රවීයාගේ ලියතඹරා මල...

 

අපේ රවියා ගැන කාලෙකින් මුකුත්ම ලියන්න බැරිවුණා. උන්නැහේ ගැන ලිව්වේ නැති නිසා  රවියා මා එක්ක තරහ වෙලත් ඇති කියලා හිතුනත් එක්ක.. රවියා කියන්නේ ලියලා ඉවරකරන්න බැරි තරම් තොරතුරු ගොඩාරියක් තියෙන සුන්දර පොරක්. යාලු මිත්‍ර සෙට් එකේ කාටවත් නැති අරුම පුදුම ආකර්ෂණයක් තිබ්බ පොරක් නිසා රවියාට හැමදාම ලැබුනේ අනික් උන්ට නොලැබුණු වෙල්කම් එකක්.. ගිය ගිය තැන රවියා වනාහි ලොකුම විශ්වාසවන්තයා වෙන නිසා අපිට උනත් රවියා ඉන්න තැන්වල අපේම ගෙවල්වලින් හිමිවුණේ දෙවැනි ස්ථානය..

2001 අවුරුද්ද වගේ කාලේ රවියා වැඩි හරියක් වැඩ වාසය කලේ ගොඩයාගේ වාස භවනේ කිව්වොත් තමා හරි... ගොඩයාගේ කාමරේ ඇඳන් දෙකක් තිබ්බ නිසා එකක් ස්ථීරවම රවීගේ උනා.. මේ යෝදයා කොයිතරම් ගෙදර සාමාජිකත්වය ගත්තාද කියනවන්නම්, ගොඩයාගේ  සිරියහන් ගබඩාවේ ගොඩයාට ඕනා විදිහට ඉන්නත් බැරි තැනට කටයුතු යෙදීගෙනයි ආවෙ.. රවියා කොයිතරම් ගොඩයාගේ ගෙදර වැඩ රාජකාරීවලට ඉන්වෝල් උනාද කියනවනම්, හිටිගමන් කුස්සියේ තියන වලන් පිඟන් හෝදන වැඩ වගේ එව්වත් කරන්න පටන් ගත්තා කියහන්කෝ.. නිවාඩු දවසට ගොඩයා එහෙම ටික දවල් වෙනකල් නිදාගන්න ට්‍රයි එකක් දුන්නට රවියා එහෙම නෑ.. උදේම නැගිටලා මිදුලත් අතුගාන තැනට මේ යකා ගොඩගේ ගෙදර සාමාජිකයෙක්ම උනා.. ගොඩයත් ඉතින් ගෙදරට ෆ්‍රී ඔෆ් චාර්ජ් වැඩකාර කොල්ලෙක් ගෙනැල්ලා දීපු ගානට ටිකක් විතර ගැම්මෙන් ඉන්න ට්‍රයි කරත් ගෙදර පරිපාලනය ගොඩයාව තඹේකට ගණන් ගත්තේ නෑ ... රවියට හෙන ප්ලේස්... කොටින්ම කියනවනම් ගොඩයා නිකං රවියගේ  සික්කා ගානට වැටුනා... ගොඩයා මලාට ගෙදර වලන් පිඟන් හෝදන වැඩ, ගේදොර මිදුල් අතුගාන වැඩ වගේ එව්වට වොලන්ටියර්ලි  සයිනප් (Sign up) කරපු සත්වයෙක් නෙවෙයි ඉතිං... ගොඩයාගේ ගෙදර පරිපාලනය ඉඩකඩම්වල වැඩ කටයුතු ගැන පවා රවියා එක්ක සාකච්චා කරන තැනට කටයුතු යෙදුනාම ඉතින් ගොඩයාට වෙලාවකට හිතුනේ මේ ගෙදර පුතා තමුන්ද එහෙමත් නැත්තන් රවියාද කියලමයි... ගොඩයත් ඉතින් ඌටම පුතා වෙන්න ඇරලා උගේ සික්කා ගානට කාලය ගත කරගෙන ගියා..

