙනුව සිදුකිරීමට තව නොබෝ වෙලාවකින් බීගත් කනමදයෙක් මාගේ නිවසේ ගේට්ටුව ඉදිරිපිටට ප්‍රාදුර්භූත වන වගට එම දුරකථන ඇමතුමේ අවසානය අම්බලංගොඩයා වෙත සනිටුහන් කරන්නේය.. ඉන් අනතුරුව සිදුවන්නේ අරක්කු බෝතලය රැගෙන ඒමට එන දූතයා එනතුරු ගේට්ටුව ගාව මුර කිරීමටය. වැරදිලා හෝ මේ එන පුද්ගලයා තාත්තාගෙන් අරක්කු බෝතලයක් ඉල්ලුවහොත් තුන් වේලට නොමිලයේ ලැබෙන බත් පතට කණකොකා හඬනවාට අමතරව නොමිලයේ නිදාගැනීමට ලැබී තිබෙන සයනයද අහිමි වෙනවාය. ඊටත් අමතරව මොකක්දෝ අමුත්තක් දැනිලාදෝ තාත්තාද ඉස්තෝප්පුවේ වාඩිවී පත්තරය කියවනවාය.

විදුලි වේගයෙන් පැමිණි පල්සරයක් ගේට්ටුව ඉදිරිපිට නවත්වන්නේ එවෙලේ බ්‍රේක් පැඩලය දැක පෑගුවා වැනි හදිසියකින් වුවත් අම්බලංගොඩයා කලබල වන්නේ නැත්තේ ඒ ආවේ කව්ද කියා දන්නා නිසාය. එහෙත් පත්තරය බලමින් සිටිනා තාත්තා කණ්ණාඩියට උඩින් බලන්නේ ගේට්ටුව ඉදිරිපිට එකවරම නැවැත්වූ මෝටර් සයිකලයේ ශබ්දය ඒ තරම් යාලුමිත්‍රකමක් නොපෙන්වන නිසාය. පල්සරයේ පැමිණි අමුත්තා ගේට්ටුව ඇරගෙන වත්තට ඇතුල්වීමට මත්තෙන් අම්බලංගොඩයා පාරට පැනගන්නෙ කණමදයා ගෙමිදුලට ඇවිදින් ගල් බෝතලයක් ඉල්ලුවහොත් අම්බලංගොඩයාට වාසස්ථාන අහිමිවන අවදානම දැනෙන්නාවූ බැවින්ය..

අයියේ.. මෙන්න සල්ලි.. මහින්දයිය කිව්වා බෝතලේ එවන්න කියල..

හෙමින් හෙමින්.. හෙමින් කතා කරපං කොල්ලෝ..

හරි හරි.. සොරි වෙන්න ඕන.. අපි ඉතින් චිට්ටක් ගහල ඉන්නේ..කෝ ඕක දෙන්නකෝ..

මල්ලි.. මම විකුණන අරක්කුවක් නැහැ හලෝ.. මහින්දට කව්රුහරි ලනුවක් දීල..

එහෙම කරන්න එපා බං අයියේ.. අපි අඳුරන්නේ නැති මිනිස්සු නෙවෙයිනේ..

මම උඹව නොදන්න කෙනෙක් නෙවෙයිනේ මල්ලි.. කියන දේ විස්වාස කරනවකෝ.. මම විකුණන අරක්කුවක් නැහැ හලෝ.. 

පෝය දවසට බඩු විකුණන එවුන් ඔහොමමයි අයියේ.. අඳුරන අයට දෙන්නේ නැහැ ගාන අඩුවට දෙන්න වෙන නිසා.. අපි එක්දාස් පන්සීයක් දෙන්නම් හලෝ.. දෙනවකො බෝතලයක්..

හෙමින් කතා කරනවකෝ.. 

හෙමිං මොනවා කතා කරන්නද බං අයියේ.. ඔයා අපිට බොරුවනේ දාන්නේ..

බුදු මල්ලියේ.. උඹල මට ගෙදර බත් පිඟාන නැති කරන්නයි මේ හදන්නේ..

හරි බං අයියේ.. බෝතලේ දෙන්න.. අපි සල්ලි දුන්න ගියා.. ගෙදරට හොරෙන් හරි ඔයා කරන්නේ පට්ට බිස්නස් එකක් හරිද..

අනේ බුදු මල්ලියේ දැන් මෙතනින් යනවකෝ.. මා ගාව අරක්කු නැහැ බං..

බොරුව දාන්න එපා බං අයියේ.. චූටි මල්ලි ගිය පාරත් ඔයාගෙන් තමයි බඩු අරන් දුන්නේ.. ඉන්නවකෝ මම කෝල් එකක් ගහල දෙන්න ඔයාට..

කියන දේ අහනවකෝ.. ගිය වතාවේ චූටිය බෝතල් ගෙනිච්චේ මගෙන් තමයි.. ඒත් ඒක බිස්නස් එකට කරපු එකක් නෙවෙයි හලෝ..  මේ ඥාති ගෙදරක තිබ්බ මගුල් ගෙදරක ඉතුරු බෝතල් තුනක් මම චූටියට කිව්ව විකුණලා දියන් කියල.. ඒක තමයි ඔය ඌ ඔයාලාට ගෙනත් දුන්නේ..

එහෙම වෙන්න බැහැනේ බං අයියේ.. ඌ කිව්වනේ එක්දාස් දෙසීයක් කියනවා කියල ඔයා..

පිස්සුද බන් මල්ලි.. මම කිව්වේ බාර් එකේ ගානට දීපන් කියල..

එහෙමද.. ඒ කියන්නේ චූටියා අපෙන් ගාන කැපුවා.. ඔයා බොරු අයියේ කියන්නේ.. අපි දන්නවා ඔයා ගාව බඩු තියෙනවා කියල..

සත්තයි මා ගාව ඇති අරක්කුවක් නැහැ බන්..

මොකද ඔතන වෙන්නේ..

ගේට්ටුවෙන් එබීගෙන සංවාදය නරඹන්නේ තාත්තාය..වසලා හමාරය..

ඔයාල කව්ද.. මොනවද ඔයාලට ඕන..

න් නෑ අංකල් මේ.. මේ..

කියනවා ගොත ගහන්නේ නැතුව..

අපි මේ බෝතලයක් ගන්න කියල ආවේ..

බෝතලයක්.. මොන බෝතලයක්ද..

ගල් බෝතලයක් අංකල්..

මෙහෙ කොහෙද මිනිහෝ ගල් බෝතල්.. කව්ද කිව්වේ මෙහෙ අරක්කු විකුනනවා කියල..

චූටිය කිව්වේ අංකල්.. ත්‍රී වීල් පාර්ක් එකේ චූටියා..

ඊළඟට මා පියා හැරෙන්නේ මා දිහාවටය..

මොකක්ද මේ කතාව..

ගිය මාසේ රන්ජන් අයියලාගේ පාර්ටියේ බෝතල් තුනක්  ඉතුරු වෙලා චූටියා ලව්වා විකුණලා දුන්න තාත්තේ.. ඌ කියල මම අරක්කු විකුනනවා කියල..

හ්ම්.. ඔය ළමයි දැන් යන්න.. ඔය මෝටර් බයිසිකල් වල යද්දී ටිකක් හෙමින් යනවා..

මමත් හදිසි වැඩක හිටියේ.. මාත් ගිහින් එන්නම් තාත්තේ.. එක එක එවුන් මාව හොයාගෙන ආවට මට කෝල් දෙන්න එපා..

හා එහෙනම්. මම බෝතල් ටික විකුණලා තියන්නම්කො.. උඹ වරෙන්කො සල්ලි බේරගන්න රෑට ගෙදර.. අපොයි උඹ වගේ ගොනෙක්..


ඔන්න ඔහොමයි අම්බලංගොඩයා කරපු උදව් එලොව එලොවා පල දෙන්නේ. 

 සිරා ගැන ලියවෙච්ච පොස්ට්

http://ambalangodakatha.blogspot.com/2015/10/blog-post.html

http://ambalangodakatha.blogspot.com/2015/09/blog-post_21.html

රොබින් හුඩ්

ඒයි  ෂෙරිෆ් ඔහොම නැවතියන් .. ඔහොම නැවතියන් ..කිව්වම අහල ඔහොම නැවතියන් ..

රෝ...රෝ...ර්ර්ර්ර්ර් රෝ..බින් මල්ලියේ මොකෝ බන්..

මොකෝ බන්.. මම මේ උඹව හම්බවෙන්න බොලෑ  ගෙවල්  පැත්තේ යනගමo.. උඹව මගදී මුලිච්චි වෙච්චි එක හොඳා..

මෝ...මෝ.. මොකෝ ර්ර්ර්ර්ර්ර් රෝ..රෝ...බිo මල්ලියේ කාරනාව..

කාරනාව තමා බොගේ  දිව ඇදෙන්න බෙල්ල මිරිකන්න හිතිච්චි එක..

මෝ ..මෝ...මොකෑ ම...ම..මල්ලියේ...මේ මොන ගිනි විජ්ජුම්බරයක්ද..මම අහවල් එකක් කොලාටද උඹ මගේ බෙල්ල මිරිකන්න එලොවන්නේ.. ඉස්සර වගේ මගෙන් දැන් බොලාට කරදරයක් නෑනේ..

තෝ මොකද බොල  මගේ මැරියන් නගාට ෆේස් බුක් මැසේජ් එවන්නේ කියහන්..

අ ..ආ....අනේ බන් මා...මා..මල්ලියේ ෆේස් බුක් මැසේජ් එකක් එව්වේ ඉතින් දන්නාඳුනන කමටනේ..

දන්නාඳුනන කමට.. උඹෙයි මැරියන්ගෙයි තියන දන්නාඳුනනකම මොකක්ද කියහන් බලන්න..

ඉතින් බන් ඒ කාලේ හිටංම මැරියන් මම දන්නා කියන එකීනෙ.. ඉතින් ඕක බොට අමුතුවෙන් කියන්න ඕනෙයි මල්ලියේ..

මම දන්න  තරමින් මැරියන් නගාට බෝව දෑහැට පේන්න බෑ .. එහෙව් එකේ උඹ මොකද කියහන් මගේ මැරියන් නගාට කරදර කරන්නේ ෆේස් බුක් මැසේජ් එව  ඒවා..

ඉතිං  බන් බොලා මට තාමත් ෂෙරිෆ් කියල කිව්වට මම දැන් ෂෙරිෆ් නෙවෙයිනේ.. දැන් මැරියන් නගා මා එක්ක තරහ නැතුවෑති බන් රොබිo  මල්ලියේ..

අනේ පල නාකියා යන්න.. බෝ ඒ කාලේ මැරියන් නගාට කරපු කියපු දේවල් අපි නොදන්නවයි.. බොගේ හෙන්චයියො මරියන්ව කී වතාවක්නම් බොගේ වල්  බලකොටුවට උස්සන් යන්න තැනුවද .. බොට එක කරගන්න බැරිවුනේ මම නිසානේ ..

ඒ ....කාලේ එව්වා දැන් ඊරයි මල්ලියේ.. දැන් මම මේ යන්තම් සන්තම් පෙන්සොo පඩියෙන් ජීවත් වෙන මනුසය වෙච්චි ඔව්ව හිත්වල තියාගෙන පැහැව පැහැව ඉන්න එකේ තේරුම මොකෙයි බං ..

මට එව්වයින් වැඩක් නෑ .. තෝ ආයේ මගේ මැරියන් නගාට ෆේස්බුක් මැසේජ් එවල තිබුනොත් කොටනව ඇල්බියන් අසිපතෙන් බොගේ  බෙල්ල දෙකට වෙං වෙන්න දැනගනින්..

හැබෑටම ඒ කඩු  කොටේ තාම උඹ ගාව තියෙනවද මල්ලියේ.. ඇන්ටික්  කාරයෙක් අල්ලුවනම් ගානකට වික්කහැකි ඕනෙනං ..

නෑ  නෑ  ඕන නෑ  එක මා ගාව තියෙද්දෙන්..

මම මේ වීලුවට නෙවෙයි බං  රොබිo  මල්ලියේ කියන්නේ.. අපේ ගිස්බන්  දැන් ඇමති කෙනෙක් ගාව බොඩිගාර්ඩ් කෙනෙක් නෙව.. ඌට දැන් සරුයි.. ඔය නිදo එහෙමත් ගන්නවා කියල කසු කුසුවක් තියේ..බොට ඕනෙනම් මං  ගිස්බ එක්ක කතාකරලා බලන්නං ..

නෑ  නෑ  ඕන නෑ .. උඹ මගෙන් කුණුහබ්බ අහන්නේ නැතුව මගේ ගෑනිට ෆේස් බුක් මැසේජ් එවන්නේ නැතුව හිටියාම හොඳටෝම ඇති..

හිටහන් හිටහන්.. ඔය එන්නේ ගිස්බගෙ  ත්‍රී වීල් එක නේද.... ගිස්බෝ....න් .. ගිස්බෝ....න් ඔහොම පොඩ්ඩක් නවත්තහන් ...

රී......................න් ........කට් ..කට් ..කට් ..කට් ..කට් ..කට් ..කට් ..කට් ..කට් ..කට්

මොකෝ බං  ෂෙරිෆ් මේ මැරෙන්න හදන්නේ..

බලහං  බං ගිස්බෝ මෙන්න මූ මට කඩුවෙන් කොටනවා කියල තර්ජනය කරනවා බන්...පුලුවනිනම් පොඩි සත්තමක් දාල මූව  ටිකක් බයකරලා දියන් ..

මොකද බොලා දෙන්න රහසින් කුටු කුටු ගාන්නේ..මාව එල්ලන්නද බොලා දැන් මේ රහස් දොඩන්නේ..

අනේ නෑ බං රොබිo අයියේ.. මෙන්න මුගේ පිස්සු..

ගිස්බෝන්.. බොගේ ඉනේ තියන පිස්තොලෙ පෙන්නල මූව ටිකක් බය කරලා දියන්කෝ..

අනේ මේ ෂෙරිෆ්.. උඹ කියන කියන එවුන්ට කඩුවෙන් කොටලා මට මාසෙට දවස් පහළොවක් විතර ඉන්නෙ උසාවියේ .. තවනo උඹේ පවු වලට කර තියන්න බෑ..

අනේ මේ ගිස්බෝ.. උඹට මම කියල නැහැනේ එක එකාගේ ගෙවල් වලට පැනල උන්ගේ සල්ලි බාගේ අතගාගෙන යන්න කියල.. බොලා කරපු පවු වලට බොලා වගකියාගනිල්ල.. නැද්ද බං රොබිo මල්ලියේ..

උඹ මගෙන් කුණුහබ්බ නාහ හිටහන් ෂෙරිෆ්.. උඹ නිසා තමා මම උසාවි ගානේ ලගින්නේ.. නිකමට හිතහන් උඹ දැන් දෙයියනේ කියල පෙන්සොo පඩියක් අරගෙන ගෑනියි දරුවයි එක්ක තුන් වේල කාල ඉන්නව.. මට එහෙමද.. මාසෙට දවස් අටක් ඉහල උසාවියේ නඩු.. දවස් පහක් කම්කරු උසාවියේ නඩු.. ඉතුරු දවස්මේ ටිකේ මානව හිමිකo එකේ නඩු .. ඔක්කොම බොගේ පවු තමයි ඉතින්..