ඒ කාලේ රවියා කරේ ටුවරිසම්... කලින් රවියා ගැන ලියවිච්ච පොස්ට් ඇතුලේ කියවුන විස්තරවල උන්නැහේගේ ව්‍යාපාර ගැන ලියවිලා ඇති කියලයි ගොඩයාගේ මතකය. ටුවර් එකක් සෙට් උනාම ගිහින් දවස් හතරෙන් පහෙන් සතියෙන් දෙකෙන් රවියා එන්නේ ගොඩයාගේ ගෙදර.. හිටිගමන් ගෙදර ගිහින් එන්න ගියාට රවියා වැඩිය උන්දෑගේ ගෙදර නයිට් පාරක් නැවතුනේ නෑ... ටුවරිසම් කරාට රවියට ඒ කාලේ එයිගේම වාහනයක් තිබ්බේ නෑ.. රවීගේ අයියගේ වාහන තමා දිව්වේ සංචාරක ව්‍යාපාරය වෙනුවෙන්.. පසු කාලෙක රවියා එයිගේම කියලා නිසාන් එෆ් බී 15 කාර් එකක් ගත්තා උනාට ඒ කොයි වකවානුවේද කියලා හරිහැටි ගොඩයාට මතක නෑ... ඒත් ලාවට වගේ ගොඩයට මතක තියෙනවා 2004 අවුරුද්දේ සුනාමි ආපු දවස්වල රවීගේ කාර් එකෙන් ගොඩයා නාගොඩ ඉස්පිරිතාලෙට ඇවිත් ගිය සින්කොන් එකක්.. 

ගොඩයාගේ ඥාති වෙන අයියා කෙනෙකුගේ බිරින්දෑ මොකක්දෝ නැන්දම්මා ලේලි වලියක් හේතුවෙන් මොනවාදෝ පෙති වගයක් ගිලලා සිය දිවි නසාගන්න ට්‍රයි කරලා කියහන්කෝ... සුනාමි ඇවිල්ලා සතියකින් වගේ වෙන්න ඕන මේ කියන කාලය.. ලෙඩා බලපිටියේ රෝහලට භාරගත්තේ නෑ මොකක් හෝ හේතුවක් උඩ.. ගොඩයාගේ කාර් එකේ පැට්‍රොල් ටැංකියේ ඒ වෙද්දී තිබ්බේ ලාම්පු තෙල්... පෙට්‍රල් තිබ්බේ නැති නිසා ගොඩයා ඒ දවස් ටික දිව්වේ ලාම්පුතෙල් වලින්.. ලාම්පුතෙල් ගැහුවාම වාහන පෙට්‍රල් වගේ පිකප් නෑ.. ලෙඩෙක් අරගෙන යන්න තරම් ෂුවර් එකක් නෑ එහෙම තත්වෙකින්.. රවීයගේ කාර් එකත් සුනාමි දවස්වල නැට්ට කැඩෙන්න දිව්වා යාලු මිත්‍රයන්ගේ ගෙවල්වල මියගිය අයගේ කටයුතු වෙනුවෙන්..  වාහනේ පෙට්‍රල් තිබ්බ නිසා  වහ බීපු නෑනන්ඩි බලපිටියෙන් නාගොඩ යැව්වයින් පස්සේ සාමසාධක ඥාති පරපුර අරගෙන ගොඩයා  නාගොඩ ගියේ රවීගේ කාර් එකේ  කියලයි  ගොඩයාගේ මතකය... සුනාමි ඇවිල්ල දාස් ගානක් මැරිලා ඉන්න වෙලාවේ පෙති වගයක් ගහලා ජීවිතේ නැති කරගන්න හදපු අපේ නෑනා කාරයාවනම් බලපිටිය ඉස්පිරිතාලෙන් පිළිගත්තේ තොරන්  ගහලා පාවාඩ දාලා කියහන්කෝ.... බලපිටියෙන් නෑනව කෙලින්ම නාගොඩට ට්‍රාන්සර්...  නෑනා පොඩ්ඩ එයයිගේ මරණයට හේතුව ඩයරියක ලියලා තබාලා පෙති වගයක් බීලා අහවර වෙලා ඉස්පිරිතාලෙට ගෙනියන්න ගොඩයාගේ වාහනේට දාගන්නකොට සිහියක් පතක් තිබ්බේ නෑ ... ඒත් ඒ උන්දෑ වාහනේට දාගනිද්දී ඩයරිය අරන් වාහනේට නැගපු කතාවක් සහ නැනගේ ඩේඩ් බොඩිය බලපිටියේ ඉස්පිරිතාලේ  බාද්දී ඩයරිය මිසින් වෙලා කියන කතාවක් ඇදුනා අන්තිමේ .. වහ බීපු නෑනා ගැන වෙනම බ්ලොග් පොස්ට් එකක් ලියලා ඒ තොරණේ විස්තරේ වෙනම ලියමු... නෑනා තාම ජිවතුන් අතර නිසා ඔව්ව ලියන එකත් ඒ තරම් ඇඟට ගුණ නෑ... එදා නෑනා කාරයා මලානම් ඩයරි වාසනාව ඇදීලා පොලිසි උසාවි ගානේ යන්න වෙන්නේ ඉස්පිරිතාලේ අරං ගිය අවංක අයින්සක ගොඩයාට. රවී ගැන ලියාන අපු කතන්දරේ කැලේ පැන්න වහ බීපු නෑන නිසා..