මේ මේ .. බෝලාගේ පරණ ගනුදෙනු පස්සෙ බෙරගනිල්ලකෝ.. ෂෙරිෆ් උඹ දැනගන් .. උඹ මීට පස්සේ මැරියන් නගාට ෆේස් බුක් මැසේජ් එවල තිබ්බොත් ඇල්බියන් අසිපත බොගේ බලල හරහා යාවි හොඳේ.. ගිස්බෝ මම මේ බොටත් එක්කයි කියන්නේ.. උඹ මුගේ උගුල් වල අහුවෙලා මාව නරක මිනිහ කියල නම් කියන්න එපා..උඹ දන්නවනේ මම කව්ද කියල..

අනේ නෑ බං  රොබිo  අයියේ.. උඹ දන්නවනේ මම දැන් ඕවට නෑ  බං .. මම මේ ඥානපාල ඇමතිතුමා ගාව රස්සාව කරලා ගන්න පඩිය මදි හින්දනේ  බන් හවසට හවසට හංදියට වෙලා මේ ත්‍රීවීල් කටුවේ හයර් එකක් දුවාගන්නේ..

ගිස්බෝ .. මුගේ කට වැඩියි බන්..ඇනපන්කෝ දෙකක් මූට ..

මොනාද බොලා දෙන්න ආයේ කුටු කුටු ගාන්නෙ කියහල්ල බලන්න..

අනේ මුකුත් බෑ බං රොබිo අයියේ.. 

ෂෙරිෆ්.. පිස්සු කියවන්න එපා බන්.. ඉස්සර කාලේ වගේ නෙවෙයි දැන්.. වටේම මිඩියා කාරයෝ.. උඹ කිව්ව පලියට මුගේ ඔලුවට තුවක්කුව තිබ්බොත් වටේ පිටේ ඉන්න එවුන් යසට මට විරුද්දව සාක්කි දෙයි.. උඹට ඕනෙනම නං මම ඥාන පාල ඇමතිතුමාට කියල සුදු වෑන් එකක් එවල මූව උස්සල දාන්නං .. හැබැයි ගානක් දෙන්න වෙයි..

අනේ මේ දුප්පත් මට කොහෙද බන් ඔව්වට දෙන්න සල්ලි.. ගෑනි මාව කන්න හදොනව වැහි දවසට වහල තෙමෙනවා කියල.. මට මේ ඒක හදාගන්නවත් තුට්ටු දෙකක් නැතුව බං ඉන්නේ..

මම බොට කියල තියනවනේ ෂෙරිෆ් තනිපංගලමේ හැන්දෑකොරේ එහෙ මෙහෙ යන්න එපා කියල.. උඹ කරපු කියපුවෑ හැටියට කොයි වෙලේ බොට කන්න වෙයිද දන්නේ නෑ.. බලහන් මේ දැනුත්  මේ උඹ තනියම ගිය නිසානේ මූ බොට පාර්ට් එක දාන්නේ..

බොලා දෙන්න මොනවද බොල කුටු කුටු ගාන්නේ..කියන දෙයක් මටත් ඇහෙන්න කියහන් බලන්න..

අනේ නෑ බං  රොබිo අයියේ.. මම මේ ෂෙරිෆ් උන්නැහේට කිව්වා වැඩකට නැති ලෙඩ දාගන්නේ නැතුව තියන දෙයක් කාල බීල ගෙදරට වෙලා ඉන්න කියල..

ඒක  තමයි බං  මාත් මේ කිව්වේ.. කොහෙද මුගේ වයසට නෙවෙයි වැඩ.. මූ අපේ මැරියන් නගාට ෆේස් බුක් මැසේජ් වගයක් එවල මට මාට්ටුයි.. ඒකයි මම මේ හොයාන ආවේ මුගේ බෙල්ල ගලෝල අතට දෙන්න කියල..

චී චී චී බොහොම කැතයි බොහොම කැතයි.. බලහං  ෂෙරිෆ් උඹේ වයසටද මේ කරලා තියන වැඩේ කියල..

අනේ බං ගිස්බෝන්.. උඹත් ඉතින් වලිගෙ පාගගන්නවනේ.. මම කියන දේ පොඩ්ඩක් හිතල බලහං .. මැරියනුත් දැන් දරු දෙන්නෙක්ගේ අම්මෙක් වෙච්චි.. මමත් දරුවෙක්ගේ තාත්තෙක් වෙච්චි.. දන්නා අඳුනන උදවිය වෙච්චි.. අපි ඔක්කොම හද්ද නාකි වෙච්චි ...මොකෝ බන් ෆේස් බුක් මැසේජ් එකක් එව්වම වෙන්නේ.. මොකෝ මම මැරියන් එක්ක පැනල යන්නද මේ නහින දෙහින කාලේ..

ඒ කතාවෙත් ඉතින් ඇත්තක් නැත්තෙම නැහැ තමා.. එව්වයින් කමක් නෑ .. මේ හැන්දකොරේ උඹ කොහේද ගියේ ගියහන් බලන්න..

අනේ බං  හවස් වෙද්දී ඇඟ  වෙවුලන්න ගන්නව මුකුත් බිව්වේ නැතිවුනාම.. අතේ සල්ලිත් නෑ.. ඔන්න ඔහේ ආතර්ගේ පොට් එකෙන් කසියා සුට්ටක් දාගෙන එන්න කියල ගියා බන්.. ඌ හොඳ එකා.. සල්ලි තුවුන නැතා මට බඩු දෙනවා පස්සේ ණය බේරනකල්..

අන්න බලහං බොලාට වෙච්චි දේ.. බොලා ඉස්සර වයින් වලින් නෑවේ නැති ටික ඉතරයි.. දැන් බොලාට කසියා ගහන්නත් වෙලා.. දැන් ඔව්වයින් මට වැඩක් නෑ.. මට වැඩ තියෙනව.. උඹ ආයේ මැරියන් නගාට ෆේස් බුක් මැසේජ් එවල තිවුනොත් මම බොගේ බෙල්ල ගලෝල අතට දෙනවා දැනගනින්..

මට විතරද බලහන් දැන් චා වෙලා ඉන්නේ.. දැන් උඹත් ඉස්පිරිතාලේ සිකුරිටි ජොබක් කරලනේ පවුල නඩත්තු කරන්නේ..මම  එක පාරක් කිව්වනේ.. මම මැරියන්ට ෆේස් බුක් මැසේජ්  එව්වේ කැත අදහසකින් නෙවෙයි ..

රොබිo  මල්ලියේ.. මගේ ඉවසීමේ සීමාවක් තියෙනවා දැනගනින්..

ඇයි  බොගේ ඉවසීම ඉවරවුනා කියල මාව එල්ලනද උඹ..

ඇයි උඹ බැහැයි කියලද හිතන්නේ..උඹ දැනගනින් නාකිය උනාට මම තමයි මේකේ හිටපු ෂෙරිෆ්..

අනේ දෙයියන්ගේ නාමෙට ඕක නවත්ත ගනිල්ලකෝ දෙන්නම..

මේ ගිස්බො .. බොගේ ඉනේ තියන පිස්තෝල කොටෙන් මුගේ ඔලුව කුඩු වෙන්න තියල දාන්න බැයිනo  උඹ මෙතනින් තොලොංචි වෙලා පලයන් කරුණාකරලා.. 

නවත්ත ගන්නවා තුන්දෙනාම.. මට මේ ආරංචි වෙලයි දුවගෙන ආවේ දරු දෙන්නව මාර්තක්කට බලාගන්න කියල..

මැරියන්.. ඔයා මෙහෙ...ඔයා මොකටද අනේ මෙතනට දුවන් ආවේ..

අනේ මේ රොබිo අයිය.... මගේ කට අවුස්සගන්නේ නැතුව ඉන්නවා හොඳයි..එලෝලු විකුණන රොසක්ක මට පයින්ඩේ දුන්නේ තුන්දෙනා එක්ක හන්දියේ මරාගන්ඩ හදනොව කියල.. මම මේ උය උයා හිටපු කුකුල්මස් වෑන්ජනෙත් ලිපෙo බාන්නේ නැතුව දුවන් ආවේ ආයේ කාටහරි කඩුවෙo  කෙටුවොත් ඇප දෙන්න උසාවි ගානේ බඩ ගාන්න වෙන්නේ මට හිංද .. ඔහේටත් කරන රස්සාවක් කරගෙන නිකං ඉන්න බැරි හැටි.. අද නයිට් එක නේද.. වැඩට යන්න තියෙද්දී නේද මේ එක එකා පස්සේ වැටිලා මරාගන්න යන්නේ..

අනේ මේ මැරියන්.. ඔයත් මගේ කට අවුස්සගන්නේ නැතුව හිටියනං හොඳා.. මම මේ නිකං  ආපු ගමනක් නෙවේ.. මේ වල් නාකියා ඔයාට ෆේස් බුක් මැසේජ් එව්ව  නිසයි මූව අල්ලගන්න කියල ආවේ...

අනේ හැබෑටම ඔයාටත් පිස්සුද අනේ.. මේ නාකිය මට ෆේස්බුක් මැසේජ් එව්ව කියල මම මු එක්ක පැනල යන්නද.. මේ එක ඇහැක් ලොකු එක ඇහැක් පොඩි නාකි උන්ද එක්ක මොකෝ මම ලවු කරන්නද අනේ..

ඒකනේ මැරියන් නගා මමත් කියන්නේ.. මේ රොබිo  මලයට පිස්සු..මැරියන් කැපෙන්නේ රොබිo මලයටම විතරයි කියල මටත් තේරුනේ පස්සෙන් පහු නේන්නං..

රොබිo  අයියා..අපි යං යන්න.. එහෙනං  ෂෙරිෆ් උන්නැහෙත් යන්න දැන් ආපු අතක් බලාගෙන.. ගිස්බොන් .. ඔයත් හංදියට ගිහින් හයර් එකක් දුවගත්තනම් හොඳයි එක එකාගේ සීනි කිරන්නේ නැතුව..

ෂෙරිෆ් උඹ අදට බේරුනා කියල හිතාගනිo .. උඹ ආයේ ෆේස්බුක් මැසේජ් එවල තිබ්බොත් මගේ මැරියන් නගාට මම තෝව තියන්නේ නෑ  දැනගනිo..

ඇයි  උඹ මට මොනවා කරන්නද.....

ගිස්බොන් .. බොට බැරිනම් දියන් මෙන්න මෙහෙට ඔය තුවක්කු කොටේ..මුගේ කට වැඩයි.. මූට දැන් මම දහ දොළොස් වතාවක් කිව්ව මට මැරියන් ගැන අදහසක් නෑ කියල.. අම්මපල්ල මූට තේරෙන්නේ නැති හැටි..

අනේ මේ ... ඇමතිතුමා මට මේක දීල තියෙන්නේ මගේ ජීවිතේ බේරගෙන ඇමති තුමාගේ විරුද්ද එවුන්ට පාර්ට් එක දාන්න මිසක් එක එකාගේ කුණු ෆේස් බුක් කේස් වලට පැටලෙන්න නෙවේ..

රෝබිනෝ බෝගේ කට වැඩියි.. මේ මැරියන් ඉන්න හින්ද මම බොට මුකුත් කරන්නේ නැහැ මෙතන..

ආ එහෙමද.. උඹ එහෙනo  ආයෙත් ෆේස්බුක් මැසේජ් එවල බලහංකො  මගේ ඇල්බියන් අසිපතෙන් බොගේ බෙල්ල දෙකට වෙන් වෙන හැටි..

ආ.. ආ.. ඇති ඇති.. යමු .. හ්ම්.. යමු...

ෂෙරිෆ් උඹ දැනගනින් අදට උඹ බේරුනේ මැරියන් නිසා කියල.. යමු මැරියන් නගා යන්න..

ඇයි අනේ ඔයා මේ කොහෙවත් ලෙඩ පටලගන්නේ.. ඔයා මේ නාකිය එක්ක මොන එහෙකට පැටලෙනවද මන්දා ..

කොහෙවත් යන ලෙඩ වෙන්නේ කොහොමද අනේ.. ඌ ඔයාට ෆේස්බුක් මැසේජ් එවන නිසානේ මේ සේරෝම ප්‍රශ්න..

ඒ නාකියා මට ෆේස්බුක් මැසේජ් එව්වා කියල මම ඌ එක්ක පැනල යන්නද අනේ.. ඔයාටත් විකාර ..

උගේ වෙලාවට අද ඇල්බියන් අසිපත මම ඉනේ ගහගෙන ආවේ නැත්තේ... මේ ඒක  නෙවෙයි මැරියන්.. ඔයා කුකුළු මස් කතාවක් කිව්වා වගේ මතකයි.. ගෙයි හරියේ සත පහක් තිබ්බේ නැතුව ඔය කොහෙන්ද අනේ කුකුළු මස් ගෙනාවේ..ඔයානo මාරයි..

මම ඔයාට කිව්වනේ ඔය සිකුරිටි රස්සාව කරලා අපිට ජීවත් වෙන්න බෑ කියල ඇහුවද ඇහුවද..

ඉතින්..මම වෙන මොනා කරන්නද අනේ.. මම දන්නේ දුන්නෙන් විදින්නයි කඩුවෙන් කොටන්නයි ඉතරයිනෙ.. ඉතිං අද කාලේ එව්වත් තහනං වෙච්චි මම සිකුරිටි රස්සාවක් කරනවා ඇරෙන්න වෙන මක් කරන්නද මැරියන්..

මම ඔයාට කිව්වා හර්න් කාරයගෙන් තියන දේපලක් ලියා ගන්න කියල පරක්කු නොවී.. කෝ ඇහුවද..ඇහුවද.... අන්තිමේ මොකද උනේ.. හර්න් කාරයත් මාගරට් අක්කගේ කසිප්පු පොට් එකට රිංගල රිංගල මාගරට්ගේ ලොකු එකී අරගෙන පැනල ගිහින් අන්තිමේ අං සෙට් එකත් කපල ඇන්ටික් කාරයෙකුට විකුණලයි නතර උනේ.. අද ඌත් සමුපකාරේ බඩු කිරනවා මාගරට්ගේ ලොකු එකීටයි දරු හතර දෙනාටයි කන්න දෙන්න..

ඉතින් හත් දෙයියනේ මේ කුකුළු මස් වෑන්ජනෙයි මේ විස්තරෙයි අතර තියෙන සම්බන්දෙ මොකෙයි..

හදිසියකට පිහිට වෙන්න හර්නුත් නැති එකේ.. ෂෙරිෆ්ලත් දැන් පිං පඩියෙන් ජීවත්වෙන තැනට වැටිච්චි එකේ ඔයාට ඔය කෙහෙල්මල් ඇල්බියන් අසිපතෙන් ඇති වැඩක් නැහැනේ..

අනේ එහෙම කිව්වට..

ඔය ඉතින් පනිනවනේ.. ඉන්නවකෝ වදේ කියල ඉවර වෙනකං .. මේ ඇල්බියන් අසිපත ගෙයි තියනකං ඔයා එක එකාගේ කුණු කේස් වලට ඕකෙන් කොටලා මම කී වතාවක්නං ඔයාට ඇප තියල එලියට ගත්ත කියල ඔයා දන්නවනේ..

ඉතිං ..

ඉතිං  කියන්නේ මනුස්සයෝ ඔය කෙහෙල්මල් ඇල්බියo අසිපතක් මෙට්ටෙ අස්සේ ගහo ඉඳල දැන් මේ වැටිච්චි ලෙඩත් ඕනෑවටත් වඩා වැඩි එකේ ..

ඉතිං ..

මම අල්බියo  අසිපත චන්දරයගේ යකඩ කඩේට විකුණලා දරු දෙන්නට කුකුළු මස් කෑල්ලක්  අරං ඇවිත් දුන්න.. 

ඔයානම් පුදුම ගෑනියෙක් මැරියන්.. මගේ පන වගේ රැකපු ඇල්බියන් අසිපත ඔයා යකඩ වලට වික්ක කිව්වාම මට පපුව වාවන්නේ නෑ මැරියන්.. කෝ එහෙනං දෙනවා මෙහෙට ඉතුරු සල්ලි ටික හිතේ අමාරුවට වැඩට යනගමන් බාර් එකෙන් ගල් කාලක්වත්  ක්‍රියා කරන්න..

කොහේ ඉතුරුද අනේ..ඉතුරු සල්ලි වලින් මම ඩේටා කාර්ඩ් එකක් දාගත්ත ෆේස්බුක් යන්න..

හුටා..

වීරයාගේ කතා වස්තුව

වීරයා  අපගේ පාසලට පැමිණෙන්නේ අම්බලන්ගොඩ නගරයට ඉතා ඈත වන්නි හත්පත්තුවේ ගම්මානයක පාසලක ඉගෙනුම ලබා හය වසර ශිෂ්‍යත්වය සමත් වීමෙන් අනතුරුවය. දුටු දනන් වශීකරනසුලු පෙනුමක් හිමි වීරයා  අප කාගේත් ගජ මිතුරෙකු වුයේ ඕනෑම කර්තව්‍යකට උරදී කටයුතු කරනා සුපිරි ගනයේ මිතුරෙකු වූ නිසාය. වදුරන්ගෙන්  බන අසා ජේතවනාරාමයට ගල් ගසා පැමිණි, කට්ට කපටි කෛරාටික වෙට්ට පිත්තල වර්ගයේ එකෙකු වූ වීරයා කාට හෝ රැවටුනා  කියා එතෙක් මෙතෙක් ඉතිහාසයට අප අසා නොමැත. සහෝදරයින් හත් දෙනෙකුගෙන් සමන්විත පවුලක බඩපිස්සා වූ වීරයා කුඩා කල සිටම දස්කම් දැක්වුයේ ව්‍යාපාර අංශයටමය. 

උපතින්ම දුටු මන වශීකරනා පියකරු මුහුණක් හිමි මා මිත්‍රයා අපගේ සියලුම මිතුරන්ගේ නිවෙස්වල වැඩිහිටියන්ගේද සිත් දිනාගත් පුද්ගලයකු වශයෙන් හැඳින්විය හැකිය. වීරයා  කොයිතරම් අවංකත්වය ප්‍රදර්ශනය කරනවාද යත්, අපගේ වැඩිහිටියන් තමුන්ගේ දරුවාට වඩා වීරයාව විශ්වාස කරනා තැනට විශ්වාසය ගොඩනැගීමට  සමත් වුයේ කිසිදු ආයාසයකින් තොරවමය. මට මගේ පියාගෙන් මලාට රවුමක් යන්නට ඉල්ලාගත නොහැකි යතුරු පැදිය ගමට ගොහින් එන්නට ඉල්ලාගැනීම වීරයාට සිම්පල් වැඩක්ය. තඩියාට මලාට රවුමක් යන්නට ඉල්ලාගත නොහැකි තඩියාගේ පියාගේ යතුරු පැදිය ගමට ගිහින් එන්නට ඉල්ලාගැනීම වීරයාට  කජු කනවා වාගේ වැඩක්ය.  බඩ තඩියාගේ නිවසේ ස්තිරේටම පදිංචිව සිට පාසල් පැමිණි වීරයා  බඩ තඩියාගේ නිවසේ සාමාජික ලයිස්තුවේ සාමාජිකත්වය දැරුවේ බඩ තඩියා මහතාටත් වාඩා ඉහල ස්ථානයකය. 

යහළු මිත්‍ර ඕනෑම නිවසකට අනවසරයෙන් ඇතුළුවී කුස්සියට පැන බත්පතක් බෙදාගෙන කෑමට වීරයාට කාගෙන්වත් අවසර උවමනා වුයේ නැත්තේ තමුන්ගේ දරුවාටත් වඩා විශ්වාසයක් වැඩිහිටියන් වීරයා කෙරෙහි තබා තිබු නිසාය. එවන් දෑ වෙනුවෙන් තබා තිබු විශ්වාසයේ ගෞරවය වීරයාගෙන්  එම නිවැසියන්ට පෙරලා ලැබෙන්නේ මගුලක් මරණයක් දානයක් වැනි කටයුත්තකදීය. නිවසියන්ටත් වඩා බරක් කරට අරන් කරනා වර්ගයේ මිතුරෙකු වූ වීරයා මරණය, මගුල හෝ දානය ඉවරයක්ම වනතුරු තම බුද්ධිමය සහ ශ්‍රම දායකත්වය සපයන්නට දෙවරක් සිතන්නේ නොමැතිය. එවන් ආකාරයෙන් සීග්‍රයෙන් ලකුණු රැස්කරනා වර්ගයේ මිත්‍රයකු වූ වීරයාගේ ලකුණු මට්ටමට ලඟා වීමටවත් අපට කාටත්  එතෙක් මෙතෙක් හැකිවුයේ නම් නැති.

කුඩා වියේ පටන්ම මුදල් ඉපයීමට සහජ සමත්කමක් දැක්වූ වීරයා බංකොලොත් ව්‍යාපාර වලට නම් එතෙක් මෙතෙක් අත ගසා නොමැතිය. මිතුරෙකුගේ ඕනෑම බෙල්ල ගහලා යන කර්තව්‍යක්  වෙනුවෙන් ඉදිරිපත්වනා වර්ගයේ පපුව හොඳ මිතුරෙකු වන වීරයා අතින් පාඩු කරගත්තා නම් ඒ මිත්‍රත්වය සඳහා පමණමය. අද වෙද්දී නැතත් එකල නම් වීරයා ඕනෑම අවදානම් කාර්යක් වෙනුවෙන් ඉදිරිපත් වීමට දෙවරක් සිතන්නේ නැත. විද්‍යාලයේ කැඩෙට් භටයකු වීරයා එක වරක් පිට ගමකදී නොදන්නා නාඳුනන මල සිරුරක් ළිඳකින් ගොඩට ගැනීමට ලිඳට බැස්සේ එම ගමේ කිසිවෙකුත් එම කාර්ය වෙනුවෙන් ඉදිරිපත් වීමට අකමැතිවූ නිසාය. එවන් හොඳ හදවතක් තිබු වීරයා මිතුරන්ගේ පෙම් පලහිලව් වෙනුවෙන් වැඩිහිටියන්ට දෙසූ මුසාවාද කොයිතරම්ද යත් වීරයාගේ විශ්වාසය උකසට තබා තම මිතුරා බේරාගැනීමට ඉදිරිපතුවූ වාර ගණන් අනන්තය.

වීරයාට තිබු අපට නොතිබූ පහසුකම් වලින් කිහිපයක් නම් වීරයාගේ ගමත් අපගේ නගරයත් අතර ගනුදෙනුවන ව්‍යාපාර වෙනුවෙන් අතරමැදිව කටයුතු කිරීමේ පහසුකමයි. එක්තරා කාලයක අපගේ හිතාදර තඩියාට යම් මුදල් අවශ්‍යතාවයක් වෙනුවෙන් වීරයා විසින් ඉදිරිපත් කල ව්‍යාපාර යෝජනාවලිය වුයේ කුරුඳු දර ඕඩරයක් ගෙන එය ලබා දී මුදල් ලබාගැනීමයි. අපගේ තඩියාගේ පෙම් පලහිලව්වට වැඩිහිටියන් කිසිදු යහපත් ප්‍රතිචාරයක් නොදැක්වූ නිසා තම පෙම්වතියගේ උපන්දිනය වැනි විශේෂිත දින ලංවෙද්දි තඩියා හේබාන්නේ පෙම්වතියට යහමින් තෑග්ගක් රැගෙන දීමට මුදලක් දෙමාපියන්ගෙන් ලබාගැනීම උගහට බැවින්ය. එවන් අවස්තාවන්හිදී වීරයා දෙවියෙකු වන්නේ ණයට ගැනීමට හෝ වෙනයක් ක්‍රමයකින් හෝ එම මුදල් අවශ්‍යතාවය පියවා ගැනීමට හැකි මිහිපිට ඉන්නා  එකම දෙවියා වීරයා නිසාය. තඩියා විසින් මා සමග පැවසු පරිදි දර ගනුදෙනුවේ සිද්දිය මෙසේය..

ගම වටේ ඇවිද නගරය වටේ ඇවිද කුරුදු දර ඕඩරයක් සොයාගන්නේ තඩියා වන අතර අදාළ දිනයේ පැවැත්වෙන මංගල උත්සවයක් වෙනුවෙන් කුරුදු දර සැපයීම ඕඩරය බාර වන්නේ වීරයාටය. වීරයාගේ අම්මාගේ බාල සහෝදරයා ඉඩම් හිමි වෙළඳ ව්‍යාපාර හිමි පුද්ගලයකු නිසා වීරයා මාමාගෙන් ලෑන් මාස්ටරය ඉල්ලාගෙන එන්නේ යාලුවෙකුගේ වැඩකට උදව්වක් කරන්නට කියාය. වීරයා ලෑන අරන් යන්නේ දර ඕඩරයක් පැටවීමට බව මාමා දන්නේ නැතිලුය. මාමාගේ හිත හොඳ කමෙනුත් වීරයාගේ කපටි මොලයෙනුත් වාසි ලබන දර ඕඩරය ලෑනට පැටවෙන්නේ වීරයාගේ ගමට දුරින් පිහිටි ග්‍රාමයකින්ලුය. එසේ පැටවෙන දර ඕඩරය බාන්නේ කුලරත්න විද්‍යාලය අවට නිවසකටලුය. සත පනහකට මිලදී ගන්නා ලද දර කෝට්ටක් මගුල් ගෙදරට බාන්නේ රුපියක් දෙකකටලුය. අවශ්‍ය දර ප්‍රමාණය ලෑනට පටවාගත් වීරයා සහ තඩියා දැන් එන්නේ මගුල් ගෙදර වෙත දර ටික වහා විකුණා මුදල් අවශ්යතාවය සපුරාගැනීමේ පරම පිවිතුරු බලාපොරෝත්තුවෙන්ලුය. එහෙත් දෙදෙනාගේම නොදන්නාකමට ලෑන පුරවා පටවනා ලද දර ප්‍රමාණය රැගෙන ලෑන කුලරත්න විද්‍යාලය අසල කන්ද නගින්නේ නැතිලුය. පොල්වත්ත හන්දියට බටපොල පැත්තට වන්නට තිබෙනා හන්දියෙන් වමට හැරී කුලරත්න විද්‍යාලයට යන මාර්ගය එකල තාර දමා තිබුනේ නැතිලුය. වැසි සහිත දිනකට පසුදා වූ මේ කියනා දිනයේ පාර මඩ සහිත වූ බැවින් ඇතෙක් බරට දර ගොඩගසා තිබෙනා ලෑන කන්දේ මද දුරක් ගොස් ඉදිරිපස රෝද දෙක එක තැන කැරකෙමින් දඟලනවා විනා කන්ද නගින්නේම නැතිලුය. වීරයා දක්ෂ ලෑන් මාස්ටර් රියදුරෙකුගේ පෙනුමක් විද්‍යාමාන කරමින් හැන්ඩලය දැඩිව අල්ලාගෙන කන්ද තරණය කරන්නට යක්ස ගැම්මක් ගන්නවාලුය. අලියෙකුටත් මදක් විශාල ශරීරයක් හිමි තඩියා ලෑන පසුපසින් තල්ලු කරනවා වුවද ලෑන යන්නේ කන්දේ මගක් පමනලුය. එතනින් එහා ලෑන පොලොව හානවා විනා අඟලක්වත් හෙලවෙන්නේ නැතිලුය. 

අහලපහල නිවෙස්වල ඉන්න උදවියද, පාරේ යන එන්නාවූ උදවියද සාමුහිකව තල්ලුවක් දමා ලෑන කන්ද උඩට යවන්නට උත්සහ කලද ඇතෙක් බරට දර ගොඩගසා ඇති ලෑන කන්ද තරණය කරන්නේම නැතිලුය.

ඕක හරියන්නේ නැහැ කොල්ලනේ.. ඔය දර භාගයක් බාල ඉවරවෙලා උඩහට ගිහින් ඒ කොටහ උඩින් බාල ඇවිත් මේ ටික අරන් ගියානම් ඉවරනේ..

එහෙම කිව්වේ අහල පහලින් උදව්වට ආ වයසක උන්දෙක්ලුය..

අයියෝ මාමේ මේක බාල පටවන්න ආයේ පැයක් දෙකක් යනවනේ.. කොහොම හරි උඩට නග්ගන්න  බලමු..

වීරයාගේ රියදුරු කුසලතාවය සහ පණ්ඩිතකම ඒ වයසක උන්දෑට යටවුයේ නැතිලුය.. 

අපි ටික දුරක් පස්සට ගිහින් පුළුවන් තරම් වේගෙන් ඇවිත් කන්ද නග්ගමු.. එහෙම කිව්වේ වීරයාලුය..

නග්ගයි උඹේ... මම කියන්නේ  නෑ... ඇටෙන් පොත්තෙන් එන්න කලින් මුන්ගේ පණ්ඩිතකම..

තඩියාටත් උවමනා දර ටික විකුණා පන වන් පෙම්වතියට තෑග්ග අරන් දීමේ කාර්ය ඉටුකිරීමට බැවින් තඩියාට කන්ද මුදුනින් පෙනෙන්නේ තම පෙම්වතියගේ මුහුනමලුය.. ලෑන ඉගිලිලා ගියත් තඩියාට උවමනා දර ටික ඉක්මනින් විකුණා දමා මුදල් කොටහ ලබාගැනිමටලුය.

වීරයාගේ සැලසුම  " ද බ්‍රිජ් ඔෆ් ද රිවර් ක්වායි" චිත්‍රපටයේ දුම්රිය, අබලන් පාලම තරණය කළා සේ හැකි තරම් පසුපසට ගොස් ලෑනට  උපරිම ත්වරණයක් ලබාදී කන්ද තරණය කිරීමටලුය..