ඔන්න ඔය වගේ වාතාවරණයක තමා රවියා ගොඩයාගේ ගෙදර සාමාජිකයා උනේ.. ලියන්න ගිය කටයුත්ත සිද්දවුනේ සෙනසුරාදා දවසක...රවියට ඕනවුනා දවසක් කොළඹ යන්න.. යන්න ප්ලෑන් එක ගොඩයාගේ වෑන් එකේ.. ගමනට සහභාගී වෙන්නේ තුන්දෙනයි.. රවියා , ගොඩයා සහ බතලයා... කොළඹ ගියේ ඇයිද කියන්න ගොඩයාට ලොකු මතකයක් නෑ.. ගොඩයාගේ වෑන් කොටේ ඒ කාලේ රවියාගේ වගේ තමා.. ඌට ඕන තැන ඌ යනවා.. ගොඩයාත් ඉතින් නිවාඩු දවසක්නම් එල්ලිලා යනවා... කෑමබීම , ඉඳුම් හිටුම්, තේ පැන් , සැර බීම ඔක්කොම රවියාගේ පොකට් එකෙන්... සුපුරුදු පරිදි පිටිපස්සේ සීට් එකට ඇතිවෙන තියුණු තරඟයකින් අනතුරුව, බතලයා පිටිපස්සේ සීට් එකේ... රවියා පැසෙන්ජර් සීට් එකේ... අයින්සක ගොඩයා ඩ්‍රයිවින් සීට් එකේ.. මැරෙන්න කලින් කවදාහරි පැසෙන්ජර් සීට් එකක වාඩිවෙලා ඩ්‍රයිව් එකක් එන්ජෝයි කරන්න කවදාහරි වාසනාව ලැබේවි කියල ගොඩයා ඉතින් හිතාගෙන ඉන්නවා උනාට  තාම ඒ වාසනාව උදාවුනේ නෑ.. එකදාස් නවසිය අනූ නවයේ ඉඳන් අද දක්වාම, වෘත්තීයෙන් රියදුරෙක් නොවුනත්, ගොඩයා ඩ්‍රයිවින් සීට් එකේ... කරුමේ තමා ඉතීම්...

ඒ කලේ ගොඩයා ළඟ තිබ්බේ නිසාන් වැනට් එකක්.. එකේ හයිකරලා තිබ්බේ සෝනි සීඩී ප්ලේයර් එකක්.. ඒ කාලේ සීඩී එකක මිල රුපියල් හත්සිය පනහක් කියහන්කෝ.. රජයේ සේවකයෙක් වෙච්ච ගොඩයට කොයින්ද සීඩී ගන්න හත්සිය පනහේ එව්වා... ගොඩයා ඉතින් ඔකේ වැඩිමනක් ඇහුවේම රේඩියෝ එක... ගොඩයා ඉතින් එදත් අදත් රේඩියෝ ලවර් නිසා ඕකෙ ලොකු අවුලක් ගොඩයාට නෑ... 

මොනාද බං මේ අහන සිංදු ... දාපන් සීඩී එකක්... 

එහෙම කියන්නේ බතලයා...

මුගේ මේ මගුලේ සීඩී ප්ලේයර් එකක් තිබ්බට මූ ළඟ සීඩී නෑ.... හාහ් හාහ් හා...