සැලසුමට අනුව වීරයා ලෑන හැකි පමණ පසුපසට ගත්තාලුය. දැන් තිබෙන්නේ ඉහත කී චිත්‍රපටයේ ආකාරයෙන් හැකි උපරිම වේගයෙන් පැමිණ කන්ද තරණය කිරීමලුය.. ඇතෙක් බරට දර පටවාගත් ලෑනක් මහා කඳු රාජයා තරණය කිරීමේ තරඟ ඉසව්ව නැරඹීමට ගමේ සිටිනා බහුතරයක් බාල මහලු තරුණ පිරිස් එක්රැස් වෙලාලුය. අවුරුදු උත්සවයේ ගම හරහා දුවන තරගය බලන්නට වටවන සෙනගක් වාගේ ගමෙන් භාගයක් ලෑන කන්ද නගින හැටි බලන්නට අවිල්ලාලුය. පාර දෙපැත්තේ තිබෙනා කඳු කොටසේ උඩට නැගගත් ගැහැණු උදවිය තම දරුවන්ගේ අත් වලින් අල්ලාගෙන ඔවුන්ගේ ආරක්ෂාව තරකරලාලුය. වැඩිහිටි පිරිමිද පාරෙන් මදක් ඉවතට වී සිටින්නේ තමුන්ගේ ආරක්ෂාව සලසාගැනීම අරමුනේන්මලුය.

කළු දුම් වලාවක් විදුවාගෙන මහා හඬක් නංවමින් කන්ද දෙසට ඉගිලෙන්නාවූ ලෑනේ රියදුරු අසුන අරා විරාජමාන වූ වීරයා ඉන්නේ දත් විකාගෙන හැන්ඩලය තදින් අල්ලාගෙන කන්ද දිහා ඇස් ලොකු කරමින් බලාගෙනලුය.. වීරයා කන්ද තරණය කිරීමේ තරඟ ඉසව්ව ඇරඹු වහා ගමේ උදවිය ජය ගෝෂා කරන්නට පටන් ගත්තාලුය. විදුලි වේගයෙන් පැමිණි ලෑන කන්ද මැද තිබෙනා වල ගොඩැලි වලින් උඩ විසික් වෙමින් මද දුරක් යනවාත් එක්කම වේගය සහ ගැස්සීම දරාගත නොහැකි වූ වීරයා අතින් ලෑනේ හන්ඩලය අත්හැරෙන්නේ සංසාර කරුමයකටලුය. එතෙක් වෙලා වීරයාගෙන් ගැහැට ලැබූ ලෑන නිදහසේ මද දුරක් ගොස් වීරයාවද ඉවතට විසික් කර දමා උඩු යටිකුරු වෙන්නටම කරණමක් ගසන්නේ වීරයාගේ මාමාගේ සාක්කුවට මොනර කොළ බොහෝ ගානක් පාඩු කරමින්ලුය. මඩ ගොඩක් වූ පාර මැද්දාවේ  උඩුකුරුඥ්ඥo වුනා වූ ලෑන, පසුපස පටවා තිබෙන දර වල බර නිසා නැවත කන්ද පාමුලටම මඩ කාගෙන රූටාගෙන යද්දී මඩ ගොඩේ පෙරලුනු වීරයාද ලෑන පසුපසින් කන්ද පහලට දිව ආවත් ලෑන නැවතුනේ කන්ද පාමුලටම අවිල්ලාලුය. ඒ අල්ලපනල්ලේ මහා කඳු තරණය නරඹමින් සිටි ජනී ජනයා හිස් ලුලූ අත දිවගියේ ලෑනේ එන්ජිම ඔලුව පහලට හිටිමින්ද කළු දුම් වලාවක් විහිදුවමින් මර හඬ තලන්නට වූ  නිසාලුය. මඩ නාගත් වීරයා කළුදුම් වලාව මැදින් ලෑන වෙත ලංවී එංජින් මෝල නිහඩ කල නිසා ගමේ එවුන් එකා දෙන්නා නැවතත් උඩුකුරුඥ්ඥo වූ ලෑන අසලට වාර්තා කළේලු.

සියල්ල අවසන ලෑන කෙලින් හිටුවා දර වලින් අඩක් බා දමා වාර දෙකකදී කන්ද තරණය කරන්නට වීරයාටත් තඩියාත් සිදුවුනිලු.. ඔලුව පහලට වන්නටම පෙරලුනු ලෑන නැවතත් එසේම ධාවනය කරන ලද කුසලයේ ආනිසංස වීරයාගේ මාමාට විඳගැනීමට සිදුවුයේ පෙරලීමෙන්ව ඉවතට ගලාගිය ලිහිසි තෙල් නැවත පුරවන්නේ නැතිව ලෑන ධාවනය කල නිසාලුය. බෑනාගේ කඳු තරණය කිරීමේ වික්‍රමයට පිංසිදුවන්නට වීරයාගේ මාමාට ලෑනේ එංජින් මෝල සම්පුර්ණයෙන්ම අලුත්වැඩියා කරන්නට වුයෙලු.

ඊළඟට වෙදිකාවට් ගෙන එන්නේ රෝඩ් මාස්ටරයේ කථාවය.. මාමගේ ලෑනට කන කොකා හැඩවු වීරයා ඊළඟට ඇහැ ගැහුවේ මාමා විසින් අනර්ග අයුරින්ම නඩත්තු කරනා ලද මාමගේ ප්‍රාණ හා සමාන වූ හොන්ඩා සී ඩී වන් එයිටි ෆයිව් රෝඩ් මාස්ටර් යතුරු පැදියටය. ගාම්බීර ශබ්දයක් හිමි රෝඩ් මාස්ටරය, දුටු දන මන බඳිනා අනර්ග මෝටර් සයිකලයක් වන අතර ඒවා බොහොම විරල ගනයේ යතුරු පැදි විශේෂයක්ය. වීරයාගේ මාමාට වීරයාට වඩා උස මහත්වූ පුතුන් දෙදෙනෙකු සිටියත් ඔවුන්ටවත් අල්ලන්නට නොදෙනා රෝඩ් මාස්ටරය පැයකට දෙකකට නොව දිනකට දෙකකට වුවද ඉල්ලා ගැනීම වීරයාට කජු කනවා වාගේ වැඩක්ය. උපතින් උරුම වූ බේබි ෆේස් මුහුණත් බැනුම් ඇසුවාට ඇඟේ නොඇලෙන ගතියත් නිසා බැනුම් ලොරියක් අසා හෝ අවශ්‍යතාවය ඉෂ්ටකර ගැනීම වීරයාගේ සිරිතය.

වීරයා දිනෙන් දින මාමාගේ රෝඩ් මාස්ටරය උගේම කරගත් අතර වෙනදා ලංගම බස් රථයෙන් පැමිණි වීරයා රෝඩ් මාස්ටරයෙන් පැමිණීම අපට නුහුරු දර්ශනයක් වුයේ නැති. එකල වීරයාට රියදුරු බලපත්‍රයක් තිබුනාද නැතිද යන්න මාගේ මතකයේ හරි හැටි සඳහන්ව නැතත් වීරයායා රෝඩ් මාස්ටරයෙන් නොගිය තැනක්ද නැත්තේය. බඩ තඩියාගේ නිවසේ යාවජීව සාමාජිකත්වය දැරුවද එවන්ම සාමාජිකත්වයක් තඩියාගේ නිවසෙත් මාගේ නිවසෙත් (මාගේ කිව්වට තාත්තගේ යකඩෝ ) හිමිව තිබු වීරයා දින කිහිපයක් එක නිවසකත් තවත් දින කිහිපයක් තවත් නිවසකත් විසීම පුරුද්දක් ලෙස කරගෙන ගියා වූ අතර සමහරක් දිනවල නිවෙස් තුනේම වීරයාට රාත්‍රී බත් පත සුදානම්ව තිබුනත් වීරයායා නිවෙස් තුනෙන්ම අතුරුදන් වන දින නැතිවුනාම නොවේය.

මාගේ ඇඳ අසල සවිකර තිබුනා වූ දුරකතනයෙන් මහත් පල මහත් ආනිසංස නෙලාගත් පුද්ගලයෙකු ඇතිනම් ඒ වීරයා පමණක්මය. කලක පටන් දත කෑ පෙම් පලහිලව්වක් මාගේ දුරකතනයට පින්සිදුවන්නට සෙන්ටිමෙන්ටල් කරගත් වීරයා මල් කැඩීම ජයටම කරගෙන ගියේ මාගේ නිවසේ දුරකථනය පැය ගණන් කාර්යබහුල කරමිනි. මේ කියනා දිනවල මේ කියනා මාගේ දුරකථනය පැය ගණනින් කාර්යබහුල වන්නේ වීරයාගේ ජන්ගමයේ බැටරිය බැස තිබෙන්නාවූ කාල වෙලාවේදී පමණය. වත්තේ කොනක තිබෙනා ගල් තලාවක් උඩට වී ජංගම දුරකතනයේ බැටරිය බිමටම බසිනා තුරු මල් කඩනා වීරයා නැවත ජංගමයේ බැටරිය ආරෝපණය වනතුරු මාගේ නිවසේ දුරකතනයෙන් මල් කැඩීම අඛණ්ඩව කරගෙන ගියේය. මේ කියනා කාලයේ මාගේ වාහනයෙන් උපරිමයටම වැඩ ගත්තා වූ අයකු ඇතිනම් ඒ වීරයාමය. රෝඩ් මාස්ටරය මාගේ නිවසේ ගාල් කරනා වීරයා මාගේ රථය රැගෙන වාෂ්ප වන අතර නැවත නිවසට පැමිණි වහා කරන්නේ නැවතත් මල් ගසට ගොඩ වීමය.

ඉඳ හිටෙක දිනෙක උපන් ගමේ උපන් නිවසේ රැය පහන් කරනා වීරයා මාසයෙන් වැඩි කාලයක් ගත කලේ අප තිදෙනාගෙන් එකෙකුගේ නිවසේ වුවත් මේ කියනා දින වීරයා උපන් ගමේ උපන් නිවසේ රැය පහන් කල දිනයකි. උදේ පාන්දරක උදෑසන හය වෙන්නටත් ප්‍රථමයෙන් මාගේ යහන් ගබඩාවේ ජනේලයට තඩි බාන්නේ මොකාදැයි බලන්නට මා ඇහැරෙන්නේ මල අසූ හාරදාහට පැනලාය. සෙනසුරාදාවක් වූ දිනයේ මදක් සැනසිල්ලේ දහවල් වනතුරු නිදාගැනීමට ලැබෙන අල්ලපනල්ලේ උදේ පාන්දර නින්ද කඩන එකාව අමුවෙන් කෑවත් උයලා කෑවත් හිතට මදිය.

දොර ඇරපන්..... ඉක්මනට දොර ඇරපන්කෝ..

කව්ද බන් මේ උදේ පාන්දර දවස මුස්පේන්තු කරන්න හදන්නේ..

මම මම බන් .. වීරයා..

ඉතින් හත්වලාමේ දොර ඇරපන් කියල ජනේලෙට ගහල හරියනවද බන්.. ගිහින් දොරට ගහපියකෝ මගේ නින්ද කන්නේ නැතුව..

අනේ ඇවිත් දොර ඇරපන් මචං.. ඉක්මනට ඇරපන්කෝ..

ඉතින් හත් ඉලව්වේ ගිහින් දොරට ගහපන් මම කිව්වේ උඹ ඔය අමු කාල වගේ තඩි බාන්නේ මගේ කාමරේ ජනේලෙට යකෝ.. මට පාඩුවේ නිදාගන්න දීල දොරට ගහපන්.. නැත්තම් බෙල් එක ගහපන්.. අම්ම දොර අරියි..

අනේ බන් ඇවිත් දොර ඇරපන්කෝ..

ඇයි උඹ ඇවිත් ඉන්නේ ඇඳුම් නැතුවද.. මට නිදාගන්න දීල දොරට ගහපන් බන්.. නැත්තම් පිටිපස්සේ දොරට ගහපන්.. අම්ම කුස්සියේ ඇති..

මට අමාරුයි බන්.. දොර ඇරපන්කෝ..

අමාරුයි.. ඇයි උඹ බීලද  ඉන්නේ..

අනේ බන් විහිළු නොකර ඇරපන්කෝ දොර..

මොන මල කරදරයක්ද යකෝ.. හිටහන්  ඔහොම ටිකක් ජනේලේ කඩන්නේ නැතුව..

ඇඳෙන් අමාරුවෙන් නැගිටගත් මා දොර වෙත ගොස් දොර ඇරියේ වීරයාගේ කරදරයෙන් ගැලවෙනු බැරිම වූ නිසාය.. දොර විවුර්තකොට වීරයා දෙස බැලූ මාගේ නිදිමත කොහේ ගියාදැයි නැතුව ගියේ වීරයා උන් විලාසය අනුවය..

මොකෝ බන් උනේ..

වැටුන බන් වැටුනා.. අම්මෝ  ඉන්න බෑ..

කෝ බලන්න.. යකෝ අත පය ලෙලි ගිහිල්ලනේ.. තෝ මොන මගුලක් කරන්න ගිහින්ද මේක උනේ..

ලිස්සුව බන් ලිස්සුව..

යමන් කොහෙට හරි ගිහින් බෙහෙත් දාගන්න.. හිටහන් ඇඳුමක් දාගෙන එනකම්..

සාමාන්යෙන් සුදු පාටට හුරු සමක් සහිත වීරයා කළු කුමාරයා වාගේ වෙලාය.. වම් අතේ වැලමිටේ පටන් පහලට පට්ට ගිහිල්ලාය.. ඇඳන් ඉන්නා කොට කලිසමට පහලින් වම් කකුලේ දණහිස සිට පහලට පට්ට ගිහිල්ලාය.. පැළඳ සිටියා වූ හෙල්මටයට පින්සිදුවන්නට ඔලුවට හානියක් නැතිය. ඇඳුම් සියල්ල කඩමාලු වාගේය.. ඇඟ හැම තැනම කලුපාට වීලාය.. මුහුණ හරියටම කියනවානම් වෙස් මුහුණක් වාගේය..

උඹ කොහෙද බොල රිංගුවේ.. මේ තරම් කළුතෙල් නාන්න තෝ කෝච්චියක් යටවත් රිංගුවාද..

නෑ බන් නෑ.. ඩිපෝ හංදියට එහා වන්ගුවේ පාරේ කව්ද කළුතෙල් හලලා බන්.. බයිසිකලේ ලිස්සුව බන්..

දැන් කෝ බයිසිකලේ..

අන්න ගේට්ටුවෙන් එළියේ බන්.. යමන්කෝ ප්‍රශ්න අහන්නේ නැතුව..

හිටහන් ටිකක බයිසිල්කලේ බලනකම්..

මොකක්ද බන් මේ කරපු අපරාදේ.. බලහන් සයිලන්සර් දෙකම විනාසයි.. සිග්නල් ලයිට් කැඩිලා.. දැන් මාම තෝව කාවි..

අනේ යමන්කෝ කොහෙට හරි බේත් ටිකක් දාගන්න..

හිටහන් ටිකක.. දැන් බොට වැටුන තැන ඉඳන් මෙතනට එන්න පුළුවන් උනානම් මේක බලනකම්  හිටු..

ඕක කාටහරි හදන්න දාන්න ඕන බන්.. දැන් යමන් කොහෙට හරි බේත් ටිකක් දාගන්න..

මේ උදේ පාන්දර කොහේ යන්නද බන් ඉස්පිරිතෙලේට යනවා ඇරෙන්න.. පොල්වත්තටද බලපිටියටද යන්නේ කියහන්..