කක්කුසියට යන්නත් ගොඩයාගේ වෑන් කොටේ අරගෙන යන රවියෝත්තම තමා එහෙම උත්තර දෙන්නේ...

මට උඹලාට සීඩී අස්සවන්න වත්කමක් නෑ... මේ තියන සිංදු උඹලාට අහගෙන යන්න බැරිනම් විසඳුම් දෙකයි.. එකක් වාහනෙන් බැහැලා බස් එකේ යාම... දෙවැනි එක ඉස්සරහ රෙකෝර්ඩ්බාර් එක ළඟ නවත්තලා කැමති සීඩී එකක් ගැනීම... කොකටද කැමති කියලා කියහල්ල...

බොට සීඩී අරං දෙන්න අපි? 

ඇයි අරං දුන්නම උඹට මක් වෙනවද.. උඹල තමා මේ වාහනේ මට වඩා පාවිච්චි කරන්නේ...

----------------------------------------------------------------------------------

ගොඩයා සහ බතලයාගේ  උදෑසන ආහාරය රවියාගේ අනුග්‍රහයෙන් වූ අතර කළුතර පාලම අසල පිහිටි කඩයෙන් වළඳා වාහනයට නැගී රවියාගේ මුදල් පසුම්බිය වාහනයේ ගියරය අසල දිලිසි දිලිසී තිබෙනවාය...  මොනර කොළ කිහිපයක අග්ගිස්සද පසුම්බියෙන් එලියට පැන ඇත වනනා ආකාරයක් ගොඩයාට පෙනෙනවාය.. ගොඩයාට ගණදෙවි නුවන පහල වන්නට ඒ දර්ශනය හොදටෝම ප්‍රමාණවත්ය... වෑන් කොටේ මැද තිබෙනා කන්නාඩියෙන් ගොඩයාට පසුපස ආසනයේ වැඩ වාසය කරනා බතලයාගේ මුසල මුනත්තහඩුව පෙනෙනාවය... රවියා උන්දෑගේ මොටරෝලාවෙන් කාටදෝ දොඩවනා අල්ලපනල්ලේ ගොඩයා මැද කන්නාඩිය මාර්ගයෙන් බතලයාට ඇහෙන් රවියාගේ පසුම්බිය පෙන්වනවාය.. හද්දා මෝඩ බතලයාට ඒ ගැන හාන්කවිසියක ගානක් නැත... ගොනා සේ ඉන්නවාය.. 

උඹට මේ කන්නාඩියෙන් මගේ මුණ පේනවද ?

මුනම පේන්නේ නෑ... ඇස්දෙක විතරක් පේනවා... ඇයි ?

එහෙමද... මේ කන්නාඩිය අලුතන් දැම්මේ බං... මට නිකං පිටිපස්ස පේන්නේ ඇදවෙලා වගේ...  ගොඩයා එහෙම කියනා අල්ලපනල්ලේ බතලයාට ඇසක් ගසා ඇහෙන් පෙන්වන්නේ රවියාගේ මොනරකොල පසුම්බියය... බතලයාට වයර්ය ... ගොඩයා පෙන්වන දේ වටහාගන්න තරම් බතලයාට අලයක් තරම්වත් මොලයක් නැත්තේය... ඒ වෙද්දී වෑන් කොටේ එගොඩ උයන පසුකරමින් මොරටුව දිහාවට ඇදෙනාවය... ගොඩයාගේ පණිවුඩය බතලයාට දන්වන්නට රවියා අහක බලන අසිල්ලේ පොකට්ටුවට ඇඟිල්ල තබා පෙන්වන්නට ගොඩයාට සිද්ද වෙනවාය... 

ඈ බං බතලයා.. මොරටුවේ රෙකෝර්ඩ් බාර් තියෙනවද පාර අයිනේ...

 ඇති බං... බස් හෝල්ට් එක ලඟම එකක් තිබ්බ වගේ මතකයි...

මැද කන්නාඩියෙන් සිද්දවෙනා මන්ත්‍රණය රවියා දන්නේ නැත.. බතලයා සහ ගොඩයා සැලසුම ඇඳ අවසානය.. සැලසුමට අනුව ගොඩයා මොරටුව ලං වෙද්දී රථය හෙමීට ස්ලෝව් කරනවාය.... රවියාට වැඩේ අවුල්ය..