පිස්සුද යකෝ.. ඉස්පිරිතාලේ ගියොත් ලයිසන් හොයනවා රෝහල් පොලිසියෙන්.. ඒ නිසා වෙන තැනකට යමන්..

මේ උදේ පාන්දර කොහෙන්ද බන් ප්‍රයිවට් දොස්තරලා හොයන්නේ.. ඔන්න ඔහේ යමන් ඉසිපිරිතාලේ..

බෑ බෑ බෑ..මට බෑ..

ලේ පෙරාගෙන ඉන්නා කළු කුමාරයා වැඩි වෙලවාවක් නිවසේ තබාගතහොත් සැහෙන්න අවවාද අනුසාසනා අසන්නට වන්නට ඉඩ තිබෙනා බැවින් වාහනය පනගන්වා නිවැසියන්ගේ අවදානය වීරයා වෙත යොමු නොකරම වීරයාගේ මාමාගේ රෝඩ් මාස්ටරයෙන්ම ලෙඩාව පියතිලක දොස්තර මහතා වෙත රැගෙන යන්නට මා සමත් වෙන්නේ වීරයාගේ අනතුර ගොඩින් බේරාගන්නට උවමනා නිසාය.

වීරයා විසින් එසේ විනාස කර දමන්නට යෙදුනා වූ මාමාගේ රෝඩ් මාස්ටරයට අනතුරුව මාමාගෙන් වීරයාට වෙනත් වාහනයක්නම් අත තබන්නට ලබුනාදැයි සැක සහිතය. වීරයා ලෑනට කලාක් මෙන්ම රෝඩ් මාස්ටරයද  අලුත් වැඩියා කරගැනීමට සිදුවූයේද මාමාටමය.

ඉන් අනතුරුව වීරයා අත ගැසුවේ වීරයාගේම පොඩි අයියාගේ ඩොල්පින් වෑන් රථයට වන අතර එම සිදුවීම මෙසේය.. වීරයාගේ පොඩි අයියා විසුවේ කොළඹ නගරය ආසන්නයේ නුවර පාරේ පිහිටි ප්‍රධාන නගරයකය. වාහන සෑහෙන සංක්‍යාවක් හිමි ව්‍යාපාරයක් පවත්වාගෙන ගියා වූ පොඩි අයියාගේ ඩොල්පින් වෑන් රථයක් හොරෙන් පදවාගෙන කොළඹ සිට අම්බලන්ගොඩ පැමිණි වීරයා ගමේ කොල්ලන් කුරුට්ටන්ට වැඩ පෙන්වා නැවතත් කොළඹ යන අල්ලපනල්ලේ කටුබැද්ද ආසන්නයේදී ඉදිරියෙන් ගිය වාහනයේ පසුපස සිපගත්තේ පොඩි අයියාගේ වෑන් රථයට හා ඉදිරියෙන් ගිය වාහනයට බරපතල හානි කරමින්ලුය. අයියාට හොරෙන් පන්නාගත් රථයට සිදුවූ අලකලංචිය නිසා අගතියට පත් වීරයා රථය දන්නා හඳුනන නිවෙසක ගාල් කොට නෑසිය මිතුරන්ගෙන් වහන්වී ගියේ කොහේ හෝ රැකියාවක් කර වෑන් රථය අලුත්වැඩියා කරදෙන මුදල් සොයාගැනිමටලුය.. වීරයාගේ අතුරුදන් වීමෙන් කලබලයට පත් ඥාතීන් සාස්තර අසා අංජනම් යවා සති කිහිපයක් ලංකාව පුරා වීරයා සෙවුවත් වීරයා සොයාගැනීම උගහට වීලු. සති කිහිපයක අවෑමෙන් වීරයාගේ වැඩිමහල් සහෝදරිය වෙත ලැබුණු විශ්වාස කටයුතු ආරංචියක් පසුපස හඹා ගිය පවුලේ උදවියට වීරයා හමු වුයේ කොහේදෝ දුර ඈතක හාර්ඩ් වෙයාර් එකක් ළඟ ලොරියකින් සිමෙන්ති බාමින් සිටිනා අල්ලපනල්ලේලුය. සිමෙන්ති කොට්ටය කරේ තිබියදී අක්කාගෙන් වැදුනා වූ කනේ පාර දරාගත නොහැකිව සිමෙන්ති කොට්ටය බිම දැමු වීරයාව හාර්ඩ් වෙයාර් මුදලාලිගෙන් නිදහන් කර ගැනීමට සිමෙන්ති කොට්ටයේ මිලද ගෙවන්නට වූයේලු.

මේ සියලු අලකලංචි සිදුවුනා වූ මාගේ මිත්‍රයා අද වනවිට කෝටිපති ව්‍යාපාරිකයෙකු වන අතර දැන් දැන් ඉස්සර වාගේ නොවේය.එකල සුද්දන්ටත් අතින් වියදම් කර කොකා කොලා පොවනා වර්ගයේ එකෙකු වූ මා මිත්‍රයා අද වන විට රුපියලක් වියදම් කරන්නේ එම රුපියලෙන් දෙතුන් දහසක ලාබයක් තිබ්බෙනවානම් පමණක්ය. දුරකථන අමතුමක් දෙන්නේ වැඩක් තිබෙනවානම් පමණක්මය. උන්නාද  මලාද බලන්නටවත් නිකමට දුරකථන ඇමතුමක් නොදෙනා මා මිත්‍රයා අප දුරකථන ඇමතුමක් දුන්නට මලාට ආන්සර් කරන්නේද නැත. බැලුවොත් මාර බිසී බන් කියනා බොරු බිසියක් මවා පානා මා මිත්‍රයා ඊයේ පෙරේදාවක යක්කු ගස් නගිනා වෙලාවේ මාගේ ජංගමය නාද කරවන්නේ ඇයිදැයි කියා කුතුහලය නිසාම මා දුරකතනක ක්‍රියාත්මක කරනවාය..

මොකෝ බන් මේ නිදාගන්න දෙන්නේ නැත්තේ..

හෙහ්.. මම හිතුවේ උඹ නිදි නෑ කියල..

අනේ මේ මගෙන් මුකුත් නාහ කෙලින්ම කාරණේ කියහන්.. මොකෝ උඹ මගේ සැප දුක අහන්න කෝල් කරේ නැහැ කියල මම දන්නවනේ බන්..

අන්න යාළුවො.. ඒක තමයි යාළුකම කියන්නේ.. උඹ දන්නවා මම කෝල් කරන්නේ වැඩකට කියල..

දන්නවා නේන්නම්.. කෙටියෙන් කියහන්.. මම උදේ වැඩ..  දැන් මොකක්ද බොට වෙන්න ඕන..

උඹ දන්නවනේ බන් මම අලුත් බිස්නස් එකක් පටන් ගත්ත කියල..

හ්ම්.. ආරංචි උනා..

දැන් මොකද මගෙන් වෙන්න ඕන..

බිස්නස් එක ඇතුලෙම ගරාජ් එක පටන් ගන්න කියල හිතුවේ..බාස් කෙනෙක් ඕන.. උඹ දන්නවද _ _ _ කියන කෙනාව..

ඔව් මම දන්නවා..

දැන් බොට මොකද කෙරෙන්න ඕන..

නෑ ඌ ගන්න කියල බැලුවේ.. උඹ මොකද හිතන්නේ මෑන්ස් ගැන..

අලුත් වාහනයක් ගලවන්න දන්න ඔය පළාතේ ඉන්න හොඳම කෙනා තමයි මෑන්ස්.. සෑහෙන්න දැනුමක් තියෙන කෙනෙක්.. බය නැතුව වැඩේ බාරදියන්.. හැබැයි මට ෂුවර් නැහැ මෑන්ස් උඹ ගාව වැඩට එයිද කියල.. උඹ කීයක්ද පඩිය ඔෆර් කරේ..

තාම හිතුවේ නැහැ බන් ඒ ගැන..

මේකයි මචෝ කතාව.. උඹට විසි තිස් දාහට නම් මෑන්ස් වැඩට ගන්න බැරිවෙයි.. අඩුම තරමේ පනහක් ප්ලස් කොමිෂන් එකක් එක්ක නම් මෑන්ස් හිතල බලයි..

එහෙමද..

ඔව්.. බය නැතුව වැඩේ බාර දීපන්.. මගේ වාහන හදන්නෙත් මෑන්ස් තමයි..

වැඩේ දිගටම කරන යාවිද බන්..

උඹ ඌට රස්සාව උගන්නන්න නොයන තාක් කල් ඌ කරගෙන යාවි.. හැබැයි පුතේ උඹේ සල්ලි වලටනම් ඌ යටවෙන්නේ නෑ හරිනේ.. මම ඕනෙනම් මෑන්ස්ට කෝල් එකක් දෙන්නං..

හිටහන් තව ටිකක හිතන්න ඕන..

දැන් උඹ ඕක පටන් ගන්න යන්නේ ස්කෑනරයක් අරගෙනද..

හ්ම්.. ගත්ත..

කීයක් උනාද..

ලක්සෙයක් ලං උනා..

අනේ මේ ඔය ලක්සේ ස්කෑන් එකෙන් උඹට මහා ලොකු දෙයක් කරන්න බැහැ බන්.. අඩුම තරමේ වාහනයක් හරියට ස්කෑන් කරගන්න පුළුවන් ස්කෑනර් එකක ගන්න ලංකාවේ සල්ලි වලින් අඩුම ලක්ස හතක්වත් ඕන බන්..

නෑ..

නෑ නෙවෙයි ඔව්..

ලැප් එකකුයි කේබල් ටිකයි අරගෙන හොඳ සොෆ්ට්වෙයාර් එකක් සල්ලිවලට ගනින්.. ලක්ස දෙක තුනකින් වැඩේ කොම්ප්ලීට් වෙයි.. ඔය චයිනීස් කෑලි වලින් වැඩ කරලා මිනිස්සුන්ගෙන් බැනුම් අහන්නේ නැතුව හිටහන්..

බලමු..

හරි.. දැන් බොට මගෙන් කෙරෙන්න ඕන දේ උනානේ.. එහෙනම් මම නිදාගන්නවා.. පොඩි එවුන් දෙන්නයි වයිෆුයි සනීපෙන්ද.. දැන් උඹ ටවුන් එක කිට්ටුවනේ පදිංචිය..

ඔව් බන්.. ඒ උනාට දැන් ආයෙත් ගමේ ගෙදරට පදිංචියට යන්න බන් හිතන් ඉන්නේ..

ඒ මොකෝ.. උඹ දැන් ළමයි ඉස්කෝලේ දාන්නනේ ටවුමට ආවේ.. දැන් ඉතින් දෙවැනි දරුවත් දාගන්නකම් හිටහන් ඔහොම..

බෑ බන්.. අලුත් බිස්නස් එක නිසා ගෝලයින්ට කන්න දෙන්නම බර ගානක් දෙන්න වෙලා බන් ..

ගෝලයෝ කීයක් ඉන්නවද..

තිහක් විතර ඉන්නවා බන්..

ඉතින් මොකද බන්.. උඹ උන්ගෙන් හම්බු කරනවනේ..

ගමේ ගෙදරට පදිංචියට ගියාම වැඩ දෙකම කෙරෙනවනේ බන්..

චී චී වැඩේ කැතයි.. දැන් උඹ හදන්නේ අර අහිංසක ගෑනිට කියල ගෝලයෝ තිහකට වේල් අනූවකට කෑම උයවන්නද යකෝ..

ඕකනේ බොලා කලබල වෙනවා කියන්නේ.. මම හදන්නේ ගමේ ගෙදරට පදිංචියට ගිහින් වැඩට කව්රුහරි ගෑනු කෙනෙක්  අරගෙන වැඩ ටික කරවගන්න බන්.. එතකොට ළමයි දෙන්නත් බලාගන්නවා, වත්තේ පිටියේ වැඩ ටිකත් කෙරෙනවා, රෙදි ටිකත් හෙදෙනවා හොලයින්ගේ කෑම ප්‍රශ්නෙත් විසඳෙනව..

කීයක් පඩි දෙන්නද ඉතින් උඹ හිතන් ඉන්නේ..

මාසෙට පහළොවක් දෙනවා..

හිටහන් මම කතරගමට කෝල් එකක් දීල බලන්නම් කව්රුහරි ඉන්නවද කියල..

ඕන නෑ බන්.. ගම අවටින් හොයාගන්න පුළුවන් වෙයි..

ම්හ්.. හරියන්නේ නෑ.. ඔය වැඩේට කතරගමින්ම කව්රුහරි හොයන්න වෙනවා බන්..

ඇයි මොකටද බන් කතරගමින් ගෑනු ගේන්නේ.. මේ අපේ අවට ඉන්නේ ඕන තරම්.. උඹට පිස්සු..

මට පිස්සු නෑ බන්.. මම දන්න තරමින් අත් දෙකයි කකුල් දෙකයි තියන සාමාන්‍ය මිනිස්සුන්ට වඩා වැඩියෙන් අත් පිහිටලා තියෙන්නේ කතරගම දෙවියන්ට විතරයි.. ඉතින් උඹ මේ කියන විදිහට දවසට කෑම අනූවක් උයල පාර්සල් බඳින්නැයි, උඹේ අක්කර දෙකක විතර ඉඩම අස්පස් කරන්නයි, අර ගේ තඩිය අස් කරන්නයි ළමයි බලන්නයි රෙදි හෝදන්නයි අත් දෙකේ කකුල් දෙකේ එකෙකුට පුළුවන් වෙන එකක් නෑ. ඒ නිසා ඔය වැඩේට හරියන කෙනෙක් ඉන්නවනම් ඉන්නේ කතරගමම තමා.. පොඩ්ඩක් හොයල බලන්නම් ඉතින්..

හී හී..

මොකද බොල හී හී ගාන්නේ .. මම කියන දේ බොරු කියලද දැන් උඹ කියන්නේ..

ඒකෙන් කමක් නෑ.. උඹ මේ කතාව බ්ලොග් එකේ ලියන්නේ නෑ නේ..

අපෝ නෑ... ලබන සතියේ වගේ බලහන්කො..

ඒ පිස්සුනම් කරන්න එපා බන්..

එහෙනම් මම තිබ්බ..මට නිදිමතයි..

අනේ බන් ලියන්න එපා හරිද..

බායි..

වීරයා මේ ලිපිය කියවා මාහට නඩු දාන්නට තනන්නට උත්සහ කරන්නේ නැත්තේ වීරයා යනු මාගේ අතිජාත මිත්‍රයාගේ නියම නම නොවෙනා නිසාය. ඊටත් අමතරව කියනවානම් වීරයාගෙන් මා හට පරණ නය ගනුදෙනුවක් පියවීමට ඇති නිසා එය මා වෙත නැවත ලබාදෙන තුරා වීරයාට මට එරහිව නඩු මගට බසින්නට නොහැකිය. දෙදහස් එක වසරේ  වීරයා ජපානය බලා යද්දී වීරයා ගුවන්තොටුපොළ වෙත රැගෙන ගියේ මාගේ වෑන් රථයෙන්ය. මල් කැඩීමට මාගේ නිවසේ දුරකථනය පැය ගණන් පාවිච්චි කළා වූ වීරයා , මල් කැඩූ අය සමග කාටත් හොරා ගමන් බිමන් යන්නටද යොදාගත් මාගේ වෑන් රථයෙන්ම ගුවන් තොටුපොළට ගොස් බැස්සු කල ගුවන් තොටේ පළමු පරීක්ෂණ කවුළුවෙන් ඇතුලට ගොස් මටත් බතලයාටත් ඇත වනා කී දී නම් මෙයයි..