මොකෝ බං ස්ලෝ කරන්නේ...

වාහනේ කර ගඳක් එනවා වගේ නේද බං...

නෑ... මටනම් එන්නේ නෑ...

මට පොඩි ගඳක් එනවා බං... කෝකටත් නවත්තල බලමු... වයර් එකක්වත් උනුවෙලාද දන්නේ නෑ...

ගොඩයා මොරටුව බස්නැවතුමට මදක් මෙහාට වන්නට  වෑන් කොටේ නවත්වන්නේ බතලයා සමග ගැසූ සැලසුම ක්‍රියා කරවනුවස් වුවද බතලයා වැඩේට එන්ටර් වෙන්නේ එක්ස්පෙන්ඩබල් ලෙවල් එකෙන්ය.. ගොඩයාගේ සැලසුම වුයේ වෑන් කොටේ නවත්වා එන්ජිම ඇර බලන අල්ල පනල්ලේ බතලයා රවියාගේ පොකට්ටුවෙන් මොනර කොලයක් පික් පොකට් ගසා සීඩී එකක් ගැනීමටය... ඒත් අවාසනාවට ඇත්ත කතාවක් ලෙසින් ගොන් බතලයා වාහනය නැවැත්වූ වහා රවියාගේ මුදල් පසුම්බිය ගෙන රථයෙන් පැන  දුවනවාය.. 

----------------------------------------------------------------------------

ඉතින් කියහකෝ වැඩක් කරන්නේ කොහොමද කියලා මේ වගේ ගොන් යක්කු එක්ක.. හීනියට දාහක් උස්සලා සීඩී එකක් ගෙනැල්ලා තැන්කූ මතන් මේන් ඉතුරු හල්ලි කියලා දෙන්න තිබ්බ වැඩේ එක්ස්පෙන්ඩබල් ලෙවල් එකෙන් කරන්නේ අහවල් එකටද .. තමුන්ගේ පොකට් එක අරං බතලයා පැනලා දුහද්දී ඉතිං රවියා නිකං ඉඳියිද? නෑනේ.. නෑනේ... ඌත් ඉතිං වාහනෙන් පැනලා බතලයා පස්සේ ඔරේ රන් කියහන්කෝ... ගොඩයට ඉතිං දුහන්න අහක් නෑ... රේස් එක බලන් ඉන්නවා ඇරෙන්න ගොඩයාට වෙන විකල්පයක් නෑ...

රවියා බතලයාගේ උසෙන් භාගයක් උනාට රවියත් ගේම අතෑරියේ නෑ.. නිකමට හිතාගන්නකෝ උසේන් බෝල්ට් පස්සෙන් සුසන්තිකා දුහනවා වගේ සීන් එකක්.. වෙනස රවියා සුසන්තිකාට වඩා ගොඩාක් සුදුයි.. දුහලා බේරෙන්න බෑ කියලා දැනගත්තු ගමන් තමා බතලයා උන්දෑගේ ගොන් මොලෙන් වැඩක් ගන්න හිතන්නෙ.. ගේම් එකකදී හයිය කොච්චර තිබ්බත් ටැක්ටික්ස් නැතුව ගේම් එකක් දිනන්න බෑ.. ආන් ඒ නිසා තමා බතලයා දුහන ගමන්ම රවීගේ පොකැට් එකෙන් දාහේ කොලයක් එලියට ඇදලා අරගෙන පොකැට් එක බීම අතාරින්නෙ... එව්වා ඉතින් වෘත්තීය මට්ටමේ පොකැට් කාරයන්ගේ ටැක්ටික්ස්... බතලයා ඒ කාලේ කොළඹ ප්‍රසිද්ධ සමාගමක රස්සාවක් කරා කිව්වට ඇත්තටම කරේ පොකැට් ගහපු එකද කියලත් හිතෙනවා දැන් ඒ ගැන නැවත හැරිලා බැලුවාම.. ( අනිවා ටිපර් වෙනවා මේක කියෙව්වම.. හැක්.. )

රවියට වෙන විකල්පයක් නෑ... බතලයා ගත්තු දාහට වඩා  පොකැට් එකේ තියන දාහේ කොළ මිටිය වටිනා නිසා පොකැට් එක අහුලගන්න නවතිනවා ඇරෙන්න වෙන චොයිස් එකක් නෑ... රවියා නැවතිලා පොකැට් එක අරගෙන නැවත තරඟයට අවතීරණ වෙන්න බලද්දී බතලයා මොරටුවේ බස් හෝල්ට් එක ළඟ තිබ්බ කඩ පේලිය අස්සෙන් මිසින් වෙලා අහවරයි.. 