ඒ මම උඹේ හයර් එක එවන්නම් හොඳේ..

එවකට අම්බලන්ගොඩ සිට ගුවන් තොටුපොළට කුලී ගාස්තුව රුපියක් එක්දහස් අටසියයක් බැවින් ඒ පොරොන්දු වූ මුදල අද වනතුරු වීරයා මා වත ලබා දී නොමැතිය. මාගේ ණය පියවා දමනතුරු වීරයාට මාගෙන් සමාවක්නම් නැතිය. සියට පහළොවක් යනු ගිනි පොලියක් වුවත් වීරයා ඇටෙන් පොත්තෙන් ආ දා පටන් ගමෙන් සියයට දහයට පොලියට ගත් මුදල්  නගරයේ පොලියට දුන්නේ සියයට පහළොවට බැවින් එම ගිනි පොලී අනුපාතයම වීරයාගේ ගිනුමටද ආදේශ කිරීම අසාධාරණ නොවෙයි සිතමි.. කවුරුන්දෙ හෝ පින්වතෙක් දෙදහස් එක වසරේ පටන් අද දක්වා ඉහත ණය මුදල වෙනුවෙන් වැල් පොලිය සාදා මෙහි කොමෙන්ට් කොටසේ පලකරන්නේනම් වීරයාට මා සමග අකමැත්තෙන් හෝ එකඟ වන්නට සිදුවනු ඇත.

ගෑනුන්ගේ මල කෝලo..

මේ ලියවෙන සිදුවීමට අදාළ වකවානුව දෙදහස් හත වසර බවට මාගේ බැටරි බැසයමින් තිබෙන මතකය පවසා සිටියත් එය අහවල් වර්ෂයේ අහවල් දිනය බවට තහවුරු කිරීමට කිසිදු මග සලකුණක් මාගේ මතකයේ නොමැතිය. එය අනිවාර්යයෙන්ම දෙදහස් පහ වසර සහ දෙදහස් දහය වසර අතරමැද කාලය බවට සහතික කොට කිව හැක්කේ මා කතරගම සේවය කලේ එම කාල වකවානුවේ බැවින්ය. අදාළ සිදුවීම අකුරු කිරීමට ප්‍රථමව එම සිදුවීමට අමුද්‍රව්‍ය සැපයුණු අනෙකුත් සෙසු සිදුවීම් ලියාගෙන යාමට සිදුවන අතර එය කිසිසේත්ම ලොකුකම කියාපෑමක් නොවන ලෙස පාඨකයෝ වටහාගනිත්වා.

මා කතරගම සේවය කල අවදියේ මා වෙත භාරවී තිබු රාජකාරියේ ස්භාවය පැය විසි හතරේ රාජකාරියක් නොවීය. දිනපතා කතරගම බඩගෑම ඉතා වෙහෙසකර කටයුත්තක් බැවින් නිල නිවාසයේ රැඳී සිටීම හැරුනුකොට වෙනයම් විකල්පයක් ද මා වෙත තිබුනේ නැතිය. කතරගම වන්දනාවේ එන්නාවූ හිතවතෙකු මිත්‍රයකු කලාතුරකින් මා බැලීමට පැමිණියා විනා අපගේ නිල නිවාසයට කතරගම කෙනෙකු පැමිණියානම් ඒ  අප කව්රුත් දන්නා කියන මනින්නා මහතා පමණක් වීය. මනින්නාගේත් මාගේත් සමාගමයට සිටි හිතවතුන් දෙදෙනෙකු වීය. ඉන් පළමුවැන්නා නම් මාගේ දුකට සැපට දෙකටම සිටිනා ගෝල තැන වන අතර අනෙකා අල්ලපු ඉඩමේ පදිංචි අන්දිරිස් මහතා වීය. මනිනා සහ මා විසින් එකතුපහදු වී මේසය මතට වඩම්මන මධු බඳුනේ අඩිය බැලීමේ උවමනාවක් අප දෙදෙනාටම නොවුනත් මාගේ ගෝල තැන සහ අන්දිරිස් මහතාගේ මධු පානයට පින්සිදුවන්නට මනින්නාටත් මටත් බෝතලයේ ඉතුරු වන්නේ අඩිය පමණක්ය. එයට හේතුව නම් මාගේ කීකරු ගෝල තැන සහ අන්දිරිස් වීදුරුව පුරවා මද පමණට ගන්න අයවලුන් වීමයි. ගෝල තැන සහ අන්දිරිස් මහතා විසින් එක් වරක් පානය කරන්නට යෙදුනු පසු මනින්නාටත් මටත් බෝතලයේ ඉතුරු වන්නේ භාගයටත් වඩා අඩු පරිමාවකි. එයින් සෑහීමට පත්වන්නාවූ මනින්නාත් මමත් භාග්‍යවන්තයින් ලෙස භාගය බුක්තිවිඳීම ආරම්භ කරන්නේ අන්දිරිස් උන්නැහේත් ගෝල තැනත් තමුන්ගේ බත් පත වළඳා නින්දට ගියායින් පසුවය. බොහොමත්ම කලාතුරකින් මා සති අන්තයේ කතරගම රැඳුනහොත් එදාට මනිනාටත් මටත් සම්පූර්ණ බෝතලයක්ම භුක්ති විඳින්නට වරම් ලැබෙන්නේ ගෝල තැන සහ අන්දිරිස් උන්නැහේ සති අන්තයේ නිල නිවාසයේ රැඳෙන්නේ නොමැති බැවින්ය. එදාට මනින්නාටත් මටත් රජ මගුල්ය. එවන් දිනයක රාත්‍රියේ මා හට සිදුවූ අලකලංචිය මනින්නා පොස්ටුවේ මීට කාලයකට පෙර ලියා තබා ඇත.

මාගේ රාජකාරිය කාර්යබහුල නොවුනත් කාර්යාලයේ රැඳී සිටීම අනිවාර්යය. මාගේ ප්‍රධානියාට උත්තර සැපයෙනවාට අමතරව පිටස්තර රජයේ ආයතන වලටද යෑම් ඊම් සහ අනුබද්ධ රාජකාරි මා වෙත පැවරී තිබුනේ මා කතරගමට වී නිකම් ඉන්නවා බලා සිටීම මාගේ ප්‍රධානියාට ඔලුවේ කැක්කුමක් වූ බැවින්ය. තිබෙනා වූ වැඩ රාජකාරි හැකි ඉක්මනින් අහවරකොට නිකම් සිටීමට ගජ රුසියෙකු වූ මා මට්ටු කිරීමට මාගේ ප්‍රධානියාට නම් මා එම රැකියාවෙන් ඉවත්වන තුරුම හැකිවුයේ නැති. මාගේ කාර්යාලයේ  වැඩ රාජකාරි මදිවූ තැන වෙනත් ආයතනයකට සතියේ දින කිහිපයකට මා අනුයුක්ත කරනා මාගේ ප්‍රධානියා සති කිහිපයකින් මට පරිප්පු දීම තාවකාලිකව නවතාලන්නේ මා විසින් ලොක්කා වෙත යවනා පෙට්‍රෝල් බිල්පත් දුටු සැනින්, කොළඹ ප්‍රධාන කාර්යාලයේ සීතල කාමරයේ සැප පුටුවෙන් උඩ විසික්වෙන නිසාය. ඉන් අනතුරුව මාස කිහිපයක් යනතුරු පාඩුවේ තියෙන වැඩක් කරගෙන මා හට සිටින්නට හැකිවෙනවාය. 

උදෑසනම මට තිබෙනා ප්‍රධානම රාජකාරිය නම් ගෝල තැන විසින් සාදා දෙන ප්‍රනීත්වත් උදෑසන ආහාරය ගිල දැමීමය. ඉන් අනතුරුව රාජකාරි ඇතොත් ඒවායේ යෙදෙනවාට අමතරව මටත් ගෝල තැනටත් තිබෙන්නාවූ බලවත්ම ප්‍රශ්නය වන්නේ දහවල් ආහාරය වෙනුවෙන් කුමනාකාරයේ ආහාරයක් පිළියෙළ කරන්නේද යන්නයි. උදෑසන ආහාරය ගිලදමා අත සෝදන්නටත් ප්‍රථම ගෝල තැනගෙන් මා වෙත එල්ලවන ප්‍රශ්නය නම්..

මහත්තය.. දවල්ට මොනවයි හදන්නේ ???????

එම ප්‍රශ්නයට උත්තර සැපයීම බලවත් ගැටළුවක් වන්නේ මාගේ සුවච කීකරු ගෝල තැන ආහාර පිසින්නට උපන් හපනෙක් වන බැවිනි. ඉහත ප්‍රශ්නය විසි තිස් වතාවක් මා වෙත එල්ලවූ පසු දෙදෙනාගේම එකඟත්වය මත යමක් යෝජනා වන අතර එය දහවල් ආහාරය වශයෙන් පිළියෙළ වේ.. එම ආහාරය වලඳා අවසන අත සෝදන්නට ප්‍රථම ගෝල තැනගෙන් මා වෙත එල්ලවන්නාවූ ප්‍රශ්නය නම්..

මහත්තය.. රෑට මොනවයි හදන්නේ ???????

එම ප්‍රශ්නයද විසි තිස් වතාවක් මා වෙත ඉදිරිපත් වූ අනතුරු දෙදෙනාගේම එකඟත්වය මත ආහාර වට්ටෝරුවක් යෝජනා වෙන අතර එයින් පිළියෙළ වන ආහාර වට්ටෝරුව කා දමා අවසන් වන්නේ රූපවාහිනියේ විකාශය වන සියලුම මල් නාට්‍ය නරඹන අතරතුරයි. අල්ලපු ඉඩමේ පදිංචි අන්දිරිස් අයියාද වයස හැත්තෑව ඉක්මවූ තනිකඩ පුද්ගලයකු බැවින් ඔහුද  අපගේ ආහාර මේසයේ සාමාජිකයකු වන්නේ දිනපතාමය. ගිගුරුම් සහිත වැසි කාලයට අන්දිරිස් අයියා විසින් නෙලාගෙන එන ඉඳලොළු නම් හතු ව්‍යංජනය සමග අසමෝදගම් කොළ සම්බෝලයේ රස නම් අමතක කල නොහේ.

මෙසේ ගතවෙන මාගේ දින චරියාවට එක්තරා දිනෙක ලැබුණු හදිසි දුරකථන ඇමතුමකින් කියවෙන්නේ කනගාටුදායක ආරන්චියක්ය. රජයේ ආයතනයකට කුලියට දී තිබෙන්නාවූ මාගේ වෑන් රථයක් අනතුරට ලක්වී ඇති ආරංචිය එක් පැත්තකින් කනගාටුවට කාරණයක්ය. අනෙක් පැත්තෙන් සාක්කුවට අගුණ කාරනාවක්ය. රජයේ ටෙන්ඩර් පටිපාටිය අනුව වාහනය ආයතනය වෙත සැපයීමට නොහැකි දින වලදී නිෂ්පාදිත වර්ෂය මාගේ රථයේ වර්ෂයටම සමාන එම ආසන පරිමාවේ රථයක් මා විසින් සැපයිය යුතුය. එම කොන්දේසියට අනුව මාගේ රථය අලුත්වැඩියා කරනා තුරු වෙනත් රථයක් සැපයීම ආර්ථික අතින් ලාභදායී කටයුත්තක් නොවේය. ඒ හෙයින් කල යුත්තේ මාගේ රථය හැකි ඉක්මනින් අලුත්වැඩියා කොට නැවත සේවයේ යෙදවීමය. එහෙත් මා වෙත ඇති ප්‍රශ්නය නම් එම අලුත්වැඩියාවන් කරවීමට මා අනිවාර්යෙන් ගෙදර යායුතු වීමය. 

ගෙදර යාමට නම් නිවාඩු ලබාගත යුතුය. නිවාඩු ලබාගැනීමට ප්‍රධානියා අනුමත කල යුතුය. සතිය මැද එක් දිනක් වෙනුවෙන් නිවාඩු අනුමත කරගැනීම ඒ තරම් අපහසු කටයුත්තක් නොවුනත් ඉතිරි දින කිහිපය වෙනුවෙන් මා නැවතත් මලාට කතරගම නොඑනා වග ප්‍රධානියා දන්නාවාය. ඒ හෙයින් නිවාඩු ගන්නවානම් දින තුනක් වෙනුවෙන් නිවාඩු ඉල්ලිය යුතුය. වැඩ බැලීමට අයකු නොමැති බැවින් එය හදිසියේ කළහැකි කටයුත්තක් නොවේය. මා එක් දිනක් වෙනුවෙන් නිවාඩු ඉල්ලාගෙන ගමේ ගියහොත් නිවාඩු ලැබෙන දිනට පහුවදා අභ්‍යන්තර විගණන කණ්ඩායම මාගේ කාර්යාලයට කඩා පන්නා ලොක්කා අවුරුදු ගණනාවක වාඩුව මාගෙන් ගන්නවාය. මේ සියල්ල සීරු මාරුවට කල්පනාකොට බැලුකල නිවාඩු ලබානොගෙන ගෙදර මාරුවීම වඩා ඇඟට ගුණය. එයට ලැබෙන ප්‍රගතිශීලී උදව්වනම් මාගේ දුකට සැපට සිටිනා ගෝල තැනගේ ප්‍රකාශයයි..

මහත්තය යන්න.. මම බලාගන්නම්..

කෝල් එකක් ආවොත්..

කෝල් එකක් ආවොත් මම කියන්නම් මහත්තය පොඩ්ඩකට ටවුමට ගියා කියල..

ඉතින් අයෙ අවොත් කෝල් එක..

කියන්න බොරුද මහත්තය නැත්තේ.. මොකෝ එයාල කොළඹ ඉඳන් ප්ලේන් එකකින් ඇවිත් බලන්නද.. 

ඉතින් මට දවස් තුනකටවත් එන්න වෙන්නේ නැහැනේ මේ වාහනේ හදල යවාගන්නකම්..

මහත්තය බයවෙන්න එපා.. මම බලාගන්නම්.. මහත්තය යන්නකෝ..

එහෙනම් මම යන්නම්.. මොකක් හරි කෝල් එකක් ආවොත් හැරෙන තැපෑලෙන් මට කෝල් එකක් දෙන්න එහෙනම්..

හරි මහත්තය බයවෙන්නෙපා.. යන්නකෝ..