ඕන් ඔය රේස් එකේ ප්‍රතිපලයක් විදිහට තමයි චන්දන ලියනාරච්චිගේ "ලියතඹරා මල " සීඩී එක ගොඩයාගේ වෑන් එක ඇතුලට එන්නේ... එතනින් එහා කොළඹට යනකලුත් එනකලුත් රවියා හත්සිය පනහ ගැන නාහෙන් අඬනවා උනාට ගොඩයාටත් බතලයාටත් ඒ ගැන වගක්වත් නෑ... ගොඩයාගේ වෑන් එක පසුකාලීනව විකුනලා ඊට පස්සේ ගතපු කාර් එකෙත් "ලියතඹරා මල " ඇහුනා නිතර නිතර... "ලියතඹරා මල " සීඩී එකේ තිබ්බ සිංදු ඔක්කොම අදටත්  ගොඩයට කට පාඩම්.,.. ඒ සිංදු කොතන ඇහුනත් ගොඩයට මතක් වෙන්නෙම අපේ හිතාදර මිත්‍ර රවියා... අදත් අහම්බෙන් "ඔබ කුමුදිනියක් වී හිනැහෙ නම්" සිංදුව ඇහිලා ගොඩයට රවියව මතක් වුනා.. එකයි මේ පොස්ට් එකේ ප්‍රස්තුතය..

අද වෙද්දී සියල්ල වෙනස් වෙලා.. රවියා කාලයක් ජපානේ ගිහින් හිටිය.. ලංකාවට ඇවිත් ව්‍යාපාර කීපයක් පටන් ගත්ත.. මේ වෙද්දී රවියා දෙදරු පියෙක්... රටට උදාවුණ අයහපත් ආර්ථීක වටපිටාව එක්ක රවිගේ වෙඩින් හෝල් එකයි, වාහන සර්විස් එකයි දෙකම නැවත පන  දීගන්න බැරි තැනටම වැටුන... රවියා විසිට් එකක් ගහගෙන ඩුබායි ගිහින් දැනට මාස තුනක්.. දක්ෂ ජැපනීස් ෆූඩ් කෝකියෙක් වෙච්ච රවියට තාම ජොබ් එකක් නෑ... ඒ ගැන හිතද්දී ගොඩයට පට්ට දුකයි... යාලු මිත්‍රයෝ පුළුවන් උදව් හැම එකම කරලත් රවියට ජොබ් එකක් හොයල දෙන්න තාම කාටවත් බැරිවුණා... අතේ මිටේ තිබ්බ කාලේ ලොස් නැතුව යාලු මිත්‍රයන්ට ඇති තරම් කන්න බොන්න වියදම් කරපු සුන්දර මිත්‍රයා අද අසරණ වෙලා... වක්‍රාකාරයෙන් කරන උදව්වක් ඇරුනාම රවියාට ඩුබායිවලින් ජොබ් එකක් හොයල දෙන්න ගොඩයාට හැකියාවක් නෑ... ඒ නිසා රවියාට ජොබ් එකක් ලැබේවා කියලා ප්‍රාර්ථනා කරනවා ඇරුනාම ගොඩයාට රවියා වෙනුවෙන් කළහැකි කිසිවක් නෑ... ඒ ගැන ගොඩයාට දැනෙන්නේ දුකක් සහ තමුන් ගැනම දැනෙන කලකිරීමක්...

රවියා ගැන ලියවිච්ච අනික් පෝස්ට් 

රවීගේ පැරිෂුට් පිම්ම

තඩියාගේ නුවරඑලිය සංචාරය... 1

තඩියාගේ නුවරඑළි සංචාරය ... 2

ගිය නොගිය ට්‍රිප් එක ................

තකුමා ගල් කල සංස්ථා ගල්..

වීරයාගේ කතා වස්තුව

රවියයි සීයයි...