එසේ සිදුවූ එකඟතාවය අනුව මා ගෙදර එන්නට පිටත් වුයේ හැකි ඉක්මනින් රථය අලුත්වැඩියා කොට නැවත සේවයට යෙදවීම අනිවාර්ය නිසාය. දින හතක් ඇතුලත රථය නැවත සේවයේ යෙදවීමට නොහැකි වුවහොත් ටෙන්ඩරය අවලංගු කිරීමට එම ආයතනයට බලය තිබෙනවාය. වසර ගණනාවක් පුරා මා විසින් ලබාගත් ටෙන්ඩරයට ඇස ගසාගෙන සිටින්නාවූ පිටත පාර්ශවයන් බලා සිටින්නේ කොයි මොහොතේ ටෙන්ඩරයට විදින්නදෝ යන බව මා සක්සුදක් සේ දන්නා නිසා රථය හැකි ඉක්මනින් අලුත්වැඩියා කිරීම මාගේ වගකීමක්ය..

මා ගමට සපත්වනා අවස්තාව වනවිට මාගේ වෑන් රථය පොලිස් භාරයේය.. ෂෙල්, බෆර්, බොනට්, හෙඩ්ලයිට්, සියල්ල කුඩු පට්ටම්ය.. ඊට අමතරව වා මුවා හෙවත් වින්ඩ්ස්ක්රීනය ඇතුලට එබෙන්නම කැඩිලාය.. මාගේ රියදුරා වූ අපගේ ප්‍රසන්නයාගේ මාමා වූ චූටි මාමාගෙන් අසාගත් පරිදි තොරණේ විස්තරය මෙසේය..

චූටි මාමේ මොකෝ උනේ..

මොනවා වෙන්නද.. මූ ආව කඟවේනා වගේ.. ඈත තියාම එන්නේ මගේ පැත්තට නිසා මම වාහනේ අයින් කරලා නවත්තගත්තා.. මූ ආපු වේගෙන්ම ගැහුවනෙ මොටෝ සයිකලේ වෑන් එකේ මූනෙම..

නෑ...

නෑ නෙවෙයි ඔව්.. මූ කනමදය වගේ බීලා...

මේ මහා දවල්..

දවල් නේන්නම්.. කෙලින් ඉන්න බැරි තරම් බීලා..

මෑන්ස්ට තුවාලද..

මොන තුවාලයක්ද.. ඌ ඔය ඉන්නේ ඉස්පිරිතාලේ උන්නටත් වඩා හොඳට..

එතකොට චූටි මාමේ ඉස්සරහ වීදුරුව බිඳුනේ කොහොමද..

මූ හැප්පිච්ච පාර උඩින් ඇවිත් වැටුනේ ඉස්සරහ වීදුරුව උඩටනේ..

නෑ..

නෑ නෙවෙයි ඔව්.. වීදුරුව හයිය නිසා මූ වෑන් එක ඇතුලට වැටුනේ නැහැ .. වීදුරුව දෙකට කඩුනනම් ඉතින් මූ අපේ ඇඟ උඩ..

මෑන්ස්ට සිහිය නැතිවුනේ නැද්ද..

මොන පිස්සුද.. ඌ වීදුරුව උඩින් බැහැල බයිසිකලේ අරන් යන්නත් ලෑස්තිය..

මොකක්.. බයිසිකලේටත් මුකුත් වෙලා නැද්ද.. වෙන්න බෑනේ.. අපේ වාහනේට බරටම තුවාලයිනේ..

බයිසිකලේ ඉස්සරහ රෝදෙ ඉන්ජිම ගාවටම හේත්තු වෙලා.. පෝක් එක දෙකට කැඩිලා..

ඉතින් මූ යන්න ගියා කියන්නේ එතකොට..

බී මතේ.. බී මතේ.. බොහොම අමාරුවෙන් ත්‍රී වීල් එකක පටවල ඉස්පිරිතාලේ යැව්වේ..

පොලිසියෙන් මොකෝ කියන්නේ..

හෙට එග්සැමිනර් ලව්වා  බ්‍රේක් චෙක් කරලා වාහනේ දෙන්නම් කිව්වා උසාවි නොදා.. මූ බීල නිසා අපිට මුකුත් ප්‍රශ්නයක් නෑ..

කතාන්දරය එසේ බැවින් වාහනය ඉක්මනින් අලුත්වැඩියා කිරීමට නම් පොලිසියෙන් නිදහස් කර ගතයුතුය. ඉන් අනතුරුව රථය අලුත් වැඩියා කිරීමට ගරාජයක් සොයාගත යුතුය. අමතරකොටස් සොයාගත යුතුය. රථයට සිදුවී ඇති අලාභහානි වලට අනුව රේඩියේටරයේ පටන් ෂෙල් , බෆර්, බොනට්, ඒසී කන්ඩෙන්සර්, වයිපර් ආර්ම් ඉදිරිපස එක් ප්‍රධාන ලාම්පුවක් සහ වා මුවා නොහොත් ඉදිරිපස වීදුරුව  යන සියල්ල අලුතෙන් දමා පේන්ට් කල යුතුය. රක්ෂණ වන්දි ගැනීම පසෙක ලා මාගේ අවශ්‍යතාවය රථය අලුත්වැඩියා කොට නැවත සේවයේ යෙදවීමය. රක්ෂණ වන්දි ගැනීමට රැඳී සිටියහොත් ටෙන්ඩරය වෙනත් අයකු ආක්‍රමණය කිරීම වැලැක්විය නොහැකිය. 

චූටි මාමේ.. කාටද දැන් මේක හදන්න දාන්නේ..

අනේ මන්ද.. හදිසියට මේ වැඩේ කරගන්න එක තමයි වැඩේ..

එහෙම කියල සතියක් මේක හදන්න බලන් ඉන්න බැහැනේ චූටි මාමේ.. කාට හරි දීල හදවල දුවමු..

කව්රුහරි ගෙදරට ගෙනල්ල හදවමුද.. එතකොට වැඩේ ඉක්මන්..

අනේ මේ.. උන් වාහන හදල ගෙවල් මිදුල් විනාස කරලා දැම්මාම මට ගෙදර බත් කාර්ඩ් එක නැතිවෙනවා.. ඒ නිසා ගරාජ් එකකට දෙමු..

එහෙනම් ඉතින් වැඩේ මල්ලෙන් ගහල හරි ගොඩ දාන්න ඉන්නේ _ _ _ විතරයි..

එහෙනම් හෙට ගිහින් දාමු.. ඇදගෙන නේද යන්න වෙන්නේ..

ඔව් ඉතින්.. රේඩියේටර් එක හිල් වෙලානේ තියෙන්නේ..

චූටි මාමා යනුවෙන් අප සැම ඔහුව හඳුන්වන්නේ ඔහු අපගේ හිතාදර මිත්‍ර ප්‍රසන්නගේ අම්මාගේ බාල සහෝදරයා වන බැවින්ය. ප්‍රසන්නයා විසින් ඔහුට ආමන්ත්‍රණය කරනා ආකාරයෙන් අපද උහුට චූටි මාමා කියා ආමන්ත්‍රණය කරනා බැවින් රථය කුලියට දී තිබෙන රජයේ ආයතනයේ අයවලුන්ද ඔහුට ආමන්ත්‍රණය කරන්නේ චූටි මාමා කියාය. බයක් සැකක් නොමැතිව ගමනක් යැවිය හැකි ගනයේ රියදුරෙකු වන චූටි මාමා විශ්වාසය අකුරට තබියහැකි ගනයේ පුද්ගලයෙකුය. කලක් තමුන්ගේම රථයෙන් පාසල් සේවාවක් කල චූටි මාමා පසුකලෙක තම රථය විකුණා දමා පැත්තකට වුයේ පාසල් සේවා මුදල් එකතු කිරීමට දරුවන්ගේ මහ එවුන්ගේ පසුපස එළවීමට සිදුවූ නිසාය. 

වාහනය තනිවම සෑදීමට මා හට හැකියාව ඇතත් රක්ෂණ වන්දි ගැනීමට උවමනා නිසා ගරාජයකට දැමිය යුතුමය.. වන්දි ලැබුනා හෝ නොලැබුණා  හෝ ගරාජයක් මගින් අලුත්වැඩියාව කරගතහොත් පසුකාලීනව රක්ෂණ සමාගමෙන් ලැබෙන වන්දියෙන් පාඩුව අවම කරගත හැකිය. නැත්නම් මුළු මුදලම මාගේ සාක්කුවෙන්ය.. 

ව්‍යාපාරයක් වශයෙන් වාහන ධාවනයේ යෙදවූ අයකු වශයෙන් චූටි මාමාත්, එම ව්‍යාපාරයම වසර ගණනාවක පටන් කරන් යන්නාවූ මමත් ඊළඟට අප දෙදෙනාටම වෙන්නට යන්නාවූ අලකංචිය දන්නවාය. ඒ නම් වාහනය අලුත්වැඩියා කර දෙනතුරු ගරාජ් බාස් කෙනෙකු පසුපසින් වැටීමට සිදුවීමය. වාහන ටින්කර් පේන්ට් කරන්නාවූ ගරාජ් බාස්ලා යනු සෑම විනාඩියක් පාසාම පසුපසින් සිටියොත් පමණක් රාජකාරිය අහවර කරනා වර්ගයේ ජීවීන් කොට්ඨාශයක්ය. එසේ පසුපසින් නොසිටියහොත් රථය පොළොවට මුල් අදිනාතුරු අලුත්වැඩියාවක් නම් කෙරෙන්නේ නැතිය..

එග්සැමිනර් මහතාගේ පරීක්ෂණයෙන් අනතුරුව රථය අප වෙත භාරවූ අතර චූටි මාමා විසින් යෝජනා කරාවූ සහ මා විසින් ස්ථිර කරාවූ ගරාජයට රථය ඇදගෙන ගොස් දැම්මේ අප දෙදෙනාමය.. ඊළඟ ඇත්තේ ගරාජයේ ගිනි තැපීම නොහොත් ගරාජ් බාස් පෙනෙන මානයේ නිතර ගැවසීමයි.. රථයේ අදාළ කොටස් ගලවන තුරු චූටි මාමා ගරාජයේ මුරට යෙදවූ මා වෙනත් රථයක් ගෙන නුගේගොඩ මන්ගැච්චුවේ අවශ්‍ය බොඩි පාර්ට්ස් රැගෙන ඒමටය. නුගේගොඩට ගොස් අමතර කොටස් ටික රැගෙන ඒම මහා කජ්ජක් නොවුවත් කතරගම සිටියයුතු මා නිවාඩු නොදමා කොළඹ සිට ප්‍රධාන කාර්යාලයේ එකෙකු දුටුවහොත් සිදුවනා සංතෑසිය මා දන්නා බැවින් පරෙස්සමට කොළඹ ගොස් අවශ්‍ය අමතර කොටස් රැගෙන මා ගරාජයට පැමිණෙන විට සවස පහ පමණ වන්නට ඇතිය. ඒ එද්දීද චූටි මාමා ගරාජයේ මදුරුවෝ තලනවාය. බාස් ආගිය අතක් නොමැතිය. 

ඇඳිරි වැටීගෙන එද්දී හම්බුකරනා තුට්ටු දෙකෙන් වැඩි පංගුවක් බාර් මුදලාලිට නොදී නිදාගැනීමට නොහැකි ගනයේ බාසෙකු වූ අපගේ ටින්කර් බාස් පිටව ගොස් ඇත්තේ ලඟට ගිහින් එන්නම් කියාය. එහෙත් යන්නේ මත්පැන් හලට බව දන්නෝ දන්නවාය..එය අත්‍යවශ්‍ය ගමනක් බැවින් මහ ඒජන්තගේ වාහනය සාදමින් සිටියත් සවස පහමාර හය වන විට ලිකර් ෂොප් වෙත වාර්ථා කිරීම බහුතරයක් බාස්ලාගේ සිරිතය.

චූටි මාමේ .. ඔයා එහෙනම් යන්න ගෙදර.. මම මෙයා ආවාම ගෙනාපු බඩු ටික පෙන්නලා හරිද කියල අහගෙනම මම එන්නම්..

කමක් නැද්ද..

කමක් නෑ කමක් නෑ.. දවල් ඉඳන් මෙතන හිටියනේ..

හා එහෙනම්.. මම උදේම එන්නම් මේ පැත්තට..

හ්ම්..

චූටි මාමා ගරාජයෙන් පිටව ගියේ සවස හයයි තිහට පමණය.. අඳුර වැටී රාත්‍රී හත පසුවනතුරුද ලඟට ගිය බාස් නැවත පැමිණියේද නැත.. ගෙනා කොටස් හරියටම ගැලපෙන ඒවාද කියා තහවුරු කරගැනීම මාගේ වගකීම බැවින් බාසා එනතුරු ගෙදර යාම නුවනට හුරු නැත. නැතිනම් පසුවදා උදෑසන මොනයම් හෝ හේතුවක් මත අලුත්වැඩියා කටයුතු ඇනහිටින්නට ඉඩ තිබෙනවාය..

දවල් පටන් කොළඹ අමතර කොටස් සොයා කඩ ගානේ ඇවිද හතර හන්දි පන නැතිය..එහෙං බඩේ පනුවන් බොක්සින් ගසනවාය..ඊටත් එහා දැවෙනම ප්‍රශ්නය නම් ජංගම දුරකතනයේ බැටරිය බැස යන්නට ඔන්න මෙන්නය.. දුරකථන පන ඇතිව තබා ගැනීම වඩා වැදගත් වන්නේ කතරගම ගෝල තැනගෙන් ඇමතුමක් ලැබුනහොත් එය මග නොහැර ලබාගතයුතු නිසාය.. එහෙත් දුරකථනයේ බැටරිය ආරෝපණය කිරීමට චාර්ජරයක් මා සතුව නොමැතිය.. බාස් ගොයියාද එන පාටක්ද නොමැතිය.. බාසා හමුනොවී ගෙදර යාමද නුවනට හුරු නැතිය.. සියල්ලටම විකල්පය වන්නේ කොහෙන් හෝ චාර්ජරයක් සොයාගෙන බැටරිය ආරෝපණය කරගැනීමය..

චාජරයක් සොයාගැනීමේ මෙහෙයුම වෙනුවෙන් වෙහෙසෙන සිතුවිලි එක වරම දුටු රිදී ආලෝකයක් ළඟ නවතින්නේ එයින් මාගේ අරමුණ අනිවාර්යෙන් ඉෂ්ටවන වග මා දන්නා නිසාය. ඒ නම් ගරාජය ආසන්නයේ සිටිනා මාගේ මිතුරෙකුගේ නිවසින් චාර්ජරයක් ඉල්ලා ගැනීමයි. මාගේ මිත්‍රයා විදේශයක සේවය කලද ඔහුගේ බිරින්දෑ සහ ඔහුගේ නැන්දනිය ,ඔහුගේ දරුවන් ලඟින්ම දන්නා පුද්ගලයකු වශයෙන් චාර්ජරයක් මා වෙත අනිවාර්යයෙන්ම ලැබෙනා බව සක්සුදක් සේ පැහැදිලිය. ඒ හෙයින් බාස් කාරයා බඹර පදම් වී නැවත ගරාජයට පැමිණෙනතුරු මිතුරාගේ නිවසට යාමට මා පිටත් වන්නේ මිතුරාගේ නිවස තිබෙන්නේ ගරාජයට මීටර දෙතුන්සියයක් එහායින් නිසාය..

මිතුරාගේ නිවස වටා ඉදිවූ අඩි දහයක එකොලහක තාප්පයකි. තමුන් නිවසේ නොමැති නිසා සිය පවුලේ ආරක්ෂාව තහවුරු කරනු පිණිස බැඳ ඇති සුවිසල් තාප්පයෙන් ඔවුනට සැලසෙන ආරක්ෂාව බොහෝය. මා එම නිවැසියන්ට අමුත්තෙකු නොවන බැවින් ගේට්ටුව විවුර්තකරගෙන නිවස දෙසට පිය මනින්නේ එම නිසාවෙ බල්ලන් නොමැති බව මා පැහැදිලිවම දන්නා නිසාය. 

නිවසේ ඉදිරි දොර සම්පුර්ණයෙන්ම විවුර්තය.. සාලයේ තිබෙන්නාවූ අඩි තුන හතරක් විශාල රූපවාහිනිය මහා ශබ්දයෙන් ක්‍රියාත්මකය.. සීනුව හත් අට වරක් නාද කලද කිසිවෙකු පිටතට පැමිණෙන සලකුනකුදු නොමැතිය. කොයිතරම් දන්නා හඳුනන නිවසක් වුවද නොදන්වා ඇතුලට පියවර තැබීම සභ්‍ය නොවන්නේය..ඒ හෙයින් කිහිප වාරයක් නැවත සීනුව නාද කිරීමට මාහට සිදුවෙනවාය.. රූපවාහිනී යන්ත්‍රයේ ශබ්දයට සීනුව නිවස තුලට ඇසෙනවාදැයි සැක සහිත වුවත් වෙනත් විකල්පයක් මා වෙත නොමැතිය..

මා, මිතුරාගේ නිවසේ දොරකඩට පැමිණ විනාඩි කිහිපයක් ඉක්ම ගියද කිසිවෙකුත් එලි පහලියට එන සලකුනකුදු නොමැතිය. හොඳින් නිවස තුලට කන් යොමු කිරීමේදී මොකක්දෝ අපැහැදිලි කෑගැසීමක් යාන්තමට අසෙනවාය. එය කෑගැසීමක්ද එසේත් නැතහොත් මා මිතුරාගේ දරුවන් සෙල්ලම් කරනාවූ ශබ්දයක්ද යන්න වෙන්කරගත නොහැකිය.. ශබ්දයද නොනවත්වා ඇසෙනා අතර කොයිතරම් දන්නා අඳුනන නිවසක් වුවද නිවැසියන් නොමැතිව ඇතුලට අඩිය තැබීම බොහොබිනාය.. එහෙත් රූපවාහිනියේ අධික ශබ්දය පරයා ඇසෙනා දරුවන්ගේ කෑගසීමේ ශබ්දය සහ නිවස තුල කිසිවෙකුත් නොමැති අරුමය අතරේ කුමක් හෝ සම්භන්ධයක් තිබෙනවාය.. කාට හෝ කරදරයක්ද යන්න මාගේ හිතේ ඇතිවූ සිතුවිල්ල බැවින් නිවසට පිටතින් නිවස පසුපසට ගොස් පරීක්ෂා කිරීම මාගේ ඊළඟ උත්සාහය වීය..

නිවසේ වම්පසින් පසුපසට පියනගනා මා දුටු දසුනෙන් මා ගල්බීත වන්නේ ඊළඟට කුමක් කරන්නේද කියා හිතාගන්නට ඇසිල්ලක් අවශ්‍ය නිසාය.. මා මේ දකිනාවූ දර්ශනය සැබෑවක්ද කියා හිතාගන්නටද නොහැකිය.. මෙය කියවනා පාඨක සැම මේ සිදුවීම චිත්‍රපටයක රූපරාමුවක්දෝ යන්න සිතනු නිසැකය.. එහෙත් මේ ලියවෙනා දෑ සියයට සියයක් සත්‍ය සිදුවීමක්ය..

මා මිත්‍රයාගේ නිවසේ පසුපස කොටසට තියා ආලින්දයෙන් එපිටට මා කෙදිනකවත් ගොස් නොමැතිය.. එය නවීන පන්නයේ අලුතෙන්ම සෑදු නිවසක් බැවින් සියලු පහසුකම් වලින් යුක්තය. පොළොවේ සෑම අඟලකටම ටයිල් අල්ල ඇති නිවසේ නැතියයි කියන්නට දෙයක් නොමැති තරම්ය..

එහෙත් මේ මා දකින්නේ නිවස පසුපසින් නිවසට අල්ලා සාදන ලද  ලී මඩුවක් ගිනිගෙන දැවෙනා දර්ශනයයි.. මඩුවට ඇතුල් වීමට තිබෙනා ද්වාරය කොටස සම්පූර්ණයෙන්ම ගින්නෙන් වැසී තිබෙනා අතර ඊට එපිටින් මඩුව ඇතුලේ මා මිත්‍රයාගේ බිරින්දෑ තම දරුවන් තිදෙනා තුරුළු කරගෙන කෑගසනවාය. දරුවන්ද එක සීරුවට උදව් ඉල්ලා කෑගසන අතර නිවස අඩි එකොළහක් දොළහක් උස තාප්පයකින් වටවී තිබෙනා නිසා එය කාටවත් ඇසෙන්නට ක්‍රමයක් ඇත්තේම නැතිය. රූපවාහිනියේ ශබ්දය නිසා එම කෑගැසීම තව තවත් යටපත් වෙනවාය. ඊටත් ප්‍රමුකම හේතුවනම් මා මිත්‍රයාගේ පුත්‍ර රත්නය ඔහුගේම කපාපු පළුව බැවින් නිරන්තරයෙන් කෑකෝ ගසමින් සිටිනා දරුවන් කෑගැසුවා කියා අහල පහල කෙනෙකු විශේෂයෙන් බලන්නටද හේතුවක් නොමැතිවීමය.

ලී මඩුව සම්පුර්ණයෙන් ගින්නේ වැසී මා මිත්‍රයාගේ බිරිඳ ඇතුළු දරු තිදෙනා පිලිසීමට ඉඩදීම හර්දසාක්ෂියක් ඇති පුද්ගලයකු වශයෙන් මා හට නොහැකිය. එහෙත් ගින්නේ ස්භාවය අනුව ගින්නට මැදිවී සිටිනා පුද්ගලයින් බේරාගැනීමට නම්  මා ගින්න මැදින් ඇතුලට රින්ගිය යුතුමය. එසේත් නැතහොත් ලී මඩුව පිටුපසින් කඩා බිඳ දමා ඔවුන්ව එලියට ගත යුතුය. මාගේ සහ ඔවුන්ගේ අවාසනාවට හොඳින් ශක්තිමත්ව සාදා සම්පුන්ර්ණ ලෑලි ගසා ආවරණය කර ඇති මඩුවේ පිටුවසින් ලී ගැලවීමට තරම් ආයුදයක් මා ඇත නොමැතිය. මා වෙත තිබෙනා එකම සහ අවසන් විකල්පන නම් මහා ගිනි ජාලාව ඇතුලෙන් රිංගා ගොස් කල හැකි යමක් කිරීමය.

ඉතා වේගයෙන් පතිරෙනා ගින්න මඩුව සම්පුර්ණයෙන් වසාගැනීමට ප්‍රථමව කළහැකි යමක් කල යුතුය. මොහොතකට මාගේ සියලුම යැපෙන්නන් ආදරණීයන් ක්ෂණිකව මතකයට ආවා වුවද ඔවුන් වෙනුවෙන් මාගේ ජීවිතය රැකගෙන මාගේ ඇස් ඉදිරිපිට පිලිසෙන්නට ඔන්න මෙන්න තිබෙනා කිරි දරුවන් තිදෙනෙකුගේ ජීවිත නොසලකා හැරිය නොහැකිය. 

ගිනිගෙන දැවෙනා මඩුව අසල ඔවුන්ගේ ලිඳ තිබුනද ක්ෂණිකව ලිඳ වෙත එබී බැලූ කල මා වෙත නැගුනු සිතුවිල්ල නම් පාතාල ගැඹුරක් සහිත එම ලිඳෙන් වතුර ඇද ගින්න නිවන්නට නම් සතියක්වත් යයි යන්නයි.. වහාම ලිඳේ කඹය කණුවේ ගැටගසා බාල්දිය ලිඳට දැම්මේ මා මේ කරන්නට යන්නාවූ දෙයින් මා වෙත ගිනි ඇවිලුනහොත් ලිඳට පැන හෝ ජීවිතය බේරාගැනීමේ දෙවැනි සැලසුම ලෙසයි. මාගේ ඊළඟ වෑයම නම් මහා ගිනි ජාලාව ඇතුලෙන් රිංගා ගොස් දරුවන් බේරාගැනීමට උත්සහ කිරීමයි. 

ගිනි ජාලාව තුලින් මඩුව ඇතුලට දුව ගියාවූ මා දරුණු ලෙස පිළිස්සුම් නොමැති වුවත් අත් දෙකේ තිබෙන්නාවූ රෝම පිළිස්සෙන ගඳ මාගේ නාසයට දැනෙන්නේය. එහෙත් මරණ භයෙන් කෑගසනා මා මිත්‍රයාගේ බිරිඳ සහ දරුවන් ඉදිරියේ මාගේ පිළිස්සුම් නොසකා හැරිය තරම්ය. මඩුවේ පිවිසුම් දොරටුව හා එහි ගසා තිබෙනා රීප්ප පටි සියල්ලම ගිනි ඇවිලී තිබුනද මඩුව ඇතුලත ගින්න සම්පුර්ණයෙන් පැතිරී නොමැතිය. ගින්නේ ආලෝකයෙන් හාත්පස බැලුකල පෙනෙන්නේ මඩුවේ දොර ආසන්නයේ මේසයක් මත තිබෙනා ගෑස් ලිපත් එම මේසය යටින් තිබෙනා ගෑස් සිලින්ඩරයත් ගින්නට දහන පෝෂකය වී ඇති බවයි. ගෑස් සිලින්ඩරයෙන් ලිප වෙත ගෑස් සපයනා රබර් නලය ගිනිගෙන දැවෙමින් හාත්පස දඟලමින් ගින්න ලී කුස්සිය පුරා පතුරුවමින් සිටින්නේය. මා ගිනි ජාලාව මැදින් දිව ආවද කිරි දරුවන් එය තුලින් එලියට ගෙනයා නොහැකි නිසා හැකි උපරිම වේගයෙන් ගෑස් සිලින්ඩරය ගින්නෙන් ඉවත්කලහොත් දරුවන්ගේ ආරක්ෂාව තහවුරු කල හැකිය. සියල්ලම කල යුත්තේ ගෑස් සිලින්ඩරය පුපුරා යාමට ප්‍රථමවය. එය පුපුරා ගියහොත් ජීවිත පහක් විනාඩි කිහිපයක් ඇතුලත දවා හලුවිය හැකිය.

හිත හිතා සිටින්නටද කාලයක් නොමැතිය.. කල යුත්තේ මා පිච්චෙමින් හෝ ගෑස් සිලින්ඩරය ගිනිගෙන දැවෙන කුස්සියෙන් ඉවතට ඇදගෙන යාමය. ඒ හෙයින් මා ඒ භයානක කර්තව්‍යට අතගැසුවේ දෙවරක් හිතන්නේ නොමතිවමය. දරුවන් කාගේ හෝ දරුවන්ය. මාගේ ආදරණීයයන් අමතක කර දමා හෝ ඔවුන්ව බේරාගැනීම එතනට පැමිණි පළමු පුද්ගලයා වශයෙන් මාගේ වගකීමය. ඔවුන්ව ගින්න මැද තනිකොට දමා එලියට දිවගොස් ජීවිතය බේරාගැනීමට වඩා ඔවුන්ව බේරාගැනීමට උත්සහ දරා මියයාම වුවද ගෞරවාන්විතය.

චිත්තක්ෂණයක වේගයෙන් ගෑස් සිලින්ඩරය අතින් ඇදගෙන නැවතත් ගිනි දොරටුවෙන් මා එලියට දුවන්නේ කලයුතු වෙනයමක් නොමැති නිසාය.  ගෑස් ලිපෙන් වෙන් වන්නටම දැවී ගොස් තිබුනාවූ රබර් නලයේ කොන ගිනි පිඹිමින් හතර අතේ දැවී යද්දී, ගිනියම් වූ ගෑස් සිලින්ඩරයේ යකඩ දාරයෙන් මාගේ අත පිලිස්සෙද්දී සිලින්ඩරය ඇදගෙන ලිඳ අසලටම වාර්තා කිරීමට මා සමත් වෙනවාය. වුර්තීයමය කාර්මික පලපුරුදෙන් ගෑස් සිලින්ඩරයේ රෙගියුලේටරය විසන්ධි කිරීමට මා සමත්වෙන නිසා සිලින්ඩරය ගිනි පිඹ අවසන් වන අතර පාතාල ලිඳෙන් වතුර කිහිපයක් ඇද ලී කුස්සියේ ගිනි දොරටුව මද පමණට නිවා දැමීමට මා සමත් වෙනවාය. ඉන් අනතුරුව වහා ලී කුස්සිය වෙත පිවිසීමද මිතුරාගේ දරුවන් තිදෙනාද බිරින්දෑද කිසිදු හානියක් නොමැතිව බේරාගැනීමට මා සමත් වෙනවාය. ඉන් අනතුරුව ගින්නට නැවතීමේ තිත තැබෙන්නේ පාතාල ලිඳෙන් වතුර ඇද වතුර ගැසීමෙන් අනතුරුවයි.

මිතුරාගේ ලී කුස්සිය අඩක් පමණ ගින්නෙන් පිළිස්සී විනාස වී තිබු අතර ඔහුගේ දරුවන්ටත් බිරිඳටත් කිසිදු හානියක් සිදුවී තිබුනේ නැත. මාහට යම් යම් පිළිස්සුම් තුවාල සිදුවී තිබු අතර ඒවා දරුණු ගනයේ ඒවා නොවීම මාගේ වාසනාවයි. මා ආවේ චාර්ජරයක් ඉල්ලාගෙන යාමට වුවත් නැවතත් ගරාජයට යනතුරුම මා එහි ගිය කරණය මාගේ මතකයේ නොවුනේ සිදුවීමට ගිය අභාග්‍ය සම්පන්න සිදුවීම මා සසල කිරීමට ලක්කළ නිසා වන්නට ඇතිය..

අරූ අරෙහෙ පිටරටක දුක් විඳගෙන සල්ලි හොයල අංග සම්පූර්ණ ගෙයක් හදල දීල තියෙන්නේ සැපක් විඳින්නනේ යකඩෝ.. ටයිල් කරපු කුස්සියේ උයා පිහාගෙන කන්නේ නැතුව ලී මඩු අටෝගෙන උයන්න ගිහින් තව ජුන්ඩේන් ජීවිත හතරක් විනාසයි.. ගෑනුන්ගේ මල කෝලo.. දැන් ඉතින් මම එපැයි ඇඟේ රෝම කූප නැතුව මහපාරේ යන්න .. දකින මිනිස්සු මොනවා හිතයිද.. කමක් නෑ ජීවිත හතරක් බෙරගත්තනේ.. ඒ මදැයි..

(සිදුවීම සම්පුර්නම 100% සත්‍යයි.)

මනින්නාගේ කැරැට්ටුව මෙතනින් 

http://ambalangodakatha.blogspot.com/2014/12/blog-post.html